HAOKAPHOK 32
32
Jacobna Esauli Samphang khavai Khangarān
1Jacobna zatmamānda leilakha Varewui kazingraobingna ali samphanga; 2kala Jacobna athumli kathei eina ana hānga; “Hi Varewui raimibingna!” Chiwui vang ana apam chiwui aming Mahanaim hoi.
3Kala Edom ngaleili khalei Seir kaho ram, ashāmei Esau khaleipamli Jacobna rida paomebing chihovai, 4kala athumli hithāda hānga, “Nathumna ishāmei Esauli hithada ahāngra: Nawui rao Jacobna hithāda hānga, ‘Ina Labanwuili aja rāshungda apam kahaina; 5kala ina mukkā, gadhā, sha̱kei, rao mayarnao sha̱nao kachungkha lei; nawui mikyanli lukhamashan samphang khavai ameili hi hāngkhavai ina kachihona.’”
6Paomebing china latungda Jacobli hānga, “Nashamei Esauli samphanga, ana nali samphang khavai mi shāmati ali ngasophungda rārāda lei.” 7Chieina Jacob ngacheelakhaowa kala wukkhananglakhaowa; kala ali ngasokazat mibing chi ana ngayarpakhaowa, awui sha̱kei kala utbing chi akhum khani sāda ngayarkhai; 8ana phaninga, “Esauna rālaga akhum akha hi shimān ngasakhailala, khangatei akhum akha hi taishokpaira.” 9Chieina Jacobna hānga, “O ishāvā Abrahamwui Vare, kala ishāvā Isaacwui Vare; O Proho ili, ‘Nawui ngalei kala theisāli hanunghaolu, ina kaphā sāmira’ da kahānga, 10nana narao ili hiyākha leikashi, mayonkhami hi iwui matik maningmana, ina khāmshui singlaga Jordan kānhaira, ara iwui khalalei katonga khum khani sāhaira. 11Ishamei Esauwui pāng eina ili huimilu da ina nali poli, kaja I ali ngacheeya, naoshinaobing kala preiva̱ ngarā ithum saikorali ana rālaga shaothathaipai. 12#Hao 22.17. Kha nana, ‘ina nali kaphā sāmira, kala nawui ara̱-azā mashānkharar shamadruwui situiyākha ngayāra’ da hānga.”
13Chieina chithang ngayā chili pisanga, kala ana khuikaphungwui eina ameiva̱ Esauli mikhavai khangarān sāda, 14me ava̱ shākhani, avā maga̱, yao ava̱ shākhani, yaovā maga̱, 15ut ana̱ kasur anao eina ngasoda thumra, seiva̱ hangmati eina mukkā tharā, gadhā ava̱ maga̱ eina avā tharā khuishoka. 16Hibing hi ana awui raobingwui pāngli sangmida hānga, “Iwui mangāli zatlu, kala asum asum eina mataklaga zatlu.” 17Rimeikapta kahomapa chili ana hāngchithei, “Ishamei Esauna nali rāsamkaphang tharan, ‘Khipāwui mikhala? Kali vanikhala? Hi khipāwui vangkhala?’ da ngahānakha, 18nana ‘Hi narao Jacobwuina; hibing hi ishāmei Esauli thada mikhavaina; kala ala ithumwui khanukli zatta lei’ da ngahānkālu.” 19Ana hi tākam eina kakhanelila, kakathumalila kala chiwui thili homkazatbing saikorali tamchitheida, “Nathumna Esauli samkaphang chitharān ngaraichāda hāngserra, 20kala, ‘Chili lāngda narao Jacobla khanukli zatta lei’ da hānglu.” Kaja ana phaninga, “Iwui mangāli ali miki kaji pāngrān china malung nemhaora, kala chiwui thili ali samphangnaora; hithāda ana ili mayāmira.” 21Chithāda miki kajibing chi awui mangāli thuingasakhaowa; kala a chithang ngayā chili pihaowa.
Jacobna Peniel Apamli Khangatuk
22Chithang ngayā ana ngakarthuida apreiva̱ khani, rao khani, kala awui nao tharāda akha khuiphungda Jabbok kong makānkai. 23Ana athumli thānvāda kong makānda shivāthaowa, kala awui khalalei katongala chihokāserhaowa. 24#Hos 12.3-4. Jacobmāng pamhaowa; kala kazing kathang eina tangda mi akhana ali rāngatuka. 25Mi china Jacobli mayuirarthura kaji theilaga ngatukmamānda Jacobwui shaksha̱ shimetshokmihaowa. 26Chieina mi china hānga, “Kazing thangki jihaira, ili chihohaolu.”
Kha Jacobna hānga, “Ili nana masomiranglakha eina tangda nali mathui ngasakmara.” 27Chieina ana Jacobli ngahāna, “Nawui aming khipā hokhala?” Ana “Jacob” hoi da hānga. 28#Hao 35.10. Chieina ana hānga, “Nawui ming Jacob maholuimara, kha Israel hora, kaja nana Vare eina mikumoli nganurda nana yuihaira.” 29#Wung 13.17-18. Chieina Jacobna ngahāna, “Nawui ming hāngmilu, ina kapona.” Kha ana hānga, “Khiwui vang eina nana iwui ming ngahānkhala?” Kala chili ana Jacobli somi. 30Chiwui vang eina Jacobna apam chiwui aming Peniel phokmida hānga, “Kaja ina Vareli mai eina mai ngasunda kathei samphanghaira, thalala iwui mirin kanmihaira.” 31Awui shaksha̱ shokhaida phei ngasongda Peniel kakān tharān zimik shokhairasai. 32Chiwui vang eina aja eina tangda Israelnaobingna ashaksha̱ phonkhavai anonān chi mashaimana, kaja ana Jacobwui shaksha̱ shimet khamili chiwui anonānli singza̱haowa.
Currently Selected:
HAOKAPHOK 32: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.