ทอคางไท้ะ 27
27
อีซาฮ้ะ ชูฌี้ ยาคุ้
1ท่อง อีซาฮ้ะ อ ซ้ะแซย่, ดี๊ อ เมะ ไค้ะ เย้า นอ, อ เว๊ กุ้นี่ อ พู วี่แซย่ เอโซ เฌ๊, ดี๊ โล้ เอะ เว๊ บี่อี้ง, “พู-เอ้อ”, อ เท่อ ไคล้ช๊า-อ้ะ ไจ้ะเว๊, “พู โอ พี่ อี้ง” 2อ เว๊ ไจ้ะเว๊, “อี้งเซ้อ, แพ่ ซ้ะแซย่ เย้า, แพ่ ล ซีงแฌ๊ อ มื่งนี้ง ซี๊ง แบ 3เกม๊า น แม้นี่ น นางชิ้นางค้ะ, เมะเว๊ คลีงแช โด้ง, ดี๊ คลีงบ้อง, ลี้ ลู่ง ทเคแกล้, อางฆื๊ง ค้ะนี่ เอะ แพ่ อ ทแย 4แด้เว้ เอะ แพ่ อ ทอาง อวีงๆ, ด้องซุ้ พี่ แพ่ อาง เว๊ อวีง นอ, ดี๊ เฌ๊ โชะ เกม๊า แพ่ อาง, บี่ซุ้ แพ่ ม ชูฌี้ แบ แน้, พี่ ล คลึ้ ซี๊ง ได้ะ แบ อี้ง”
5พี่ อีซาฮ้ะ ไคล้ ดี๊ อ พูแคว๊ เอโซ นอ, น่าง เรเบคา คุ้ช๊องแน ฌูง เว๊, ท่อง เอโซ ไจทาง ลี้ ลู่ง ทเคแกล้, บี่ซุ้ อางฆื๊ง ค้ะ อาง ทแย นอ 6น่าง เรเบคา ไคล้ ดี๊ อ พูแคว๊ ยาคุ้ ไจ้ะเว๊, “มู่ แน่ฌ๊า น แพ่ ไคล้ ดี๊ น โจ้ เอโซ ไจ้ะเว๊ 7‘เฌ๊ โชะ เอะ แพ่ อ ทแย, ดี๊ แด้เว้ ทอาง อวีงๆ, เกม๊า แพ่ อาง, ดี๊ แพ่ ม ชูฌี้ แน้ ลู่ง กแช่ยาเว อ เมะแซ พ้า, พี่ แพ่ ล คลึ้ ซี๊ง ได้ะ แบ อี้ง’ 8อกย้องบี่นอ, พู-เอ้อ, เกม๊า คุ้ช๊องแน บี่ซุ้ดี๊ มู่ ม อางแบเลา แน้ อี้ง 9ลี้ ลู่ง แมะ, แกะ, น๊างมู๊ง พ้า, ดี๊ แม้นี่ แกะพู ฌี้ๆ, คี๊ง ดื้ง, เฌ๊ไท้ โชะ เอะ มู่, มู่ ม เฌ้อาง เอะ น แพ่ อวีงๆ, ด้องซุ้ พี่ แพ่ อาง เว๊ อวีง นอ ล้อ 10ดี๊ แน้ ล้อ, น แบ ลี้ โชะ เอะ น แพ่ เกม๊า อ อาง, บี่ซุ้ อ เว๊ ม ชูฌี้ แน้, พี่ ล คลึ้ ซี๊ง ได้ะ แบ อี้ง” 11ยาคุ้ ไคล้ ดี๊ อ มู่ น่าง เรเบคา ไจ้ะเว๊, “แคว่เซ้อ, จ โจ้ เอโซ นอ, เก โพล้ง อ ชอง โอ แอ, ดี๊ แย้ จ เก โพล้ง เกล้งเน้ง 12แบซีงลู่ง น แพ่ ม กเลิ่งดุ้ จล้องจย่าง, ดี๊ แด เว๊ จ อางโล๊-อ้ะ, ฌ้อง ดึ้ เกม๊า ทชูอ้า เฌ๊ ท้อง แย้, ล เมะ ทชูฌี้ แบ” 13อ มู่ ไคล้ ดี๊-อ้ะ ไจ้ะเว๊, “พู-เอ้อ, เกม๊า น ทชูอ้า นอ, ล้างแบก้ะ มู่ แดเทา, ชู่ง มู่ อ ลู่ง ล เม้ง ล้อ, ลี้ แม้นี่ เอะ มู่ แดเทา” 14อ เว๊ ลี้ แม้นี่ เฌ๊ไท้ โชะ เอะ อ มู่, อ มู่ เฌ้อาง อวีง, ด้องซุ้ พี่ อ แพ่ อาง เว๊ อวีง นอ ล้อ 15ฌ้อง น่าง เรเบคา แม้นี่ อ พูแคว๊ วี่แซย่ เอโซ อ ไช๊แค่, ลู่ง อ ฌี้ ทึ, พี่ โอ ดี๊-อ้ะ ลู่ง เด้า พ้า นอ, เฌ๊ ดึ้ซุ้ทาง เอะ ยาคุ้, เมะเว๊ อ พู ปี๊ ล แฌ้ นอ เฆาะ 16แม้นี่ แมะพู อ ไพ้ะ, แม้ไบ้ะ เว๊ อ จูง, ดี๊ อ โคะบ้อง เกล้งเน้ง นอ 17ฌ้อง อ เว๊ แม้นี่ ทอาง อวีง, ดี๊ กู พี่ อ แม้ เว๊ นอ, เกม๊า อ พูแคว๊ ยาคุ้ลี้ โชะ เว๊ ล้อ
18อ เว๊ ลี้ฆ้าง ฌูง อ แพ่, ดี๊ ไจ้ะเว๊, “แพ่”, อ แพ่ ไคล้ช๊า-อ้ะ ไจ้ะเว๊, “แพ่ โอ พี่ อี้ง, พูแคว๊-เอ้อ, น เก โพล้ง เล้?” 19ยาคุ้ ไคล้ช๊า อ แพ่ ไจ้ะเว๊, “จ เก เอโซ แพ่ อ พู วี่แซย่, จ แม้ บี่ซุ้ดี๊ แพ่ โล้ เอะ แย้ นอ เย้า, เฌ้เทิง ชี๊น้าง อาง ทแย, พี่ จ ลี้ อางฆื๊งนี่ อี้ง แดเทา, บี่ซุ้ แพ่ ม นี่ ชูฌี้ เอะ จ เท่อ” 20แบเด้าะ อีซาฮ้ะ ไคล้ ดี๊ อ พูแคว๊ ไจ้ะเว๊, “พู-เอ้อ, น แม้ บี่จะเล้, น ต้องนอง-อ้ะ เพล ย่าง อี้ง?”, อ เว๊ ไคล้ช๊า อ แพ่ ไจ้ะเว๊, “เมะเว๊ กแช่ยาเว, แพ่ อ กแช่แยว้ เฌ๊โชะ เอะ แย้” 21ฌ้อง อีซาฮ้ะ ไคล้ ดี๊ ยาคุ้ ไจ้ะเว๊, “พู-เอ้อ, เฌ๊ฆ้าง เบ้าๆ, แพ่ ม นี่ พอง กเลิ่ง ดุ้ แน้, บี่ซุ้ ม ซีงแฌ๊-อ้ะ, น เก เอโซ แพ่ อ พูแคว๊ เต้ๆ, ชี่-อ้า?” 22ยาคุ้ ลี้ฆ้าง โอ เบ้า อ แพ่ อีซาฮ้ะ, อีซาฮ้ะ พอง กเลิ่ง ดุ้ เว๊ อล้องอย่าง, ฌ้อง ไจ้ะเว๊, “อ ลู่ง นอ, เก ยาคุ้ อ ลู่ง, แบเด้าะ อ จูง นอ, เก เอโซ อ จูง ล้อ” 23อีซาฮ้ะ ล นาง-อ้ะ ล้า แบ, เมะเว๊ อ จูง โอ ดี๊ อ ชอง แอฌ้อง, บี่ซุ้ดี๊ อ โจ้ เอโซ อ จูง, อีซาฮ้ะ ชูฌี้ เอะ อ เท่อ นอ ล้อ 24อีซาฮ้ะ อางจ้ะ-อ้ะ เว๊, “น เก เอโซ, แพ่ อ พูแคว๊ เต้ๆ, ล้อ-อ้า?”, อ เว๊ ไคล้ช๊า ไจ้ะเว๊, “เมะ เซ้อ” 25อีซาฮ้ะ ไจ้ะเว๊, “เฌ๊ โชะ เอะ แพ่ อ ทอาง, แพ่ ม นี่ อาง ทแย, พี่ แพ่ อ พูแคว๊ อางฆื๊งนี่ เว๊ นอ, ฌ้อง ชูฌี้ แน้”, ยาคุ้ เฌ๊ โชะ เอะ-อ้ะ, อีซาฮ้ะ อาง เว๊ ล้อ, ยาคุ้ เฌ๊โชะ เอะ-อ้ะ ไซ้ะ ซไบ้ะ แซ ที๊ง, ดี๊ อ โอ้ เว๊ แด ล้อ 26ฌ้อง อ แพ่ อีซาฮ้ะ ไคล้ ดี๊-อ้ะ บี่อี้ง, “พู-เอ้อ, เฌ๊ฆ้าง โอ เบ้า, ดี๊ น๊าม๊า แพ่” 27ยาคุ้ เฌ๊ฆ้าง โอ เบ้า, ดี๊ น๊าม๊า-อ้ะ, ฌ้อง อีซาฮ้ะ น๊า ดุ้ เว๊ อ กลื่ง ลู่ง ไช๊แค่ ล้อง, ดี๊ ชูฌี้ เว๊ บี่อี้ง
“แคว่เซ้อ, จ พูแคว๊ อ กลื่ง
บี่ซุ้ดี๊ ท อ กลื่ง ลู่ง ทเคแกล้, พี่ กแช่ยาเว ชูฌี้ เว๊
28เกม๊า กแช่แยว้ เกล๊าง เอะ แน้ ปช้าง ที๊ง เฌ๊ล้างนี่ ลู่ง มุ้คู
ดี๊ เกล๊าง เอะ แน้ ที๊งล่างค่างพ้า อ ทกู้งทล๊า
เลา ดี๊ บืง, ดี๊ ไซ้ะ ซไบ้ะ แซ ที๊ง อ ซ๊าง แอฌี่งแอฌ้อง
29เกม๊า กเย่ โพล้ง กุ้ชื้อ ลแพ นอ, แม้ เอะ น เท่อ
เกม๊า โพล้ง ลู่ง ค่าง พ้า, ซย๊องล้าง อ ซ้ะ แบ้ แน้
เกม๊า น เก น พื่ง น วี่ อคูอแน่
ดี๊ เกม๊า น มู่ อ พูแคว๊ ซย๊องล้าง อ ซ้ะ แบ้ แน้
โพล้งเล้ ชูอ้า แน้ นอ, เกม๊า โพล้ง ล แฌ้ นอ, แบ ทชูอ้า#ทคท.12:3#ฮบ.11:20
ดี๊ โพล้งเล้ ชูฌี้ แน้ นอ, เกม๊า โพล้ง ล แฌ้ นอ, ฮะนี่ ทชูฌี้”
เอโซ ล นี่ ทชูฌี้ แบ
30ท่อง อีซาฮ้ะ ชูฌี้ ยาคุ้ ฌ้อง, ดี๊ ยาคุ้ พู่ ไจทาง พ้องไฆวะ อ แพ่ อีซาฮ้ะ อ เมะ นอ, อ โจ้ เอโซ ลี้ อางฆื๊ง ค้ะ เท่อ เฌ๊ไท้ 31อ เว๊ เฌ้อาง อวีง มะ, เฌ๊ โชะ เอะ อ แพ่, อ เว๊ ไคล้ ดี๊ อ แพ่ ไจ้ะเว๊, “เกม๊า แพ่ เฌ้เทิงทาง อาง ทแย, พี่ พูแคว๊ อางฆื๊งนี่-อ้ะ อี้ง, บี่ซุ้ ม นี่ ชูฌี้ แบ พู ล้อ” 32อ แพ่ อีซาฮ้ะ ไคล้ ดี๊-อ้ะ ไจ้ะเว๊, “น เก โพล้งเล้?”, อ เว๊ ไคล้ช๊า อ แพ่ ไจ้ะเว๊, “จ เก เอโซ, แพ่ อ พูแคว๊ วี่แซย่ ล้อ” 33ท่อง แน่ฌ๊า เว๊ บี่นอ, อีซาฮ้ะ ว้ะโทะ น้ะมะ, ไคล้ทาง ไจ้ะเว๊, “โพล้ง เล้, พี่ ลี้ ค้ะ อาง ทแย, ฌ้อง เฌ๊ไท้ โชะ เอะ แพ่?, แพ่ อาง เลาพะ เย้า, พี่ น ล คลึ้ เฌ๊ ท้อง ได้ะ แบ นอ, ดี๊ แพ่ ชูฌี้-อ้ะ เย้า, ดี๊ อ เว๊ ม นี่แบ ทชูฌี้ เต้ๆ, ล้อ” 34พี่ เอโซ แน่ฌ๊า อ แพ่ อ ทไคล้ นอ, อ เว๊ กุ้ซย้ะ พ้ะดูทาง เท่อ, ดี๊ ซ้ะ ลู่ง อ เฌ๊ฌ้อง น้ะ มะ, ดี๊ ไคล้ ดี๊ อ แพ่ ไจ้ะเว๊, “แพ่-เอ้อ, อวีงซ้ะชู้, ชูฌี้ พู ไช้ะ” 35แบเด้าะ อ แพ่ ไจ้ะเว๊, “น พื่ง เฌ๊ฆ้าง อางโล๊ แพ่, แม้นี่ก้ะ น ทชูฌี้ เย้า” 36เอโซ ไจ้ะเว๊, “อ เว๊ อ เม้ง ยาคุ้ นอ, แบ เมาะ เย้า, ล เมะ แบ-อ้า?, เมะเว๊ อ เว๊ อางโล๊ แย้ คี๊ง พ๊า ดี๊ อี้ง เย้า, อ เว๊ แม้นี่ก้ะ พู วี่แซย่ อฌ้องอเก พี่ เก จ เท่อ#ทคท.25:29-34 ดี๊ ล พ๊า แย๊ อี้ง นอ, อ เว๊ แม้นี่ก้ะ จ ทชูฌี้ ได้ะ ปะ”, ฌ้อง อ เว๊ ไจ้ะเว๊, “แพ่-เอ้อ, น ล อางกีนี่ เอะ แย้ ทชูฌี้ ล น้าง แบ-อ้า?” 37อีซาฮ้ะ ไคล้ช๊า เอโซ ไจ้ะเว๊, “แพ่ ต๊างทาง-อ้ะ, เก นคูนแน่, ดี๊ อางกีล้าง อ พื่ง อ วี่ กุ้ แฌ้, เก อ เพล่, เลา ดี๊ ทดุ้ทแล, ดี๊ ไซ้ะ ซไบ้ะ แซ ที๊ง นอ, แพ่ แด้เว้ เอะ-อ้ะ ล้อ, พู-เอ้อ, แพ่ ม แม้ เอะ แน้ ทเม้งเล้ ซี ได้ะ?” 38เอโซ ไคล้ ดี๊ อ แพ่ ไจ้ะเว๊, “แพ่-เอ้อ, น ทชูฌี้ โอ ล เม้ง เฆาะ ล้อ-อ้า?, แพ่, อวีงซ้ะชู้, ชูฌี้ แบ พู, เกม๊า เอะ พู อ ทชูฌี้ ไช้ะ, แพ่-เอ้อ”, ฌ้อง เอโซ นอ, กุ้ซย้ะ อ ลู่ง ฌางซย้ะ ล้อ#ฮบ.12:17
39อ แพ่ อีซาฮ้ะ ไคล้ช๊า-อ้ะ ไจ้ะเว๊
“น ฌางคูล่าง ม โอ ช้างชื้ง ดี๊ ที๊งล่างค่างพ้า อ ทกู้งทล๊า
ดี๊ ช้างชื้ง ดี๊ ปช้างที๊ง ลู่ง ทมุ้คู ท้ะ
40แบเด้าะ น ม โอม๊า ดี๊ น้ะ
ดี๊ น ม แม้ เอะ น พื่ง อ เท่อ
แบเด้าะ ท่อง น โค่งทางโค่งล้าง นอ
น ม บุ้แค่ไฆวะ อ แอะ ลู่ง น โคะบ้อง ล้อง นอ ล้อ#ทคท.36:8; 2กจฆ.8:20#ฮบ.11:20
ยาคุ้ ไจคุ้ซูงไฆวะ เอโซ อ ท ซ้ะทาง
41เอโซ นอ, แช๊เมะ ไฌ๊ซ้ะ ดี๊ ยาคุ้, เป๊งนี่ ลู่ง ทชูฌี้ พี่ อ แพ่ ชูฌี้ เว๊ อกย้อง นอ, เอโซ ไคล้ ลู่ง อ ซ้ะ พ้า บี่อี้ง, “มื่งนี้ง มองแบม้ะแบ แพ่, เฌ๊ เบ้าทาง เย้า, ล นี้ง แย๊ นอ, จ ม แม้ซี๊งไฆวะ จ พื่ง แคว๊ ยาคุ้ ล้อ” 42แบเด้าะ อ พูแคว๊ เอโซ อ ทไคล้ นอ, โพล้ง โอ โล้ เอะ น่าง เรเบคา, น่าง เรเบคา เกม๊า โพล้ง ลี้ กุ้นี่ อ พู ปี๊ ล แฌ้ นอ, เมะเว๊ ยาคุ้, ดี๊ ไคล้ เว๊ ดี๊-อ้ะ บี่อี้ง, “อี้งเซ้อ, น โจ้ เอโซ แม้มึล้างอซ้ะ ดี๊ ท ม แม้ซี๊ง แน้ 43อกย้องบี่นอ, พู-เอ้อ, ชู่ง มู่ อี้ง, เฌ้เทิงทาง ไจคุ้ซูง, ลี้ฌูง มู่ อ โจ้ ลาบาง ลู่ง ฮาราง อู้ง 44ลี้ โอชู๊ ดี๊-อ้ะ, ท้อง ลู่ง น โจ้ อ ท ซ้ะทาง พ้ะดู, ม ล้างซยืง ไท้ โฆะ
45ท้อง ลู่ง น โจ้ อ ทซ้ะทาง ม ล้างซยืง ไท้, ดี๊ อ เว๊ ซ้ะนาง เท่อ พี่ น แม้ เอะ-อ้ะ นอ, ฌ้อง มู่ ม โซ๊งทาง โพล้ง, เกม๊า อ ลี้ ฮะนี่ แน้, เฌ๊ไท้นี่ พี่ นอ, แบทเล้ มู่ อ พู คี๊ง แฌ้, ม ล้างแม่ไฆวะ ล นี้ง ฆ่าง โละซ้ะ?”
46น่าง เรเบคา ไคล้ ดี๊ อีซาฮ้ะ ไจ้ะเว๊, “, เป๊งนี่ ลู่ง โพล้ง ฮีไท มืง อกย้อง, ท กึ้แบฆวี้แบ แย้ ดี๊ จ ท โอม๊า น้ะ มะ ล้อ, ยาคุ้ เมะ ทางแซย่ ดี๊ โพล้ง ฮีไท มืง, โพล้ง มืง ลู่ง ที๊งล่างค่างพ้า อี้ง นอ, จ ทโอม๊า ม ล้างเปิ่ง ลู่ง จ ฌ่าง บี่จะเล้?”
Currently Selected:
ทอคางไท้ะ 27: NPKTH
Highlight
Share
Copy
Want to have your highlights saved across all your devices? Sign up or sign in
Pwo Karen Bible (Thailand) © Thailand Bible Society, 2016.