YouVersion Logo
Search Icon

HAOKAPHOK 12

12
Varena Abramli Kaho
1 # Ots 7.3; Heb 11.8. Chieina Prohona Abramli hānga, “Naramwui eina, shangwui eina kala navāwui shim eina zatta ina chitheiki kaji ngalei chili vālu.” 2#Hao 15.5; 17.4,5; 18.18; 22.17; 28.14; 32.12; 35.11; 46.3. Kala ina nali kahaka yur akha sāngasakta nali sokhamila somira, nawui ming reingasakta, somi kahaia mi akha sāngasakra.
3 # Hao 18.18; 22.17,18; 26.4; 28.14; Gal 3.8. Nali kasobingli inala sora,
nali khonkashe chili inala khonshira
kala okathui shimkhur hupta nawui mangā eina sokhami ngasāra.
4Chieina Prohona kakaso athishurda Abramna zata, kala Lotna ali ngasovai. Abramna Haranwui eina zatkaphok chitharān kum hangshinida phangā kāhairasai. 5Abramna apreiva̱ Sarai, agatowui naomayara Lot, kala athumna kazipsang kahai lan kala Haranli samkaphang mibingla zangserda Canaanli vākhavai zata. Athumna Canaan ngaleili vākashung eina, 6Abramna Sechem kaho apamli khalei Morehwui shirimthingpam chili kānvai. Atam chitharān Canaannaobingna ngalei chili pamsai. 7#Hao 13.15; 15.18; 17.8; 24.7; 26.3; 28.4,13; 35.12; 48.4; Ots 7.5; Gal 3.16. Chitharān Prohona Abramli rāchitheida hānga, “Nawui naotunbingli ina ngalei hi mira.” Chiwui vang ana ali rākachitheia Prohowui vang apam chili hanphut akha sai.
8Chiwui thili Bethelwui zingshoshong khalei phungreishong vāda awui kachonshim vākhaningkai; chiwui zingtunshong Bethel, kala zingshoshong Ai lei; kala ana chili Proho wui vang hanphut akha sākhuida Prohowui mingli khoruma. 9Chiwui thili Abramna Negebshong tāmamāna.
Abramna Egyptli Khavā
10 # Hao 20.1-18; 26.7-11. Atam chitharān apam chili chāmrei rāhaowa. Kala ngalei chili zāt saknā kahaiwui vang Abramna Egyptli tāpama. 11Ana Egyptli tāshungnanai, ana apreiva̱ Saraili hānga, “Na ngalā khamathāva̱na kaji ina thei; 12Egyptnaobingna nali kathei eina ‘Hi apreiva̱na’ jihenra; chieina athumna ili sāthathenra, kha nali ringngasakra. 13Chiwui vang eina izarva̱na jihaolu, chithakha nawui mangā eina I kalā mashimara, kala nawui mangā eina imanglā kharing samphangra.” 14Abramna Egypt tākashung tharan aramnaobingna sha̱naopava̱ chi mathāshuna da thei. 15Kala Pharaohwui wungnaobingna theilaga, awui azak khamathā chi Pharaohli unghānga. Chieina sha̱naopava̱ chili Pharaohwui dolanli thānvāhaowa. 16Kala awui mangā eina ana Abramli lumlak eina sai, kala Abramna awui eina yao mukkā, gadhā avā, rao sha̱nao mayarnao, gadhā ava̱ kala ut kachungkha samphanga.
17Kha Abram preiva̱ Saraiwui vang eina Prohona Pharaoh kala awui shimkhurli kazātkashi eina kachungkha khanang ngasaka. 18Chi theilaga Pharaohna Abramli hokhuida hānga, “Nana ili khi kasākhala, napreiva̱na da ili khisāda mahāngmakhala? 19Khisāda ‘A izarva̱na’ da hāngkhala, nazarva̱na kajiwui vang ina ipreiva̱ sākhavai kakhui maningmala? Ara napreiva̱li khuilaga thuiulu.” 20Kala Pharaohna awui apongli awui mibingli kakaso athishurda, athumna apreiva̱ eina awui khalalei saikora khuiphungda thuihaowa.

Currently Selected:

HAOKAPHOK 12: TANGBSI

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy