YouVersion Logo
Search Icon

Matayi 13

13
Ichili icha mupesambeyu
(Mlko. 4.1-9; Luk. 8.4-8)
1Pisiku lilalila u Yesu akepapo panyumba yila nukubuka pakwikala pasi mulubazu ulwa nyanja. 2#Luk. 5.1-3Abantu babo bakamuzyungulila bakaba binji nkani, umwakuti akinjila mubwato nukwikala mulamula, bo abantu bimiliye mulubazu ulwa nyanja. 3Akababuzya ivintu ivyinji muvyili akati, “Kukabako umuntu yumo yuyo akabuka pakupesa imbeyu mumughunda wache. 4Bo ali pakupesa, imbeyu zimo zikawila muzila, po iviyuni vikiza nukuzizompola. 5Zimo zikawila pilyalabwe pakuti pakaba itope linandi. Umwalubilolubilo imbeyu zila zikamela pakuti patakabapo itope ilyinji. 6Loli bo izuba lyakwela, imbeyu zila zikababuka pakuti amagululuzi ghakaba ghachili ghatayiye nkani pasi, sona imbeyu zila zikuma. 7Imbeyu zimo zikawila pakasi pamivwa, ghagho ghakakula nukufyululusya imbeyu zila. 8Loli imbeyu zimo zikawila pitope ilyiza, po imbeyu zikela ivikomwa, zimo zikela ivikomwa 100, zimo 60, izinji 30.” 9U Yesu akati, “Yuyo ali na makutu aghakwivwila, ivwe!”
Ifundo iya vyili
(Mlko. 4.10-12; Luk. 8.9-10)
10Pisinda pache abamanyili bala bakamulalusya u Yesu bakuti, “Nkimba choni chicho ukubombezya ivyili nanti ukunena na bantu?”
11U Yesu akamula akati, “U Chala abavumbulila vivyo vifisiwe ivya Bumwene ubwa Kumwanya, loli abantu bosi abanji, awe. 12#Mat. 25.29; Mlko. 4.25; Luk. 8.18, 19.26Pakuti umuntu yuyo ali nako kale kamo, akwiza pakumonjelezyapo ivyinji, ukuti abanje navyo ivyinji ukuchila. Loli umuntu yuyo ate nako kamo akwiza pakufyuliwa na kanandi bulo kako ali nako kale. 13Ifundo yiyo nkubombezya ivyili, bo nkunena na bantu yakuti, bakwennya loli batakwennya kamo, bakuteghelezya loli batakwivwa pamo ukuvwisya. 14#Yes. 6.9-10Amazyu agha mulaghuzi u Yesaya ghakwanilisiwe kukwabo ukuti,
‘Abantu banaba naloli bakwiza pakwivwa,
loli bate bakivwisye.
Bakwiza pakwennya,
loli bate bakennye nakamokamo.
15Pakuti amoyo ghabo makafu nkani,
sona basindiye amakutu ghabo,
basizilite amaso ghabo.
Pakuti ngali amaso ghabo ghakwennya,
amakutu ghabo ngali ghakwivwa
ni nyinong'ono zyabo ngali zikwivwisya.
Po ngali bapindukila kukwane, u Chala akunena,
ngali imbapozizye.’
16 # Luk. 10.23-24 “Loli mwe basayiwa pakuti amaso ghinyu ghakwennya, sona amakutu ghinyu ghakwivwa. 17Naloli inkubabuzya ukuti abalaghuzi abinji na bantu abinji aba Chala bakalondagha nkani pakwennya zizyo mukwennya, loli batakazyennya. Bakalongagha nkani pakwivwa zizyo mukwivwa, loli batakazyivwa.”
U Yesu akulingannya ichili icha mupesambeyu
(Mlko. 4.13-20; Luk. 8.11-15)
18“Polelo ivwa kuno nukumanyila ukuti ichili icha mupesambeyu chikung'anamula ichoni. 19Abantu babo bakwivwa amazyu ghagho ghakunena nizya Bumwene ubwa Kumwanya loli batakwivwisya bayanite bulo ni mbeyu zizyo zikawila muzila. Umubibi yula akwiza nukuzompola vivyo vikapesiwa mumoyo ghabo. 20Imbeyu zizyo zikawila pilyalabwe, zikwimilila babo bakupokela amazyu nu buhobosu pakabalilo kako baghivwila. 21Loli ghatakwinjila nkani mumwabo, sona ghatakwikala akabalilo akatali. Po nanti intamyo pamo ukuvwimiwa kwafika pachifukwa icha mazyu, bakuwa umwalubilolubilo. 22Imbeyu zizyo zikawila pakasi pamivwa zikwimilila abantu babo bakwivwa amazyu agha Chala. Loli ukwikolezannya nivya bumi ubu, ukuchighana ichuma vikufyululusya amazyu ghala, po batakupa ivikomwa. 23Imbeyu zizyo zikapesiwa mwitope ilyiza zikwimilila abantu babo bakwivwa amazyu nukughivwisya: Bakupa ivikomwa, bamo 100, abanji 60, sona bamo 30.”
Ichili icha ndezye
24U Yesu akababuzya ichili ichinji akati, “Ubumwene ubwa Kumwanya buyanite bulo nu muntu yuyo akapesa imbeyu inyiza mumughunda wache. 25Ubusiku bumo, bo umuntu wesi aghonite, umulwani akiza nukupesa indezye mu ngano nukwepapo. 26Bo imbeyu zyakula nukwanda pakufuma utumitu, po zyope ni ndezye zikaboneka. 27Abambombo aba muntu yula bakiza nukumubuzya ukuti, ‘Wee Mwene, imbeyu zizyo ukapesa mumughunda mula zikaba nyiza. Nkimba indezye zyafuma kwiyi?’ 28Akamula akati, ‘Akaba mulwani yumo yuyo akabomba zinizi.’ Bakamulalusya bakati, ‘Nkimba ukulonda ukuti tubuke pakunyunkulamo indezye?’ 29Akamula akati, ‘Awe, pachifukwa chakuti bo mukunyunkula indezye munganyunkulila poka ni ngano. 30Yileke ingano ni ndezye vikulile poka mupaka pakabalilo akakwinulila. Po inkwiza pakubabuzya abinuli ukuti banyunkule tasi indezye nukuzipinya munkose nukuzyocha. Pisinda pache babungannye ingano nukubika muntamba yane.’ ”
Ichili icha mbeyu iya muzimwa
(Mlko. 4.30-32; Luk. 13.18-19)
31U Yesu akababuzya ichili ichinji akati, “Ubumwene ubwa Kumwanya buyanite bulo nu muntu yuyo akusenda imbeyu iya muzimwa nukuyipesa mumughunda wache. 32Kambeyu akanandi nkani patumbeyu tosi, loli nanti kakula kakuba kakulu nkani ukuchila imbeyu zyosi, umwakuti utuyuni tukwiza nukulukamo ivivumbo vyabo musamba zyache.”
Ichili icha chilungo
(Luk. 13.20-21)
33U Yesu akababuzya sona ichili ichinji akati, “Ubumwene ubwa Kumwanya buyanite bulo nu mukolo yuyo akusenda ichilungo nukongannya ni ndobo zibili izya busu mupaka ichinyenya chosi chikatutumuka.”
U Yesu akubombezya ivyili pakubamanyizya abantu
(Mlko. 4.33-34)
34U Yesu akabombezya ivyili vyosi vinivi pakunena na bantu bala. Atakanenaghapo nachimochimo pakusita ukubombezya ichili. 35#Mas. 78.2Akabomba zinizi pakukwanilisya zizyo umulaghuzi akalaghula ukuti,
“Nkwiza pakunenela muvyili, bo nkunena nabo.
Inkwiza pakubabuzya ivintu vivyo batavimenyepo nalumolumo
ukwandila pakabalilo kako ichisu chapasi chikapeliwa.”
U Yesu akulingannya ichili icha ndezye
36Po u Yesu akepapo pachilundilo icha bantu chila nukwinjila munyumba. Abamanyili bache bakiza nukumulaba ukuti, “Tubuzye, nkimba ichili icha ndezye mumughunda chikung'anamula ichoni.”
37U Yesu akamula akati, “Umuntu yuyo akapesa imbeyu inyiza Mwana uwa Muntu; 38umughunda cho chisu ichapasi, imbeyu inyiza bo bantu aba mu Bumwene, indezye bo bantu aba Mubibi yula; 39umulwani yuyo akapesa indezye we Satana. Inyinulo bo bumalilo ubwa chisu ichapasi, sona abinuli bala bo bantumi. 40Indezye zikunyunkuliwa nukochiwa pamoto, umwakuyana bulo, umu mo mumo kukwiza pakubela pabumalilo ubwa chisu ichapasi. 41U Mwana uwa Muntu akwiza pakutuma abantumi bache ukwefya abantu bosi mu Bumwene bwache, babo bakupuvya abantu na babo bakubomba ivibibi. 42Bakwiza pakusumbiwa pamoto, mumo bakwiza pakulila nu kusyeketula amino ghabo. 43Po abantu aba Chala bakwiza pakulama ngati lyo lizuba mu Bumwene ubwa Tata wabo. Yuyo ali na makutu aghakwivwila, ivwe!
Ichili icha bukabi bubo bufisiwe
44“Ubumwene ubwa Kumwanya buyanite bulo nu bukabi bubo bufisiwe mumughunda, bubo umuntu akabwagha nukubufisa sona, po mubuhobosu bwache akubuka nukughulizya vyosi vivyo ali navyo, akunyokela nukughula umughunda ghulaghula.
Ichili icha bwambo ubwamutengo
45“Ubumwene ubwa Kumwanya buyanite sona nu muntu yuyo akulonda ubwambo ubwamutengo. 46Bo abwagha boka ubwamutengo, akabuka nukughulizya vyosi vivyo akaba navyo nukughula ubwambo bula.
Ichili icha chilepa
47“Sona, Ubumwene ubwa Kumwanya buyanite bulo na balobaswi babo bakusumbila ichilepa chabo munyanja nukuloba iswi izyakulekanalekana. 48Bo ichilepa chizula, bakuchiwesela kulubazu ulwa nyanja, bakwikala pasi nukugaba iswi: Iswi inyiza bakuzibika muchizanga, loli imbibi bakuzisumba. 49Momumo kukwiza pakubela pabumalilo ubwa chisu ichapasi: Abantumi bakwiza pakubuka pakwefya abantu ababibi pakasi pa bantu abiza, 50nukubasumbila ababibi pamoto, mumo bakwiza pakulila nu kusyeketula amino ghabo.”
Ivimanyisyo ivipya ni vyakale
51U Yesu akabalalusya akati, “Nkimba mukwivwisya ivintu vyosi ivi?”
Bakamula bakati, “Ee.”
52Po akabamula akati, “Ichi chikung'anamula ukuti umumanyisi wesi uwa Ndaghilo yuyo akuba mumanyili mu Bumwene ubwa Kumwanya ayanite bulo nu mwenecho uwa nyumba, yuyo akuvyefyamo ivintu ivipya ni vikali muchipinda chache ichakusungilamo ivintu.”
U Yesu bakumukana mu Nazaleti
(Mlko. 6.1-6; Luk. 4.16-30)
53Bo u Yesu amala pakubabuzya ivyili vinivi, akepapo pabuzilo bula. 54Akabwela nukwanda pakumanyizya munyumba izyakwiputilamo, po abantu babo bakamwivwa bakaswigha nukulalusya ukuti, “Nkimba amahala na maka aghakubombela ivintu vinivi akaghagha kwiyi? 55Nkimba yunuyu ate mwana uwa mupalamatabwa? Nkimba unyina ate we Maliya? Nkimba ate we wamwabo uwa Yakobo, u Yosefu, u Simoni nu Yudasi? 56Nkimba abayemba bache batakwikala naswe kuno? Akavyagha kwiyi vyosi vinivi?” 57#Yoh. 4.44Po bakamukana.
U Yesu akababuzya akati, “Umulaghuzi akuchindikiwa kosi na kosi, loli kwene kukaya kache, sona bantu aba munyumba yache.” 58Atakabombako ivyika ivyinji pakuti batakaba nu lwitiko.

Currently Selected:

Matayi 13: LMBNT2016

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy