YouVersion Logo
Search Icon

Genesis 25

25
Yadda edum ni helag Abraham
1Hi Abraham ey nambintan ni hakey ni bii e hi Keturah hu ngadan tu. Yadda u-ungnga da ey 2hi Simran, hi Joksan, hi Medan, hi Midian, hi Isbak et hi Suah. 3Nahlag hi Joksan et di Seba nan Dedan. Nahlag hi Dedan et wadadda Assurim, yadda Letushim niyadda Leummim. 4Nahlag hi Midian et hi Ephah, hi Epher, hi Hanok, hi Abida et hi Eldaah. Huyyaddan emin hu helag Keturah.
5Hi Isaac hu nengipebeltanan Abraham ni emin ni wadan hi-gatu. 6Nem yan eman ni ketaggu tu ey indawtan tudda dama etan u-ungnga tud edum ni ahwa tu et itu-dak tuddad appit ni kasimmilin aggew e neidawwid kad-an Isaac.
Ya neteyyan niya neikulungan Abraham
7-8Neka-a-amma hi Abraham et matey eman ni hanggatut et nepitu et lima toon tu. 9-10Et an ikulung idan u-ungnga tu e di Isaac nan Ismael etan di ginatngan Abraham ni leyang nan Eplon e u-ungngan Sohar e Hittite. Yadman dama neikulungan Sarah e ahwatu etan di takdul ni payew di Makpelah e neihnup di Mamre. 11Entanni ey binendisyonan nan Apu Dios hi Isaac. Ya nambebleyan tu ey yad Beer Lahai Roi.
Yadda helag Ismael
12Huyyadda hu helag Ismael e u-ungngan Abraham nan Hagar e iEgypt e bega-en Sarah: 13Ya pengulwan ey hi Nebayot et han hi Kedar, hi Adbeel, hi Mibsam, 14hi Misma, hi Dumah, hi Massa, 15hi Hadad, hi Tema, hi Jetur, hi Naphis et han hi Kedemah e udidyan. 16Huyyaddan hampulut dewwan u-ungngan Ismael ey nei-peng idan nan-ap-apud hampulut dewwan bebley ni neingedanan ni ngadan da. 17Netey hi Ismael eman ni hanggatut et telumpulu et pitu toon tu. 18Yadda helag tu ey nei-peng idad kebebbebley neipalpud Habilah ingganah di Sur e neihnup di pappeg ni Egypt di appit ni kasimmilin aggew ni mampellaw di Assyria e neappil idad edum ni helag Abraham.
Ya neiungngaan di Esau nan Jacob
19Huyyadda hu nekapkapyad biyag nan hi Isaac e u-ungngan Abraham. 20Hi Isaac ey na-pat hu toon tun nan-ahwaan Rebekah e agin Laban niya u-ungngan Bethuel e iAramea di Paddan Aram di Mesopotamia. 21Dimmasadasal hi Isaac nan Apu Dios tep eleg pakeungnga hi Rebekah. Entanniy dingngel Apu Dios hu dasal tu et mambutsug hi Rebekah. 22Ya etan imbutsug tu ey nandupi-il ey ida kaumbenultung di egeh tu. Et mandasal nan Apu Dios e kantuy “Kele henin nunya kameipahpahding ni hi-gak?” 23Ey kan Apu Dios ni hi-gatuy “Huttan idan nandupi-il ni imbutsug mu ey mambalin idallin dewwan et-eteng ni bebley. E-etteng ali kabaelan ni hakey. Ya etan memengngulu ey mambalin ni bega-en ali etan ni meihned.” #25:23 Romans 9:10-12
24Nedatngan hu pan-ungngaan tu ey makulug tu-wangun nandupi-il u-ungnga tu. 25Ya nemangulun neukat ey makaddalang belat tu niya nekabwekan emin annel tu et ingadnan dan hi Esau. 26Ya etan neihayned ni neukat ey inhammad tun intenged di dapan nan Esau et ingadnan dan hi Jacob. Na-nem hu toon nan Isaac ni neiungngaan idan nunyan nandupi-il ni u-ungnga tu.
Ya nengiwallengan nan Esau ni kelebbengan tun pengulwan
(Hebrews 12:16)
27Yan nehiknan da ey nambalin hi Esau ni madweng e yad muyung hu tuka lallawwi. Hedin hi Jacob ey pinpinhed tun manha-ad di baley da. 28Hi Isaac ey pinpinhed tu hi Esau tep ya tuka i-anemut ni tuka dedwengan tuka ihhida. Nem hi Rebekah ey hi Jacob hu pinpinhed tu.
29Hakey ni aggew e kamene-eng hi Jacob ni ihhida ey dimmateng hi Esau ni nalpud muyung ey neka-upa. 30Kan Esau nan Jacob ey “Idwasi muwak eyan madlang ni kennen ni inhaeng mu et kuman nak tep neka-upa-ak.” (Et ingadnan da hi Esau ni Edom. Ya hu keibbellinan ni Edom ey madlang.) 31Kan Jacob ey “Dammutu, nem pakkaw ni iddawat mun hi-gak hu kelebbengan mun pengulwan.” 32Kan Esau ey “Ku anin! Kaw hipa silbin kelebbengan hedin mettey yak ni upak?” 33Kan Jacob ey “Pansapatah ka ni e iddawat mun hi-gak hu kelebbengan mu et han daka idwasi.”
Et mansapatah hi Esau e idwat tu hu kelebbengan tu. 34Indawat nan Jacob etan kennen nan Esau et kanen tu et manglaw mewan. Humman ni impahding Esau ey impeang-ang tu e eleg tun hekey ibbilang etan kelebbengan tun pengulwan.

Currently Selected:

Genesis 25: ify

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy