Jenasis 50
50
1Wal wen im dedi bin dai Josef bin hagambat im, en imbin kis langa im, en imbin kraikrai blanga im.
2Afta na Josef bin gibit wed langa ola dokta blanga pudum medisin langa det bodi weya im kaan go nogudwan. 3Imbin deigim olabat 40 dei blanga pudum det medisin langa det bodi. En seimtaim ola pipul blanga det kantri Ijip bin kraikrai blanga det dedbala. Deibin kraikrai blanga im longtaim, 70 dei.
4Brom deya wen deibin binij kraikrai, Josef bin jandim wed langa ola haibala wekinmen blanga det king. 5Imbin tok, “Yumob dalim det king, bifo imbin dai det dedbala bin dalim mi blanga meigim pramis garram im, en aibin pramis blanga deigimbek det bodi blanga im raitbek langa det ronwan greibyad blanga im langa det kantri gulum Keinan. En det king garra larram mi go en gaburrumap det dedbala deya langa det kantri, en afta ai garra kambek iya langa dijan kantri.”#Jen 47:29-31
6Wal det king bin tok, “Im rait. Yu go en gaburrumap det dedbala, dumaji yubin pramis langa im.”
7Wal Josef bin go na blanga gaburrumap det dedbala. 8,9En ola haibala wekinmen blanga det king en ola haibala gabman men blanga det kantri en ola solja garram hos en bagi en ola solja garram raiding hos en ola femili blanga Josef en ola braja blanga im en ola femili blanga det dedbala, wal ol detlot na holot olabat bin go garram Josef. Bigismob pipul bin go blanga det fyunral. Oni ola lilwan biginini en wekinmen olabat bin jidan biyain langa det kantri gulum Goshin garram ola buligi en ship en gout olabat.
10Bambai na det bigmob pipul bin kamat langa det pleis gulum Etad weya deibin oldei deigimatbat ola rabish brom det sid daga deya sanraisaid langa det Jodan Riba, en olabat bin stap deya lilbit longtaim. En deibin ol kraikrai adbala deya blanga det dedbala, en deya na Josef bin abum det serramoni miting blanga kraikrai blanga det dedbala fo wan wik.
11Afta na wen ola Keinan pipul bin luk detlot pipul brom Ijip bin kraikrai deya langa det pleis, olabat bin tok, “Dijan im bigbala serramoni weya detlot Ijip pipul abum iya blanga kraikrai.” En deibin gibit nyuwan neim langa det pleis. Deibin gulum det pleis Eibulmisreiyim, dumaji ola Ijip pipul bin kraikrai deya na.
12,13Brom deya Josef en ol detlot pipul bin deigim det dedbala langa det pedik weya Eibrahem bin baiyim brom det Hitait men neim Efran. Eibrahem bin baiyim det pleis blanga greibyad. En Josef bin pudum det bodi blanga im dedi insaid langa det keib. Deibin gulum det keib Mekpela, en imbin sanraisaid brom det pleis gulum Memrei.
Wal Josef en im braja olabat bin pudum det bodi blanga olabat dedi deya langa det keib, dumaji det dedbala bin dalim olabat blanga pudum im bodi deya na.#Eks 7:16 14En olabat bin berrim det dedbala deya na, en afta Josef en im braja olabat en ola najalot pipul bin ol gobek langa det kantri gulum Ijip.
15Afta na ola braja blanga Josef bin stat jinggabat na. Deibin tok, “Maitbi Josef kipum wi langa binji blanga det nogudbala ting weya wibin dum langa im bifo. Maitbi im garra peiyimbek wi, dumaji wi dedi bin dai na.”
16Wal deibin jandim wed langa Josef, en deibin tok, “Bifo wi dedi bin dai, imbin gibit melabat wed blanga dalim yu. 17Imbin tok, ‘Yu garra larramgo yu braja olabat fri brom det nogudbala ting weya deibin dum langa yu bifo.’ Lagijat na wi dedi bin tok. Wal wi dedi bin bulurrum God. En melabat wekinmen blanga God du. En melabat askim yu blanga larramgo melabat fri brom det nogudbala ting weya melabat bin dum langa yu.”
Wal wen Josef bin irrim det wed, imbin kraikrai.
18Afta na detlot braja blanga Josef bin kaman langa im, en deibin baudan langa im, en deibin tok bradinbalawei langa im, “Melabat jidan jis laiga prisana blanga yu.”
19Wal Josef bin dalim olabat, “Mi nomo God. Yumob kaan bradin langa mi. Ai kaan peiyimbek yumob. 20Yumob bin wandi ardim mi. Bat God bin tenimran det plen blanga yumob, en imbin yusum det plen blanga yumob gudbalawei. God bin yusum det ting weya yumob bin dum blanga seibum laif blanga loda pipul. 21Wal yumob kaan bradin. Ai garra lukaftumbat yumob, en ai garra lukaftumbat ola biginini blanga yumob du.”
Wal ola braja blanga Josef bin jidan gudbinji na, dumaji Josef bin tok gudbalawei langa olabat.
Josef bin dai
22Wal Josef en im braja olabat bin kipgon jidanbat deya langa det kantri gulum Ijip longtaim.
Bambai na Josef bin gajimap 110 yiya. 23Imbin brabli olmen, en imbin luk ola san en ola grensan blanga im yangiswan boi Ifreiyim. En blanga im eldiswan boi Manesa imbin luk im san Mekiya en ola grensan blanga im du.
24Afta na Josef bin tok langa ola braja blanga im, “Nomo longtaim na ai garra dai. Bat God garra lukaftumbat yumob, en im garra deigimbek yumob langa det kantri weya imbin pramis langa Eibrahem en langa Aisik en langa det dedi blanga wi.”
25Afta na Josef bin askim im femili olabat blanga meigim pramis langa im. Imbin tok, “Ai garra dai dregli. En bambai wen God garra deigimbek yumob langa det kantri gulum Keinan, yumob garra deigimbek ola boun blanga mi du.”#Eksa 13:19; Josh 24:32; Hib 11:22
26Afta na Josef bin dai. Deya langa det kantri gulum Ijip imbin dai wen imbin gajimap 110 yiya. En ola femili blanga im bin pudum det medisin insaid langa im bodi weya im kaan go nogudwan, en deibin pudum det bodi insaid langa boks.
Binij na.
Currently Selected:
Jenasis 50: rop
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.