Genesis 46
46
Ya linawwan di Jacob di Egypt
1Et mandaddan di Jacob e impeki-la dan emin hu wadan hi-gada et umgah ida. Dimmateng idad Beersheba et iappitan tu etan Dios eman lan ametu hi Isaac. 2Yan nunman ni hileng ey nampeang-ang hi Apu Dios nan Jacob et kantuy “Jacob!” Himmumang hi Jacob e kantuy “Hipa humman e Apu?”
3-4Ey kantuy “Hi-gak etan Dios ni dinaydayaw lan amam. Entan takut mun umlaw di Egypt, tep pedakkel kulli hu helag mudman. Ippaptek dakeyun lawwan yudman ey ibbangngad kuddalli helag mudya. Ey wadalli hi Joseph di kad-an mun ketteyyan mud Egypt.”
5-7Newa-wa et ilugan mewan idan han-aaggi hi Jacob, yadda u-ungnga da niyadda aahwa da etan di impalaw ni patul ni panlugganan et hi-yanen da Beersheba. Impeki-la dan emin hu inhalun da niyadda emin hu limmudad Kanaan.
Yadda etan helag Jacob ni limmaw di Egypt
(Exodus 1:1-4)
8Huyya ngadan idan u-ungngan Jacob ni limmaw di Egypt. Hi Reuben e pengulwan 9niyadda etan u-ungnga tun hi Hanok, hi Pallu, hi Hesron, et hi Karmi. 10Hi Simeon niyadda etan u-ungnga tun hi Jemuel, hi Jamin, hi Ohad, hi Jakin, hi Sohar, et hi Saul e u-ungnga tu etan di hakey ni biin iKanaan. 11Hi Levi niyadda u-ungnga tun hi Gerson, hi Kohat et hi Merari. 12Hi Judah niyadda etan u-ungnga tun hi Sela, hi Peres et hi Serah. (Netey ida dewwan u-ungngan Judah e hi Er et hi Onan eman ni wadaddad Kanaan.) Wadadda hu inap-apun Judah ni u-ungngan Peres e di Hesron nan hi Hamul. 13Hi Issakar niyadda u-ungnga tun hi Tola, hi Puah, hi Jashub et hi Simron. 14Hi Sebulun niyadda u-ungnga tun hi Sered, hi Elon et hi Jahleel. 15Huyyadda u-ungngan Jacob nan Leah eman ni wadaddad Mesopotamya, nem eleg mei-dum etan u-ungnga dan biin hi Dinah. Telumpulut tellu hu bilang dan emin.
16Hi Gad niyadda u-ungnga tun hi Sephon, hi Haggi, hi Suni, hi Esbon, hi Eri, hi Arodi et hi Areli. 17Hi Asher niyadda etan u-ungnga tun hi Imnah, hi Isbah, hi Isbi, hi Beriah et hi Serah e bii, niyadda etan inap-apun Asher e u-ungngan Beriah e di Heber nan Malkiel. 18Huyyaddan hampulut enem hu nahlag di Jacob nan Silpah e bega-en nan Leah ni indawat ametun hi Laban.
19Yadda u-ungngad Jacob nan Rachel ey di Joseph nan Benjamin. 20Yadda u-ungngan Joseph di Egypt ey di Manasseh nan Epraim e ya ineda ey hi Asenat e u-ungngan Potipera e padid Heliopolis. 21Yadda u-ungngan Benjamin ey hi Bela, hi Beker, hi Asbel, hi Gera, hi Naaman, hi Ehi, hi Ros, hi Muppim, hi Huppim et hi Ard. 22Huyyaddan hampulut epat hu nahlag di Jacob nan Rachel.
23-25Yadda pitun helag di Jacob nan hi Bilhah e bega-en nan Rachel ni indawat ametu e hi Laban ey hi Dan, yadda etan u-ungnga tun hi Hushim, hi Naptali niyadda u-ungnga tun hi Jahseel, hi Guni, hi Jesher, et hi Sillem.
26Et ya bilang emin ni helag Jacob ni limmaw di Egypt ey na-nem et enem e eleg makibilang ida ahwan u-ungnga tu. 27Hedin mei-dum ida etan dewwan u-ungngan Joseph di Egypt man nepitudda.
28Yan eman ni kamenetteng di Jacob di Egypt ey impemappangngulun tu hi Judah ni an menghel nan Joseph ma-lat tudda dammuen di Goshen. 29Et manlugan hi Joseph di kalesah tu et tu dammuen di ametud Goshen. Nandateng idan ametu et akwalen tu et tagan tu nangih. 30Ey kan Jacob ni hi-gatuy “Anin ni metteyyak law haggud inang-ang daka ey nanengtun mategu ka.”
31Et kan Joseph nan hi ametu, yadda agitu, niyadda etan edum ni nekilaw ni hi-gada ey “Umlawwak di kad-an etan ni patul ma-lat nak peamtan hi-gatu e immali kayun nalpud Kanaan. 32E-helen kun hi-gatu e kayu kamampattul e intabin yuddalli animal yu niya emin hu wadan hi-gayu. 33Ey hedin peeyyag dakeyun hi-gatu et ibbagetu ngunu yu, 34ehel yu e neipalpun keu-ungnga yu ey kayu kamampattul e henidda lan aammed tayu. Tep hedin huyya e-helen yun hi-gatu, man yadya Goshen hu ittudu tun pambebleyan yu ma-lat meappil kayuddan iEgypt tep daka pihhuladda hu kamampattul.”
Currently Selected:
Genesis 46: ify
Highlight
Share
Copy
Want to have your highlights saved across all your devices? Sign up or sign in
©2009, Wycliffe Bible Translators, Inc. All rights reserved.