HAOKAPHOK 29
29
Jacobna Labanwui Shimli Vākazang
1Jacobna awui shongzā zatmamānda zingshoshong khalei mibingwui ngaleili vāshunga. 2Ana ngashānkhavā tharan, luili ra̱khong akha thei, kala yanglu, chiwui ngalemli yao ashangva̱ kathum khalei chi thei; kaja ra̱khong chiwui eina yaobing chili tara̱ sokmi. Ra̱khong chiwui lungsham chi kahakva̱na, 3kala yao ashangva̱ saikora chili kazipkhui kahai tharan yao kahombingna ra̱khongwui lungsham chi khalangshoklaga yaobingli mimanga, kala mimang kahai thili lungsham chi shingluishita.
4Jacobna athumli hānga, “Ichinā ngarā, nathum kachiwui eina kharākhala?” Athumna hānga, “Ithum Haranwui einana.” 5Ana athumli, “Nathum Nahorwui naomayara Labanli matheikhala?” da khangahān eina “Theiya” da athumna hānga. 6Ana athumli, “A ringphāda leila?” da ngahānlui. Athumna hānga, “Ringphāda lei; yanglu, awui naongalāva̱ Rachel yaobingli ngasoda ungrārāli!” 7Ana, “Yanglu, arui ngashunlungna, seihom-un makāranga, tara̱ shimanlaga kaphāchizātfalu” da hānga. 8Kha athumna, “Yao ashangva̱ saikora chi kazipkhuida ra̱khongwui lungsham hi makhalang shokakha tara̱ mashimanpaimana.” da ngahānkai.
9Ana athumli ngazek mahunglakha Rachelna avāva̱wui yaobing chili homrārāsai; kaja ana chi kahomna. 10Chieina ava̱va̱wui apa Labanwui naongalāva̱ Rachelli kala awova̱ Labanwui yaobingli kathei tharān, Jacobna vāda ra̱khongwui lungsham chi khalangshokmihailaga ava̱va̱wui apā Labanwui yaobingli tara̱ shimana. 11Kala Jacobna Rachelli maya̱khuida panglāk eina chapa. 12Kala Jacobna Rachelli a Labanwui theisāna, kala Rebekahwui naomayarana da hānga; kala ngalāva̱ china yongungda avāva̱li unghānga. 13Labanna azarva̱wui nao Jacobwui pao kashā eina ali samphang khavai yongvai, kala ngavamkhuida maya̱khui, kala awui shimli thānunga. Jacobna shokkahai saikora chi Labanli hāngchithei, 14kala Labanna ali hānga, “Kachangkhat eina na iwui ashee asāna!” Chithāda sāda ali kachāngkha ngasopama.
15Chieina Labanna Jacobli hānga, “Na iwui theisāna kajiwui vang khalem eina otram ngatha̱pairala? Hānglu, nawui ngalāngman kayakharakhala?” 16Chitharān Labanwui naongalāva̱ khani leisai; khararva̱li Leah kala khanganuiva̱li Rachel hoi. 17Leahwui mik ningshāt kai, kha Rachelva asho-arep unglaka kala mathālaka. 18Jacobna Rachelli leishihaoda hānga, “Nanao ngalāva̱ Rachelwui vang ina nali kum shini otram ngatha̱ra.” 19Labanna hānga, “Ali mi khangateili khamiliva nali khamina phāmeikhara; ili ngasopamlu.” 20Chiwui vang Jacobna kum shini Rachelwui vang eina otram ngatha̱mi, kha ali leikashiwui vang atam kasha̱nakhamāng thāhaowa.
21Chiwui thili Jacobna Labanli hānga, “Iwui atam peihaira, ipreiva̱̱ sākhavai Rachel ili mihaolu.” 22Chieina Labanna chiwui mibingli hokhuida zātkhān akha sāmi. 23Kha ngazinshong Labanna anao ngalāva̱ Leahli Jacobwuili thānzangmida Jacobna ngasopihaowa. 24(Leahwui rao sākhavai Labanna awui rao sha̱nao Zipah kahova chi mi). 25Kha ngathorshong, yanglu, Leah sāsāhaowa; chiwui vang Jacobna Labanli hānga, “Nana ili khi kasākhala? Ina Rachelwui vang nali otram mangatha̱mala? Chithakha khiwui vang nana ili minamkhala?”
26Labanna Jacobli hānga, “Khararva̱ mafathuiranglakha paishova̱ kathui iramwui khangachā maningmana. 27Haptā hi peingasaklu, kala nana ili kum shini otram ngatha̱miluiakha akhapava̱la mira.”
28Jacobna mayāda haptā chi kapei eina Rachelli preiva̱̱ sākhavai Jacobli mihaowa. 29(Labanna awui rao sha̱nao Bilhah anao ngalāva̱ Rachelli mihaowa). 30Chithāda sāda Jacobna Rachellila ngasopida Leahliva Rachelli leishimeihaowa, kala Labanli Rachelwui vang kum shini otram ngatha̱luishita.
Jacobwui Nao Kapharā
31Leahli maningkachāng chi theida Prohona Leahwui naopam shomihaowa, kha Rachelva nao shumhaowa. 32Leahna nao vaida naomayara akha pharai, kala aming Reuben hoi; kaja ana hānga, “Khikhalajila Prohona iwui kakhanang yangkhamiwui vang makahatlakla igaharana ara ili leishihaora.” 33Kala Leahna nao akha vailuishitta naomayara akha pharai, kala hānga, “Khikhalajila ili maleikashi hi Prohona theimida naomayara akha miluihaira;” kala awui ming Simeon phokmi. 34Latluida nao vailuishitta naomayara akha pharai, kala ana hānga, “Ara ina mayarnao kathum pharāhaira, mashoila igaharana ili yangphalungra”; chiwui vang awui ming Levi hoi. 35Ana nao vailuishitta mayarnao akha pharai, kala hānga, “Ajawui hili ina Proholi sochikatra;” chiwui vang awui ming Judah hoi, chiwui thili nao kapharā ngasāmhaowa.
Currently Selected:
HAOKAPHOK 29: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.