HAOKAPHOK 26
26
Isaacna Gerar eina Beershebali Khavā
1Abrahamwui thotli shokhairakasā chi maningla, apam chili chāmrei akha rāluishita. Kala Isaacna Philistinewui awunga Abimelechli samphang khavai Gerarli vai. 2Shongfali Prohona rāsamphangda hānga, “Egyptli mataalu, kha ina kachithei ram chili pamlu. 3#Hao 22.16-18. Ina kahāng apam chili vālu, ina nali ngasomira kala somira; nali kala nawui ara̱-azāli; navā Abrahamli ngashit kahai chi ungshung ngasakta ram saikora chi na eina nawui atheili mira. 4Ina nawui ara̱-azā kazingramwui sirāyākha mataisangmira, kala ram saikora hi ina nathumli mira; nawui ara̱-azāwui eina okathuiwui miyur saikora athum khalatta sokhami ngasāra: 5khikhalajila Abrahamna iwui kahāng nganāda ina kakaso, ningkhami, shiyan-chikan kala ain mayonchinga.”
6Chieina Isaacna Gerarli pamhaowa. 7#Hao 12.13; 20.2. Mina apreiva̱wui pongli ngahānakha “Izarva̱na” da hānga, kaja “Apreiva̱na” jiakha aramnaobingna Rebekahwui vang eina ali shaothathaipaishinada ngacheehaowa. Khikhalajila Rebekah ngalā mathālaka. 8Chili kasāngkha pamkahaiwui thili Isaac eina Rebekah ngareokasā Philistinewui awunga Abimelechna charfawui eina yangshokta thei. 9Chieina Abimelechna Isaacli hokhuida hānga, “Hi napreiva̱na, kathāda nazarva̱na jikhala?” Isaacna hānga, “Awui vang eina ili shaothathaipaishinada phaning kahaiwui vang chithā kahaina.” 10Abimelechna hānga, “Na ithumli khicham kasākhala? Napreiva̱li mi akhana paisor eina ngasopimihailaga nana ithumli khayon phungsangmipai.” 11Chiwui eina thuida Abimelechna aramnao saikorali mathinda hānga, “Mi hipāli kala apreiva̱li pāng kaparpāli shaothatra.”
12Kala chikum Isaacna lui vāsangda heiun kachungkha khui. Prohona ali somi, 13kala mipā chi shānghaowa, kala mataisangkhangai mataisangda shāngshunhaowa. 14Ana seila, yaola kala thongthāng kachungkha leihaoda, chiwui vang Philistinenaobingna ali yuishihaowa. 15(Avāva̱ Abrahamwui thotli awui raobingna khonkahai ra̱khongbing chi Philistinenaobingna ngalei eina phinmiserhaowa). 16Kala Abimelechna Isaacli hānga, “Ithumwui eina thuihaolu, kaja ithumli nana pangmeikharhaira.” 17Chiwui vang Isaacna apam chiwui eina thuihaowa, kala Gerarwui tampākli apama. 18Kala avāva̱ Abrahamwui atamli khonkahai ra̱khongbing chi Isaacna akhonlui; kaja Abraham thikahaiwui thili Philistinenaobingna sāphinmiserhairasai; kala avāva̱na phokkhami amingbing chi phokmiluishita. 19Kha Isaacwui raobingna tampāk chili ra̱khong khonda chili ura̱ samkaphang eina, 20Gerarwui sei kahombingna Isaacwui sei kahombingli kharar ngarokta hi “Ithumwui tara̱na” da hānga. Chiwui vang ana ra̱khong chiwui ming chi Esek phokmi, kaja athumna ngapaihaowa. 21Chiwui thili athumna khangatei ra̱khong akha khonluishita, chilila athum kharar ngarokluihaowa; chieina ana chiwui aming Sitnah hoi. 22Ana chiwui eina apam khangatei akhali vāda ra̱khong khangatei akha akhonluishita; kha hiliva marākhararthuwa; chiwui vang ana apam chili Rehoboth hoi, kaja “Prohona ithumwui vang apam chikāmihaira, kala ram hili ithum mataisangra” kajina.
23Chiwui eina ana Beershebali shanga. 24Chithang ngayā Prohona ali rāchitheida hānga, “I navā Abrahamwui Varena; mangacheelu, kaja ina nali ngasomidalei kala somira kala iwui rao Abrahamwui vang eina nawui ara̱-azā mataisangmira.” 25Chieina ana apam chili hanphut akha sāda Prohowui mingli khoruma, kala awui kachonshim akhankhui. Chili Isaacwui raobingna ra̱khong akha khonkhuiya.
Isaac eina Abimelech Mashitkakhui
26 #
Hao 21.22. Chiwui thili Abimelechna Gerarwui eina awui machinme Ahuzzath kala raimi akhavā Phicolli ngasoda Isaacli vāsamphanga. 27Isaacna athumli hānga, “Ili ningkachaida nathumwui eina kashamhailaga khi rāsā kajikhala?” 28Athumna hānga, “Prohona nali ngasomida lei kaji ithumna ngahāhang eina thei; chieina ithumna kahāngva, na eina ithumwui ngachaili shākhi leilaga tuingashit akha leingasakmilu, 29chiya nali khikha mathālakla chingri eina chiho kahai thāda ithumlila sāshida masākhavai ngashitmilu. Na ara Prohowui sokhame china.” 30Chieina ana athumli zātkhān sāda phāshak phazāngaruma. 31Athumna ngathorthāk ngakarthuida akha eina akha shākhi sangaroka kala Isaacna athumli chithothaowa kala athumla awui eina chingri eina pākthuihaowa. 32Chithang Isaacwui raobingna ra̱khong akha khonlaga “Tara̱ samphanghaira” da unghānga. 33Ana chili Shibah hoi, chiwui vang aja eina tangda keinung chiwui ming Beer-sheba da hoi.
Esauwui Yurkhangatei Preiva̱bing
34Esauna kum hangmati kākashung tharān Hitpa Be-eriwui naongalāva̱ Judith eina Elonwui naongalāva̱ Basemathli khui; 35kala anina Isaac eina Rebekahwui mirin ning chotngasakhaowa.
Currently Selected:
HAOKAPHOK 26: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.