HAOKAPHOK 34
34
Dinahli Katukwui vang Athut Kakhui
1Leahna kapharā Jacobwui naongalāva̱ Dinahna ram chiwui sha̱naobingli yaothuivai; 2kala Hivpa Hamorwui naomayara Shechem, ram chiwui wungnao china Dinahli kathei eina shimenkhuida ngasopimihailaga maishi ngasaka. 3Jacobwui naongalāva̱ Dinahli ningchānghaowa; kala leishilakhaoda ana ngahuiri eina khararchān sai. 4Chiwui vang Shechemna avāva̱ Hamorli hānga, “Sha̱naopava̱ hi ipreiva̱ sākhavai khuimilu.” 5Jacobna anaongalāva̱ Dinahli sākhamāngmihaira kaji shāhaowa; kha anao mayara ngarāva seihomphungli awui sei hompamsāhaoda athum maungranglakha kasaikha pamsai. 6Kala Shechemwui avāva̱ Hamorna Jacobli ngazek khavai vai. 7Pao hi kashā eina Jacobwui naomayara ngarāna seihomphungwui eina unga; athum ning thurlakhaowa kala malungvātlakhaowa, kaja Jacobwui naongalāva̱li hikathā kasā hi Israelli kachipatna, hikathā otsak masārānmana. 8Kha Hamorna athumli hānga, “Inaomayara Shechemwui ning nanao ngalāva̱māngli leihaira; ina seiha kasāna, ali ngakum khavai mihaolu. 9Ithum ngalā ngakhotsa; nathumwui ngalānaobing ithumli milu, kala nathumla ithumwui ngalānaobing khuilu. 10Chithāda nathumna hili pamda, ngalei hila nathumli chikāra; ram hili pamda leih sālaga lan mathuisangkhuilu.” 11Shechemnala Dinahwui avāva̱ kala amei ngarāli hānga, “Ili nathumwui mikyanli khaleishimilu, kala nathumna kahahāng saikora ina sāmira. 12Manho mikhangayi nathumna kapo chiwui athishurda ina mira; ngalāva̱ hi ipreiva̱ sākhavai vangmāng ili khamilu.”
13Jacobwui naomayara ngarāna Shechem eina avāva̱li minamda ngahānkai, kaja athumwui azarva Dinahli yansaimihaowa. 14Athumna anili hānga, “Ahui marimkashokbingli ithumwui azarva khami hi masākapai otna, kaja hi ithum maishi khavaina. 15Apong himāngli ithumna mayāra: chiya, nathumla ithumwui thāda nathumwui mayarnao kachiva̱ ahui rimshokhaolu. 16Chiwui thili ithumwui nao ngalāva̱bing nathumli mira, kala nathumwui naongalāva̱ ngarāla ithumna khuira, ithumna nathumli panrumda ithum miyur akha sāra. 17Kha nathumna ithumli manganāmada ahui marimshokakha ishiwui naongalāva̱ khuiphungda thuihaora.”
18Athumwui tui china Hamor eina anaomayara Shechemli ningyāng ungngasakhaowa. 19Yaronpa china ahui rimkashok chi kapan maleila sāhaowa, kaja ana Jacobwui naongalāva̱li ningchangnahaowa. Chitharan nao hi ashi shimkhur saikorawui ngachaili khayākālak eina leisai. 20Chiwui vang Hamor eina anaomayara Shechemna keinung chiwui ngaveili unglaga keinungli khalei mibingli hānga, 21“Mibing hi ithumli ngahānngailakta lei; athumla ithumwui ramli pamda leih sāranu, kaja yanglu, ram chi athumwui vang shaptaira; ithum eina athum ngalā ngakhotsa. 22Miyur akha sāda pamrum khavai apong akhamāng eina athumna mayāra jihaira: chiya, athumna ahui rimkashok thāda ithumwui mayarnao kachiva̱la ahui rimshokphalungra. 23Athumwui sha̱kei, kala lan saikora ithumwui mangasāmarala? Chiwui vang eina athumna ithumli ngasopam khavai mayāhaosa.” 24Ngaveili khavā mi saikorana Hamor eina anaomayara Shechemwui kahāng mayāda chili khavā mayarnao saikora ahui rimshokhaowa.
25Kakathumathang athumna ningchotmahunglakha Jacobwui naomayara khani, Dinahwui amei Simeon eina Levina, aniwui raighai khuiphungda ngathumda keinungli zanglaga mayarnaobing saikora sāthatserhaowa. 26Anina Hamor eina anaomayara Shechemli raighai eina sāthathailaga ashi shimwui eina Dinahli khuiphungda thuihaowa. 27Kala Jacobwui naomayara ngarāna sāthat kahaitungli vāda keinung chi sakathānmiserhaowa; kaja azarva̱li yansaimihaowa; 28athumwui yao, sei, gadhā kala keinungli khalei, luili khalei saikora; 29athumwui lan, naoshinaola, preinaola shimli khalei saikora athumna ngaponthuihaowa.
30Chiwui vang Jacobna Simeon eina Levili hānga, “Nanina iwuitungli kakhanang mida ram hili khaleibing Canaannao kala Periznaobingna ili chamalā khavai nanina retsangmihaira; iwui mi kateokhamānga, athum kazipkhuilaga ili rākaiakha, ili sāshimānhaora, I kala iwui shimkhur khanini shimānhaora.” 31Kha athumna hānga, “Ana izarva̱li khayorsha̱nao thāngasakpaila?”
Currently Selected:
HAOKAPHOK 34: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.