HAOKAPHOK 43
43
Benjaminli Ngasoda Egyptli Latkhavā
1Chitharān ngalei chili zāt sakkachangkhathaowa. 2Kala athumna Egyptwui eina khuikhaung kashakazā chi zāngakān kahai tharān, avāva̱na athumli hānga, “Ithumwui vang kashakazā valokhuiluilu.” 3Kha Judahna ali hānga, “Mi chipana ithumli saklak eina hāngkazazakhaidalei, kaja ‘Nagato makhuiraakha nathum ili masamphangpaimara’ jihaira. 4Nana ithumli agato zanglaga chihovākha ithumna vāda nawui vang kashakazā alomika; 5kha nana ali machihoakha ithum mavāmara, kaja mi chipana ithumli hānga, ‘Nagato makhuiraakha nathum ili masamphangpaimara.’” 6Israelna hānga, “Nathumna khisāda ili khanang khavai, nachinā akha lei da hāngkhala?” 7Athumna ngahānkai, “Mi chipana ithum kala athei-asāwui ponglila munlak eina ngahānda hānga, ‘Navā aruila ringda leila? Nachinā khangatei maleilui?’ Ana khangahān chili ithumna ngahānkakāna, ana ‘Nagato khuitālu’ da hāngra da ithum theisāla?” 8Judahna avāva̱ Israelli hānga, “Nao chi ili ngasoda chiholu, nala ithumla, kateobingla mathila ringkhavai ithum zatuka. 9Ina awui vang nganingra, awui vang ili tānlu. Ina ali khuiungluida napāngli masangmiakha chiwui khayon chi ina phungchingra; 10kaja ithumna mahuinganongsi kaja khanishida vālaga latunghairara.”
11Chieina athumwui avāva̱ Israelna hānga, “Chithaphalungra jiakha hithāda sālu; ngalei hiwui mathāmeikap kaji atheiyur; balm kateokha kala khuira̱ teomeikha, gum, myrrh, kala pistachio athā kala almond, nathumwui khaoli khuiphunglaga mipa chili lemmet sāda, khuitāmilu. 12Pheisāla mataida khuiphunglu; nathumwui khaoli sangmihaikasā pheisā chila khuivāluishitlu; hi yangngui kahailapai. 13Nagatolila thānphunglu, ngakarthuida mi chipali valuishitlu; 14pangshapa Varena nathumli mi chipawui mangāli lukhamashan chitheimida nagato akhapa eina Benjaminli shiunluiranu. Inaongarāwui vang ili wukkhananglu jilala khananghaorali.” 15Chieina athumna lemmet mikhavai ot chi khuiphunga, kala athumna pheisāla chungmeida khuiphungda Benjaminli thānphunga; kala athumna Egypt tākashung eina Josephwui mangāli anganinga. 16Josephna Benjamin athumli ngasokazat kathei tharān, ana awui shim kashina chili hānga, “Mibing chi shimlungli hozanglu, kala sā taithatta khangarān sālu, kaja ngashunshong mibing chi ili zāngarumra.” 17Josephna sālu kaji chi mipa china sai, kala mibing chi Josephwui shimli khuizanga. 18Josephwui shimli khuizanghaoda mibing chi ngacheehaowa, kala athum hāngngaroka, “Hi kharethang ithumwui khaoli pheisā sangmihaikasā chiwui vang shimlungli khuikazangna, chieina ana ithumwui khayon phākhuida awui raonao sāngasak khavai, kala ithumwui gadhābing hi khuikhavai kasāna.” 19Chiwui vang eina athumna Josephwui kashina chili vāda khāmongpheili angazekta, 20hānga, “Oh, amei, kashakazā lokhavai ithum kharethang hili rai; 21kala ithumna pikhavaipamli ithumwui khao pheikhayang tharān ithum kachiva̱wui pheisā horzakta khaoli zangsai; chiwui vang ithumna pheisā chi khuirālui kajina, 22kala kashakazā lokhavai pheisā khangateila pāngli singphungdalei. Ithumwui khaoli pheisā chi khipāna sangmikhala ithum matheimana.” 23Ana ngahānkai, “Chingri ngasāmkhuilu, mangacheelu; nathum kala navāwui Varena lan chi nathumwui khaoli sangmi kahaira; nathumwui pheisā chi ina samphanghaira.” chiwui thili ana Simeonli thānshokmi. 24Kala mipa china athumli Josephwui shimli thānzangda tara̱ khuimida athumna phei pheokhui, kala ana athumwui gadhābingli seizat khuimi kahai thili, 25ngashunshong Josephna khaung tharan, miki kaji ot chi mikhavai khangarān sai, kaja athum chili phazāngarumra da shāhaowa. 26Josephna shimli hankhaung tharān, athumna khuikaphung ot chi awui shimli khuizanga, kala ngaleili ngakhumsangda khayākashi mia. 27Ana athumwui kashok-kazang ngathingda ngahāna, “Nathumna kahāng navā kasara chi ringphāda leila? A ringchingda leila?” 28Athumna ngahānkai, “Narao ishāvā ringda lei kala ringphāda lei.” Chieina athumna kui mashunda ali khayākashi chithei. 29Kala ana kapeikakā eina avāva̱wui nao agato Benjaminli theida hānga, “Hi nathumna ili kahāng nathumwui agato paisho chila? Varena nali lumashanmiranu inaomayara!” 30Josephna samphangngailakkasā agato chili kathei eina chapngaihaoda totot thuihaowa, kala awui kāli zangda chapa. 31Chiwui thili ana mai ngatāphailaga; akhalatta khalem khuilaga shokhānga, “Kashakazā khuirālu.” 32Awui vang ngateida khuimi; athumwui vang ngateida khuimi, kala ali phazākharuma Egyptnaobingwui vang ngateida khuimi, kaja Egyptnaobingna Hebrewnaoli ngarumda maphazāpaimana, kaja athumwui vang jat tālaka. 33Awui mangāli khararana kharar athishurda, paishona khanganui athishurda pama; kala mibing china akha eina akha matakhak eina yangngaroka. 34Josephwui table eina athumli sangmi, Benjaminwuiva khangateiwuili sharuk phangā shida mataida sangmi. Chithāda athumna ali lumlaolak eina phāshak phazāngaruma.
Currently Selected:
HAOKAPHOK 43: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.