YouVersion Logo
Search Icon

Matayi 22

22
Ichili icha lusekelo ulwa sendwa
(Luk. 14.15-24)
1U Yesu akanena sona na bantu bala muvyili. 2“Ubumwene ubwa Kumwanya buyanite bulo nu mwene yuyo akayannya ulusekelo ulwa sendwa iya mwana wache. 3Akabatuma abambombo bache pakubabuzya abantu babo bakitiziwa ku lusekelo, loli bakakana. 4Po akatuma abambombo abamwabo pakasi pa bantu babo bakitiziwa na mazyu aghakuti, ‘Nayannya ulusekelo; naghogha ing'ombe ni ngwata inyine. Vyosi vyayaniziwa. Mwizaghe kulusekelo ulwa sendwa iyi.’ 5Loli abantu babo bakavisulannya bulo nukubuka ku mbombo zyabo; yumo akabuka ku mughunda wache, uyunji akabuka pakughulizya, 6abanji bakabalema abambombo bala, bakabakoma nukubaghogha. 7U mwene yula akakalala nkani, po akatuma abasilikali bache abankondo pakughogha abaghoghi bala nukocha akaya kabo. 8Po akabitizya abambombo bache nukubabuzya ukuti, ‘Ulusekelo lwane ulwa sendwa lwayaniziwa, loli abantu babo inkabitizya batakabaghila. 9Losi ulu bukagha munkomano izya misebo nukwitizya abantu bosi babo mungabagha ukuti bize ku lusekelo ulu.’ 10Po abambombo bakabuka mu misebo nukwitizya abantu bosi babo bakabagha, abiza na babibi bulo; inyumba yiyo bakapangilaghamo ulusekelo yikizula na bantu.
11“U mwene akinjila munyumba mula pakwennya abantu babo akabitizya nukumwennya umuntu yuyo atakavwala amenda agha sendwa. 12U mwene akamulalusya akati, ‘Wee mumanyani, winjiye buli-buli umu ukusita ukuvwala amenda agha sendwa?’ Loli umuntu yula atakanenapo nachimochimo. 13#Mat. 8.12, 25.30; Luk. 13.28Po u mwene akababuzya abambombo akati, ‘Mumupinye inyobe ni vinama nukumusumbila kuzi muchisi, kuko akwiza pakulilagha nu kusyeketula amino ghache.’ ”
14Po u Yesu akati, “Pakuti binji babo bakwitiziwa, loli banandi babo bakusaliwa.”
Bakumulalusya u Yesu nizya kusonka umusonko
(Mlko. 12.13-17; Luk. 20.20-26)
15Aba Falisayi bakabuka nukwivwana mumo bangamuteghela u Yesu pakumulalusya. 16Po bakatuma kwa Yesu abamanyili babo bamo poka na bantu bamo aba mukabukatila aka Helodi. Bakati, “Wee Mumanyisi, tuzimenye ukuti ukunena ubwanaloli. Ukumanyizya izila iya Chala pakasi pa bantu ukuyana nu bwanaloli, ukusita ukunyila inyinong'ono izya bantu pakuti utakwennya icheni icha muntu. 17Tubuzye, nkimba ukwinong'ona ichoni? Nkimba Indaghilo zyitu zikutwitikizya pakusonka umusonko kwa Kesale pamo awe?”
18Loli u Yesu akazimanya zizyo bakalondagha pakubomba po akati, “Mwe bazimbuli mwee! Nkimba choni chicho mukuyezya pakuntegha? 19Ndanjizye isalabazya iyakusonkela umusonko!”
Bakamupa isalabazya yoka, 20po akabalalusya akati, “Nkimba icheni ni tabwa vivyo vili apa vya wenu?”
21Bakamwamula bakati, “Vya Kesale.”
Po u Yesu akati, “Ivya Kesale mumupe u Kesale; ivya Chala mumupe u Chala.”
22Bo abantu bivwa zinizi, bakaswigha nkani, po bakamuleka nukubuka.
Bakumulalusya u Yesu nizya kuzyuka kubufwe
(Mlko. 12.18-27; Luk. 20.27-40)
23 # Imbo. 23.8 Pisiku lilalila aba Sadukayi bamo babo bakatinji abantu bate bakazyuke kubufwe bakiza kwa Yesu 24#Ukk. 25.5nukuti, “Wee Mumanyisi, u Mozesi akati, ‘Nanti umwanavuli afwa umusita bana, uwamwabo amupyane umufwilwe yula umwakuti apape nawe abana, babo bakwiza pakubasenda ngati bo bana aba muyazi yula.’ 25Kukabako abawamwabo seveni babo bakikalagha kuno. Usongo akasenda nukufwa umusita bana, po uwamwabo akapyana umufwilwe yula. 26Ichi chikabombiwa bunubu ku wabubili, naku wabutatu, mupaka bosi seveni bala. 27Pabumalilo, umukolo wepe akafwa. 28Pisiku ilyakuzyuka kubufwe, nkimba umukolo yula akwiza pakuba muchi uwa wenu pakuti bosi seveni bala bakamusendapo?”
29U Yesu akabamula akati, “Mukupuvya nkani pakuti mutaghamenye Amasimbo pamo amaka agha Chala. 30Pakuti bo abantu abafwe bazyuka, kute kukabeko isendwa pakuti bosi bakwiza pakuyana bulo na bantumi kumwanya. 31Loli nizya kuzyuka kwa bantu abafwe, nkimba mutabelengitepo nalumolumo zizyo u Chala akababuzya? Akati, 32#Ukf. 3.6‘Ane ne Chala uwa Abulahamu, u Chala uwa Yisaki nu Chala uwa Yakobo.’ We Chala uwa bantu abumi, ate uwa bantu abafwe.”
33Bo abantu abinji bivwa zinizi, bakaswigha nkani nu bumanyisi bwache.
Ilamulo ikulu nkani
(Mlko. 12.28-34; Luk. 10.25-28)
34Bo aba Falisayi bivwa ukuti u Yesu abapota aba Sadukayi, bakabungana poka, 35#Luk. 10.25-28po weka mumwabo, umumanyisi uwa Ndaghilo, akayezya pakumutegha pakumulalusya. 36Akamulalusya akati, “Wee Mumanyisi, nkimba lilamulo lyoni lilyo likulu nkani ukuchila Indaghilo zyosi?”
37 # Ukk. 6.5 U Yesu akamula akati, “Umughanaye u Mwene u Chala wako, nu moyo wako ghosi, nu muzimu wako ghosi, ni nyinong'ono zyako zyosi. 38Ili lyo lilamulo ikulu nkani ukuchila ghosi. 39#Lev. 19.18Ilyabubili ikulu lyo ili, umughanaye umupalamani wako ukuyana na mumo wiyighaniye wemwenecho. 40Indaghilo zyosi izya Mozesi ni vimanyisyo ivya balaghuzi vyimite pamalamulo mabili agha.”
Nizya Kilisitu u Mwana uwa Devedi
(Mlko. 12.35-37; Luk. 20.41-44)
41Bo aba Falisayi babunganite poka, u Yesu akabalalusya akati, 42“Nkimba mukwinong'ona ichoni nizya Kilisitu? Nkimba amwe mukuti waluko loni?”
Bakamula bakati, “Waluko ulwa Devedi.”
43U Yesu akalalusya akati, “Nkimba choni chicho u Muzimu Umuzelu akinjila mwa Devedi ukuti amwitizye ukuti Mwene? U Devedi akati,
44 # Mas. 110.1 ‘U Mwene akamubuzya u Mwene wane akati,
Ikala apa kunyobe yane indilo
mupaka imbabike abalwani bako
kusi kunyayo zyako.’
45“Nanti u Devedi umwenecho akamwitizya ukuti Mwene, po u Kilisitu angaba buli-buli uwaluko ulwa Devedi?”
46Nayumo umuntu yuyo akamwamula u Yesu, sona ukwandila pisiku lilalila nayumo umuntu uwakujimba umoyo pakumulalusya sona.

Currently Selected:

Matayi 22: LMBNT2016

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy