HAOKAPHOK 28
28
1Chiwui thili Isaacna Jacobli hokhui kala somida hānga, “Na Canaan ngalā akhalila makhuipaimara. 2Ngakarthuilu, Paddan-aramli nashāva̱wui avāva̱ Bethuelwui shimkhurli vālu; kala nava̱wui apā Labanwui naongalāva̱ akhali akhuilu. 3Pangshap sāshapa Varena nali somiranu kala athei matheida kachungkha mataisangmida nali miyur kahakva̱ ngasā ngasakranu. 4#Hao 17.4-8. Ana nali kala nawui ara̱-azāli Abrahamwui sokhami miranu; chithāda Abrahamli Varena mikahai nana yaokazat ram chi nawui ngasāranu.” 5Chithāda sāda Isaacna Jacobli shivāthaowa; kala ana Jacob eina Esauwui ava̱ Rebekahwui apā Paddan-aramli khalei Arameanpā Bethuelwui naomayara Labanwuili vāhaowa.
Esauna Ngalā Khangatei Kakhui
6Isaacna Jacobli somida “Canaan sha̱naoli mangakumpaimara” da hāngchitheilaga Paddan-aramli chihovāda chiwui sha̱nao khuikhavai Jacobli chihohaira kaji, 7kala Jacobna ava̱ eina avāwui kahāng nganāda Paddan-aramli vāhaira kaji hi Esauna theihaowa. 8Chieina Esauna Canaan sha̱naobingna avāva̱ Isaacli maringpha ngasakmana kaji theida, 9apreiva̱ ngarā leilala Abrahamwui naomayara Ishmaelwui naongalāva̱ Mahalath, Nebaiothwui azarva̱li Esauna vākhui.
Bethelli Jacobwui Mang
10Jacobna Beer-sheba chihohailaga Haranshong vai. 11Apam akhali vākashung eina zimik tunhaoda chithang ngayā chili pisanghaowa. Apam chiwui ngalung akha khuilaga awui khumkui sāda pizanga. 12#Joh 1.51. Kala ana mang akha shimanda ngaleiwui eina shairon akha ronkāda aton chi kazingram kāzokta shimana; kala yanglu, Varewui kazingraobingna kakākā katutung da thei! 13#Hao 13.14-15. Kala yanglu, Prohona chiwui atungli nganingda hānga, “I Proho china, nashāvā Abrahamwui Vare kala Isaacwui Varena; nana pida khalei ngalei chi na kala nawui ara̱-azāli ina mira; 14#Hao 12.3; 22.18. nawui ara̱-azā okathuiwui chifayākhara, kala nathumna zingtunshong kala zingshoshong kala atungshong eina azingshong vāpeira; kala na eina nawui ara̱-azāwui eina okathuiwui shimkhur saikorali sokhami ngasā ngasakra. 15Yanglu, ina nali ngasomidalei, kala nawui khavāpam kachiva̱li thānmira, kala ngalei hili khuiungmiluishitra; kaja ina hāngkahai chi nali masāmiranglakha eina tangda mathāhaimara.” 16Chiwui thili Jacobna thuimathukta hānga, “Kachangkhat eina Proho apam hili lei; ina chi matheikasāna.” 17Kala a ngacheehaoda hānga, “Hi kayākha kachihum apamkhala! Hi khangatei apam maningla Varewui shimlaka, kala kazingramwui ngaveina.”
18Jacobna ngathorthāk ngakarthuilaga ana khumkakui ngalung chi pākra̱ sāda shunlaga chiwuitungli thao heirora. 19Apam chili Bethel da phokmi; kha keinung chiwui aming khareli Luz hosai. 20Chieina Jacobna khangashit akha sāda hānga, “Varena ili ngasomida iwui kazazatpamli hithada thānmiakha, kala zākhavai kashakazā kala ngavai khavai kashankachon mida, 21ishāvāwui shimli chingri eina hanung ngasakluiakha Proho chi iwui Vare sāra, 22kala ina pakra̱ sāda shunkahai ngalung hi Varewui shim sāra; kala nana ili khami saikorawui akhum tharā nali mira.”
Currently Selected:
HAOKAPHOK 28: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.