YouVersion Logo
Search Icon

HAOKAPHOK 49

49
Jacobwui Khanaowa Tui
1Chiwui thili Jacobna anaomayarabingli hokhuida hānga, “Rākazipserlu, naoda nathumli khi shokrakhala kaji ina hāngka;
2“O Jacobwui naomayarabing,
rānganākhuiserlu,
kala navā Israelwui kahāng shākhuilu.
3Reuben, na iwui naochizaina,
iwui pangshapna,
khayāla pangshapla khaleiya kala I yang kālakhawui matheikhare atheina.
4Tara̱ thāda marungkhung makaji,
nawui akhar mavaimara,
kaja nana navāwui petli kāda;
nana pet chi sākhamānga —
nana iwui petli kai!
5Simeon eina Leviva chinaonina;
ngashao khavai khutlai aniwui raighaina.
6O imanglā, aniwui channgazekli mazangalu;
O iwui ning; anili mangayuralu;
kaja malungkhavāt tharan anina mi shaothata,
kala zeingarui shida seiphei shātteka.
7Aniwui malungkhavātwui sākashi,
malung kathuiwui zakkashi, khonkashi ngasāranu;
ina anili Jacobwui shimkhurli ngayaryāngmihaora,
kala Israelwui shimkhurli chaiyāngmihaora.
8Judah, nachinā ngarāna nali sora;
kala yangkashebingli napāng eina athumwui akahung shimetra;
navāwui naobingna nali khorumra.
9 # Mis 24.9; Phon 5.5. Judah, kazingkha̱ naona,
sāshaiwui eina nana thuihaira.
Ana hamzanga, kazingkha̱ avā thāda pamzanga,
kazingkha̱ ava̱ thāda, ali khipāna mathotlengrakhala?
10Wungnao khānthing Judahwui eina mathuimara,
lah khamungawui khāmshui apheiwui eina mathuimara,
singkhangaye chi marāranglakha;
kala mibingna ali khayāshira.
11Drakhātheirongli awui siguinao hokhai,
mathāmeikap kaje drakhātheirongli gadhānao hokhai,
awui kashankachon zamli ngasa̱ra,
kala awui phahon drakhārathei ashee eina ngasa̱ra;
12drakhāra̱na amik hungra,
seina̱na ahā charra.
13Zebulunna shamadrupheili pānra;
jahas ngasām khavai pam ngasāra;
kala Sidon vāshungda awui thari sāra.
14Issachar kapanga gadhāna,
yaoshang khaniwui ngachaili ngakhorpama;
15ana ngasām khavai pam mathai da thei,
kala lam chi ringkaphāna da thei;
chieina ana yāng chishotta,
ana miwui raonao sāda thoukai phunga.
16Israelwui shang akha sāda,
Danna awui mibingli bichar sāra.
17Danna shongfa kachida,
apong kachida phara̱ thāda sāra,
sigui pheili makeida katongapali khanukshong pitā ngasakra.
18Ina nawui ngatangkhami hondalei, O Proho.
19Khangaponbingna Gadli ngaponra,
kha ana athumli kharomra.
20Asherwui kashakazā mavatlakmara,
kala wungnaowui kashakazā ana vaira.
21Naphtali chipen kahai chao anao khamathā pharākakhui kathāna.
22Joseph, athei tarākha khamathei aphāngna,
luiradungli khamathei thingphāngna;
awui aphāng phākholi ngareikai.
23Malā kasingabingna sāshilak eina ali ngararda,
ali thaiya, kala sipsālak eina chotngasaka;
24thālala awui malā mangatha̱lakmana,
pāngthei thāngthaprap Jacobwui Sashap-vāshapa china
(Israelwui Lunghār, Yaokahoma ming china) sāmihaira,
25nali ngachonmiki kaji navāwui Varena;
Sāshapa Vare nali ngachonmiki kaje china,
atungshongwui sokhami,
kathukalungli khaleiya sokhami tara̱ kathā,
mathik eina naopamwui sokhame china nali somira.
26Katang makhavai kaphungwui sokhamile,
katang makhavai phungrābingwui makhavātali;
navāwui sokhamina mataimeikhara;
chi achinā ngarāwui eina ngateithui kahaiya Josephwui kuitungli leimichingranu.
27Benjamin thailak kahaiya ramfana,
ngathorshong ashailaga,
ngazin ngayar khaunga china.”
28Saikora hi Israelwui shang tharāda khani china; kala avāva̱na athumli mikharān sokhami milaga kahāng chi hina.
Jacob Kathi kala Kachifa
29Chiwui thili ana athumli kasatta hānga, “Ara ishawo ishayiwuili vākhavai Hitpa Ephronwui luiwukwui ngalungkhur chili ishāvā ngarāli ngasoda chifalu, 30kaja Mach-pelahli khalei Mamrewui zimikshoshong Canaan ngaleili Abrahamna lui eina ngasoda chikhur sākhavai Ephronli lokakhui akhur chili chizanlu. 31Apam chili athumna Abraham eina apreiva̱ Sarahli chifaya; Isaac eina apreiva̱ Rebekah chifaya; kala chili ina Leahli chifaya— 32lam eina lungkhur chi Hitnaowui eina lokakhuina.” 33Jacobna naomayarabingli kasatmi kahaiwui thili ana aphei pettungli khāngkai, kala khanaowa khaksui suilaga, awui awo-ayibingli vāhaowa.

Currently Selected:

HAOKAPHOK 49: TANGBSI

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy