Exodus 1
1
Ya nanhelheltapan idan helag Israel di Egypt
1Huyyadda ngadan idan u-ungngan Jacob #1:1 Hi Israel hu hakey ni ngadan tu. ni nekilaw ni hi-gatud Egypt e ingkuyug dadda pamilyah da e 2hi Reuben, hi Simeon, hi Levi, hi Judah, 3hi Issakar, hi Sebulun, hi Benjamin, 4hi Dan, hi Naptali, hi Gad et hi Asher. 5Nepitun emin hu bilang ida eyan helag Jacob. Nekibilang hi Joseph e wada ngu dedan di Egypt.
6Entanni ey netey idan emin huyyan han-aaggi, anin hi Joseph. 7Nem dakel hu helag dan neihullul ni hi-gada. Nahlag ida humman ni u-ungnga da et lektattuy dakel idan peteg et maihinap idad emin ni bebley di Egypt.
8Nelabah hu dakel ni toon ey wada neihullul ni patul di Egypt ni eleg tu amta hu meippanggep lan Joseph niyadda etan kayyaggud ni impahpahding tun panyaggudan nunman ni bebley. #1:8 Acts 7:18 9Kantuddan tuu tuy “Dimmakkel idan peteg eya helag Israel, et eleg tayu amta ey wadalli lawah ni pehding dan hi-gatsu. 10Mahapul ni mannemnem itsun pehding tayu ma-lat eleg ma-duman hu bilang da. Tep nungay wada gubat ey mei-dum idan buhul tayu, et hedin neapput itsu ey hi-yanen da eya bebley tayu.”
11Et ya impahding idan iEgypt ey impambalin daddan himbut etan helag Israel et panhelheltap dadda. Pinutuk da makabbunget ni mengippengngulu, et pangunu dan hi-gada hu nekalligat ni ngunu. Impekapya dan hi-gada etan dewwan bebley, ya Pithom niya Rameses e humman pambodegahan ni patul. 12Nem hedin kapan-imma-maddan iEgypt ni mengippehelheltap ni hi-gada, ey ida anhan law kamangkedakkel et ida kamangkeihhinnap. Mukun nema-man newada takut idan iEgypt ni hi-gada. 13-14Et humman hu endi law hemek da et daka pan-imma-man mengippelilligat ni hi-gadad emin ni daka pengunnu, henin ngunud payew niya mengapyan meikkapyan baley.
15Entanni ey minandal etan ni patul etan dewwan Hebrew #1:15 Yadda tuud Egypt ey dadda kangeddanidda helag Israel ni Hebrew. e di Shiprah nan Puah e hi-gada hu kaumbaddang idan edum dan helag Israel ni man-ungnga. Kantun hi-gaday 16“Hedin laki hu i-ungngan biin Hebrew man patey yu, nem hedin bii entan tu patey.” 17Nem eleg da u-unnuden humman ni inhel etan ni patul, tep ida kaumtakut nan Apu Dios, et eleg da pateyen ida lalakkin neiungnga. 18Et humman hu impaeyag etan ni patul ida et kantuy “Kele eleg yuwak u-unnuden? Kele eleg yu pateyen ida lalakkin in-ungngaddan edum yun Hebrew?” 19Kanday “Apu, endi pehding mi tep hin-appil idan peteg hu edum min biin Hebrew nem yadda iEgypt tep anggagannu hu daka pan-ungngai e eleg kami umdateng ni neukat hu u-ungnga da.”
20-21Et humman hu dimmakkel idan peteg hu helag Israel niya immetteng law hu kabaelan da. Gapuh ni kapengu-unnudiddan nunyan bii nan hi Apu Dios, ey binendisyonan tudda et mengahwadda dama et mawedadda u-ungnga da.
22Entanni law ey in-olden etan ni patul idan tutu-u tu e kantuy “Yu pan-ibbeng ida hu pakeiungngan lalakkin Hebrew di Wangwang e Nile di diman Egypt, nem entan tudda ilegat hu biin pakeiungnga.”
Currently Selected:
Exodus 1: ify
Highlight
Share
Copy
Want to have your highlights saved across all your devices? Sign up or sign in
©2009, Wycliffe Bible Translators, Inc. All rights reserved.