YouVersion Logo
Search Icon

Genesis 7

7
Ya hinggepan di Noah etan di bapor
1Entanni ey nedatngan etan tsimpuh ni inhel Apu Dios et kantun Noah ey “Hegep kayuddan pamilyah mud bapor tep hi-gam ni ebuh hu imbilang kun kayyaggud di emin ni tuu. 2Ipahgep mudda hu hampipitun nambulubulug ni kameibbillang ni malinih ni animal niya hanhakkey ni nambulubulug idan kameibbillang ni beken ni malinih. 3Ey ipahgep mudda hu hampipitun nambulubulug ni nambakbaklang ni sisit. Ipahding mudda huyya ma-lat emin hu nambakbaklang ni animal niyadda sisit ey mebunnat ida eyad puyek. 4Tep hanlingguan hu melebbah meippalpun nunya ey peellik hu udan ni na-pat ni aggew niya na-pat ni hileng ma-lat meendin emin ida mategun lintuk.”
5Et ipahding nan Noah emin hu intugun nan Apu Dios ni pehding tu.
6-12Himmegep hi Noah, ya ahwatu, yadda u-ungnga tu niyadda ahwada etan di bapor ma-lat eleg ida malsing. #7:6 Matthew 24:38, Luke 17:27 Yadda nambulubulug ni animal ni kameibbillang ni malinih niyadda beken ni malinih, anin idan kamangkinaddap niyadda kamanbinulluh, yadda nambulubulug ni sisit, ey immalidda dama et mekihgep idan emin di bapor. Et malebah hu pitun aggew, e yan nunman hu meikkahampulut pitun aggew ni meikkadwan bulan ni nunman ni toon, ey inlaputu tu-wangun um-udan. Intaggan tu udan ni na-pat ni aggew niya na-pat ni hileng ey keut-utbul hu danum. Ey anin ni kabunyan et heni nantekang et kamangkaikuyag ali udan et malbengan hu puyek. Yan nunman ey enem ni gatut hu toon nan Noah.
13Yan nunman ni aggew ey himmegep hi Noah, ya ahwatu, yadda u-ungnga tu e hi Shem, hi Ham et hi Japet et niyadda ahwada etan di bapor. 14-15Nekihgep ni hi-gada hu nambulubulug ni nambakbaklang ni animal ni maeyum niya beken niyadda etan kaumtayab. 16Impahding da humman e inu-unnud da hu inhel Apu Dios ni pehding da. Et yan hinggepan dan emin etan di bapor ey inlekbin Apu Dios hu habyen.
Ya nalbengan ni puyek
(2 Peter 2:5)
17Sinaggan tu udan ni na-pat ni aggew et malbengan hu puyek. Lektattuy edallem law ni peteg hu danum ey simma-pew etan bapor. 18Kamena-gey hu danum di puyek ey kamanta-ta-pew dama etan bapor di danum. 19Anin ni yadda etan ettata-gey ni duntug eyad puyek et nangkeli-muh ida. 20Taggan ni danum ta-gey et labhan tudda humman ni ettata-gey ni duntug ni enem ni mitroh. 21-23Et meendin emin hu mategu eyad puyek, yadda tuu, yadda animal ni maeyum niya beken, yadda kamambinulluh niya kamangkinaddap, niyadda sisit, tep nalsing idan emin. Yan ebuh hu neihwang ni eleg malsing ey hi Noah niyadda etan nekihgep ni hi-gatud bapor. 24Et malbengan hu puyek ni hanggatut et neliman aggew.

Currently Selected:

Genesis 7: ify

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy