YouVersion Logo
Search Icon

HAOKAPHOK 11

11
Babelwui Dolan
1Chitharān okathui katonga tuiyur akhamāngsai, tuikhurla machungmana. 2Kala zimikshoshong athumna khavā tharan Shinar ngaleili tampāk akha leisāda chili asoma. 3Kala athum akha eina akha ngazek ngarokta hānga, “Ralu, ithum chek semlaga rikkazakkhuisa.” Chithāda sāda ngalungwui vang chek kala nāpkhavaiwui vang khe shichina. 4Chiwui thili athumna hānga, “Raserlu, ithum keinung akha sākhuisa, kala dolanshim kajuiva̱ akhala aton kazingramli kazokta sākhuisa, kaja ithumwui ming zatkhavai sāsa, chi maningakha ithum okathui apam katongali chaiyānghaora.” 5Prohona mibingwui naomayarabingna sākahai keinung eina dolanshim chi yangkhavai tai. 6Kala Prohona hānga, “Yanglu, athum yur akhamānga kala tuila akhamānga; athumna sāki kaji chi hina haokaphokna, athumna sāra kaji masākharar maleisāmara. 7Ralu, ithumna tālaga athumwui tui pa̱ngapāmihaosa; akhana akhawui tui mashaaranu.” 8Chithāda sāda Prohona athumli apam chiwui eina okathui apam kachida chaiyāng ngasakhaowa, chieina athumna keinung chi masāluithuwa. 9Chiwui vang eina apam chiwui aming Babel hoi, kaja apam chili Prohona okathui katongawui tui pa̱ngapāmihaowa, kala chiwui eina Prohona athumli okathui peida chaiyāng ngasakhaowa.
Shemwui Ara̱-azā
(1 Thot 1.24-27)
10Hi Shemwui naotunbingna. Ana kum shākha kākashung eina Arpachshadli pharai, hi tara̱ phongda kum khaniwui thilina; 11Shemna Arpakshadli pharā kahaiwui thili kum shāphangā ringvāda sha̱nao mayarnao khangateila pharai.
12Arpachshadna kum thumrāda phangā kākashung eina Shelahli pharai; 13Arpachshadna Shelahli pharā kahaiwui thili kum shāmati apā kathum ringvāda sha̱nao mayarnao khangateila pharai.
14Shelahna kum thumrā kākashung eina Eberli pharai; 15Shelahna Eberli pharākakhuiwui thili kum shāmati apā kathum ringvāda mayarnao sha̱nao khangateila pharai.
16Eberna kum thumrāda mati kākashung eina Pelegli pharai; 17kala Eberna Pelegli kapharāwui thili kum shāmati thumra ringvāda khangatei mayarnao sha̱nao khangateila pharai.
18Pelegna kum thumrā kākashung eina Reuli pharai; 19Pelegna Reuli pharā kahaiwui thili kum shākhani apā chiko ringvāda mayarnao sha̱nao khangateila pharai.
20Reuna kum thumrāda khani kākashung eina Serugli pharai; 21Reuna Serugli pharā kahaiwui thili kum shākhani apā shini ringvāda mayarnao sha̱nao khangateila pharai.
22Serugna kum thumrā kākashung eina Nahorli pharai; 23Serugna Nahorli pharā kahaiwui thili kum shākhani ringvālaga mayarnao sha̱nao khangateila pharai.
24Nahorna kum maga̱da chiko kākashung eina Terahli pharai; 25Nahorna Terahli pharā kahaiwui thili kum shākha tharāda chiko ringvāda mayarnao sha̱nao khangateila pharai.
26Terahna kum hangshini kākashung eina Abram, Nahor kala Haranli pharai.
Terahwui Naotunbing
27Hibing hi Terahwui naotunbingna. Terahna Abram, Nahor kala Haranli pharai; Haranna Lotli pharai; 28Chaldea ngaleiwui Ur kaho kha̱, ali pharā khavaipamli avāva̱ Terah mathiranglakha Haran thihaowa. 29Kala Abram eina Nahorla ngalā khui; Abram preiva̱li Sarai, kala Nahor preiva̱li Milcah hoi; Milcah eina Iscahli Haranna pharai. 30Kala Sarai naoshuma; nao maleimana.
31Terahna anaomayara Abram, Haranwui naomayara, awui ara̱ Lot, kala anaomayara Abramwui preiva̱ arihāva̱ Saraili ngasoda Chaldeawui ngalei Urwui eina Canaanli vākhavai zata, kha athumna Haranli vākashung chitharān chili asomhaowa. 32Terahna kum shākhani apā phangā kākashung eina Haranli thihaowa.

Currently Selected:

HAOKAPHOK 11: TANGBSI

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy