HAOKAPHOK 40
40
Josephna Mang Kakhalat
1Atam khaleilaga Egypt awungawui pong singme eina khamui kasemana aniwui akhavā Egyptwui awungali khayon ot sathathuihaowa. 2Chiwui vang Pharaohna pong singme akhoka eina khamui kasema akhoka khani chili malungvāthaoda, 3phātop kashina kathānawui pāngli horsangmida ana anili Josephli narhaikasa phatop chili sanghaowa. 4Phātop kashina china anili Josephwui pāngli horsangmi, kala ana anili mayonpama, narkhavai pam chili athum kasha̱kha pamrumsai. 5Thangngayākha ani khani—Egypt awungawui pong kasinga eina khamui kasema, phatopli khaleia khanina mang shimanripa — mang chi ngatateia, kakhalatla ngatateia. 6Ngathorshong Josephna anili akhayang tharān ani wuk khanangda khalei ana thei. 7Chieina ana anili ngahāna, “Kathahaoda nani aja ningngai mamathālakla khaleikhala?” 8Anina ali hānga, “Inili mang shimana, kha chi khalatmi khavai khipākha maleimana.” Josephna anili hānga, “Khalatkhami hi Varewui maningmala? Ili kahāngmilu.”
9Chieina pong singme china Josephli awui mang chi hānga, “Mangshong iwui mangāli drakhārong akha leisai, 10kala arong chili aphāng kathum leisai; ashon shokkhaleoda awon wona kala amazānbing chi athei matheida minhaowa. 11Pharaohwui tengkot ipangli singsai; kala ina drakhāthei chi khuilaga Pharaohwui tengkot chili sursangda tengkot chi Pharaohwui pāngli misai.” 12Chieina Josephna ali hānga, “Chiwui kakhalat chi hina: aphāng kathum chi zimiksho kathumthangna; 13kathumthangwui alungli Pharaohna nali khuishokta nawui otpamli hanmiluira; kala nana tengkot singmikasā thāda tengkot chi Pharaohwui pāngli sangmiluira. 14Kha nawui ot saikora ungshung kahaiwui thili ili phaningungmilu, ina nali kapona, ili lumashanmida Pharaohli iwui maram kahāngmilu, kala shim hiwui eina ili khuishok ngasakmilu. 15Kaja ili Hebrewbingwui ngalei eina ngathumda khuithui kahaina; kala hilila ina khikha khayon masālakla athumna ili phātopli masangngayimana.”
16Khalatkhami chi khamui kasema akhoka china mayāngaihaoda Josephli hānga, “Ila mang akha shimana: iwui kuitungli khamui luk kathum tongzatsai, 17kala atungmeikap kaji lukli Pharaohwui vang khamui ayur kachungkha zangsai, kha vānaobingna khamui chi ikuitung eina ratākshaisai.” 18Chieina Josephna ngahānkai, “Chiwui kakhalat chi hina: luk kathum chi zimiksho kathumthangna; 19kathumthangwui alungli nali khuishokta Pharaohna nakui rangda naphasā thingli hokthānghaora; kala vānaobingna nawui asā shaira.”
20Kakathumathang, Pharaohwui kapharā zimiksho ngasāhaoda, ana awui raobingwui vang zātkhān sāmi, kala tengkot singkhamiwui akhavā eina khamui kasemawui akhavā chili khuishoka. 21Tengkot singmeli awui otpamli sangluishita, kala awui pāng eina tengkot chi Pharaohwui pāngli mi; 22kha Josephna athumli khalatkhami tākam eina khamui kasemali hokthāngthathaowa. 23Chithālala tengkot singme china Josephli maphaningungla malaihaowa.
Currently Selected:
HAOKAPHOK 40: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.