HAOKAPHOK 25
25
Keturahna Kapharā Abrahamwui Naotunbing
(1 Thot 1.32-33)
1Abrahamna Keturah kaho sha̱nao akhali khuiluiya. 2Ana Zimran, Jokshan, Medan, Midian, Ishbak kala Shuah athumli pharai. 3Sheba eina Dedanwui avāva̱ Jokshanna. Kala Dedanwui naobinga Asshurim, Letushim, kala Le-ummimna. 4Midianwui naomayara ngarā Ephah, Epher, Hanok, Abida, kala Eldaahna. Saikora hi Keturahwui naongarāsera. 5Abrahamna awui khalei saikora Isaacli mi. 6Kha angashirva̱wui naobingle thongthāngmāng mi; kala a ringlakha athum saikorali Isaacwui eina ngateida zingshoshong khalei ngaleivāk chihovāserhaowa.
Abraham Kathi kala Kachifa
7Abrahamwui mirin zingkum shākha hangshinida phangāna. 8Abrahamna rarlak eina thida awo-ayiwuili vāhaowa. 9Anaomayara Isaac eina Ishmaelna ali Malch-pelahwui chikhurli chifaya, chiya Zahor Hitpawui naomayara Ephronwui lui Mamrewui zingshoshong khalei, 10#Hao 23.3-16. Abrahamna Hitnaowui eina lokakhui apam china. Chili apreiva̱ Sarahli ngasoda chizanhaowa. 11Abraham thikahaiwui thili Varena Isaacli somi kala Isaacna Beer-lahai-roili pamhaowa.
Ishmaelwui Ara̱-azā
(1 Thot 1.28,31)
12Sarahwui rao Egyptpava̱ Hagarna kapharā Abrahamwui nao Ishmaelwui naotunbing chi hina. 13#1 Thot 1.29-31. Ishmaelwui naomayara ngarāwui aming hina, Nebaiotna Ishmaelwui naochizaina; kala chiwui thili Kedar, Adbeel, Mibsam, 14Mishma, Dumak, Massa, 15Hadad, Tema, Jetur, Naphish kala Kedemah hina. 16Hibing hi shang tharāda khaniwui wungnaobing kala kachichāramwui ming athishurda Ishmaelwui naomayara ngarāsera. 17(Ishmaelwui mirin kum shākha thumrāda shini ringlaga thihaowa, kala awo ayili vāhaowa). 18Athumna Havilah eina thuilaga Shur vāshungda, Assyriashong Egyptli yangkhangasungli pāna; chili ana saikorawuitungli mungsai.
Esau eina Jacob Kapharā
19Hi Abrahamwui nao Isaacwui naotunbingna: Abrahamna Isaacli pharai, 20Isaacna kum hangmati kākashung eina Rebekahli ngakuma; Paddan-aramwui Aramean Bethuelwui naongalāva̱ kala Aremean Labanwui azarva̱na. 21Apreiva̱ Rebekah naokashumwui vang Isaacna Proholi seihā sāmi; kala kapo chi Prohona khuisangmida apreiva̱ Rebekahna nao vaihaowa. 22Wuklungli leilakha naobing chi nganur ngaroka; chieina Rebekahna hānga, “Hithara jiakha I khisāda okthuisākhala?” Chiwui vang ana Proholi ngahāna. 23#Rom 9.12. Kala Prohona ali hānga,
“Nawui naopamli miyur khani zangda lei,
Nana kapharā miyur khani hi ngayarkhaira.
Akhana akhapāli pangmeira,
khararana paisholi otram ngatha̱ra.”
24Kapharā atam khaung chitharān, yanglu, naopamli nao khani zangsai. 25Khararrali hungda pharāshoka, kala aphasā tongda ahahna rommithai; chieina awui ming Esau hoi. 26Chiwui thili agato pharāshoka, kala ana Esauwui pheimaja̱li singda tai; chieina awui ming Jacob hoi. Anili kapharā tharān avāva̱ Isaacwui kum hangtharuk kāhairasai.
Esauna Awui Khararpam Khayor
27Nao khani china kharar tharān, Esauna sā khareng themlāka, kala khararli zata; kha Jacobva nuikon eina kachonshimli pama. 28Isaacna Esauli leishilāka, kaja awui ramsā kashai samphanga; kha Rebekahna Jacobli leishimei.
29Thangkha Jacobna han hangda leilakha Esau luiwui eina ungda vānhaowa. 30Kala Esauna Jacobli hānga, “I thaināhaira, han kahung hangda khalei chi khamizālu!” (chieina awui ming Edom hoi). 31Jacobna hānga, “Rida nawui khararpam ili yorsangfalu.” 32Esauna hānga, “Kathaina thiki jiura; khararpam hina iwui vang khi kānnārakhala?” 33#Heb 12.16. Jacobna hānga, “Ili shākhi sārifalu.” Chieina ana shākhi sāda awui khararpam Jacobli yorsanghaowa. 34Chiwui thili Jacobna khamui kala hanla mida Esauna phāshak-phazālaga thuihaowa. Chithāda sāda Esauna awui khararpam yorzāhaowa.
Currently Selected:
HAOKAPHOK 25: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.