HAOKAPHOK 35
35
Varena Jacobli Bethel Apamli Sokhami
1 #
Hao 28.11-17. Varena Jacobli hānga, “Ngakarthuida Bethelli shangda chili apamulu; kala nana nashamei Esauwui eina yāmzatlakha nali rākachithei Vare chili hanphut akha sālu.” 2Chiwui vang Jacobna awui shimkhur kala ali khangasobing saikorali hānga, “Nathumwui alungli khalei ayar mibingwui varebing horserhaolu, kala nathum khalatta tharmathengda kashankachon shinhaolu; 3chiwui thili ithumna Bethelli shangda ina chotchānglakha ili ngahānkākhame, kala iwui kazazatli ngasokhame Vare chili ina hanphut akha sāra.” 4Chieina athumwui pāngli khalei varebing kala khanāli sinā-unra̱ ngathetkasā saikora Jacobli mihaowa kala Jacobna Shechem nganaili khalei shirimthingpheili thumhaowa.
5Athumna zatmamānlakha, athumli kuimareida khalei keinungbingwuitungli Varewui eina khangachee akha tāshunghaowa, chiwui vang Jacobwui naomayara ngarāli mangahomthuwa. 6Kala Jacobla ashi katonga Canaanli khalei Luzli (chiya Bethel) vāshunga, 7chili ana hanphut akha sāda apam chili El-Bethel hoi, kaja ashameiwui eina ana yāmzatlakha chili Varena rāchithei. 8Rebekahwui nurse Deborah apam chili thihaowa, kala Bethelwui azingshong shirimthing akhawui azingli chifahaowa; chiwui vang apam chili Allon-bacuth hoi.
9Paddan-aramwui eina khaung tharān Varena Jacobli rāsamphangluishita, kala somi. 10#Hao 32.28. Varena ali hānga, “Nawui ming Jacobna, kha ara Jacob maholuimara, kha Israel hi nawui ming sāra” chiwui vang awui aming Israel hoi. 11#Hao 17.4-8. Kala Varena ali hānga, “I Pangshapa Varena; athei matheida mataisanglu; yur kahaka, mi ashangva̱ nawui eina shokra, kala awungabing nawui eina shokra. 12Abraham eina Isaacli khami ram chi ina nali mira, kala nawui thili ram chi nawui ara̱-azāli ina mira.” 13Chiwui thili ali ngazek khavai pam chiwui eina Varena kāhaowa. 14#Hao 28.18-19. Chān ngazek khavai pam chili Jacobna ngalung akha shunhaida ngalungtung chili ra̱shakla thaola heirora. 15Chiwui vang Vareli chan ngazek khavai apam chiwui aming Jacobna Bethel phokmi.
Rachel Kathi
16Chiwui thili athumna Bethelwui eina zatmamāna; athumna Ephrathli mavāshungnāla, katāda leilakha, Rachel nao ra̱haoda chotlakhaowa. 17Ana chotlak eina leilakha naosak kasingva̱ china hānga, “Mangangalu, na mayarnao akha pharāluira.” 18Ana thivānanai (kaja a thihaowa) ana nao chiwui aming Ben-oni phokmi; kha avāva̱na awui ming Benjamin hoi. 19Chithāda sāda Rachel thihaowa, kala ali Ephrathwui (chiya, Bethlehem) shongfali chifahaowa, 20kala Jacobna awui chikhurtungli pakra̱ akha shunhai; aja eina tangda khalei ngalung shunkahai chi Rachelwui chikhurna. 21Israelna zatvāmamānda Eder kānda apama.
22Israelna ram chili pamlakha Reubenna avāva̱wui angashirva Bilhahli ngasopihaowa; kala chi Israelna shāhaowa.
Jacobwui Naomayara ngarā
(1 Thot 2.1-2)
Jacobwui nao mayarnao tharāda khanina. 23Leahwui naomayarabing: Reuben (Jacobwui naochizai), Simeon, Levi, Judah, Issachar, kala Zebulun. 24Rachelwui naomayarabing: Joseph eina Benjamin. 25Rachelwui raopava̱ Bihahna kapharā: Dan eina Naphtali. 26Leahwui raopava̱ Zilpahna kapharā: Gad eina Asher. Hibing hi Paddan-aramli leilakha Jacobna pharākakhui naomayara ngarāna.
Isaac Kathi
27 #
Hao 13.18. Abraham eina Isaacna pamkasā Mamre lah Kiriath-arba (chiya, Hebron)li Jacobna avāva̱ Isaacli ungsamphanga. 28Hitharan Isaacwui kum shākha hangchishat kāhairasai. 29Kala Isaacna khanaowa khaksui ngachanghaowa; ana rarlak eina thi, kala awui awo-ayibingwuili vāhaowa; kala anaomayara Esau eina Jacobna ali chifahaowa.
Currently Selected:
HAOKAPHOK 35: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.