HAOKAPHOK 16
16
Hagar eina Ishmael
1Chitharān Abram preiva̱ Sarai nao mapharāthuwa. Awui rao Egyptwui sha̱nao akha Hagar hoda leisai; 2kala Saraina Abramli hānga, “Yanglu, Prohona ili nao shummihaira; chieina iwui raosha̱nao hili ngasoakha awui eina ina nao samphangpaira.” Chieina Abramna Saraiwui tui nganai. 3Chithāda sāda Abramna Canaan ngaleili kum tharā sompam kahaiwui thili, apreiva̱ Saraina awui rao Egyptpava̱ Hagar hi agahara Abramwui preiva̱ sākhavai mihaowa. 4Abramna Hagarli ngasopida nao vaihaowa; kala nao vaihaira da kathei eina akhavaiva̱li matheimithuwa. 5Kala Saraina Abramli hānga, “Ili khayon kasā saikora nali tāranu! Iwui rao nali ngaso khavai mi, kha ara nao vaihaira da kathei eina ana ili matheimithura. Prohona iniwui ngachaili bichar sāranu.” 6Kha Abramna Saraili hānga, “Yanglu, nawui raopava̱ hi nawui pāngli lei; nawui ningkachāng athishurda ali sālu.” Chieina Saraina ali sāshilak eina sāda Hagar yāmhaowa.
7Shurwui shongfashong lamhāng akhali, ura̱ khaleipam akhali Prohowui kazingraona ali samphanga. 8Kala ana hānga, “Saraiwui rao sha̱nao Hagar, na kachiwui eina rāda kachili vāki kajikhala?” Hagarna ngahānkai, “Ishachon Saraiwui eina yāmkazatna.” 9Prohowui kazingrao china ali hānga, “Latungda nachonwui kahāng nganālu.” 10Kazingrao china hānglui, “Ina nawui ara̱-azā kachungkha mataisangmida athum mashānkhararra ngasāra.” 11Kazingrao china hithādala hānglui, “Yanglu, na nao vaida lei, kala mayarnao akha pharāra; awui ming Ishmael hora; kaja Prohona nawui kachotkachāng chi theimihaira. 12Ava mi akhawui sakashe gadhā thāra, mi kachiva̱na ali mamayāmara, kala ana mi kachiva̱li mamayāmara, kala ana athei-asā khipalikha mamayā ngarokla okthuira.” 13Chiwui vang ana ali khangazeka Proho wui aming chi “Na Katheia Varena” da hoi, kaja ana hānga, “Ina Vareli imik eina theikachangkhathailaga ali theikahaiwui thilila I ringfa kajila?” da hānga. 14Chiwui vang ra̱khong chili Beer-lahai-roi da hoi, hi Kadesh eina Beredwui ngachaili lei.
15 #
Gal 4.22. Hagarna Abramli naomayarnao akha pharāmi; kala Hagarna kapharā Abramwui naomayara chili Ishmael hoi. 16Hagarna Abramwui naomayara Ishmael kapharā tharān Abram kum hangchishatta tharuk kāhairasai.
Currently Selected:
HAOKAPHOK 16: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.