YouVersion Logo
Search Icon

Jenasis 40

40
Dubala prisana bin abum drim
1,2Bambai na King Fero bin gitwail langa dubala wekinmen blanga im. 3Imbin gitwail langa det hed kuk en det hed bamen, en imbin pudum dubala langa det seimwan jeil weya Josef bin jidan, 4en det bos blanga det jeil bin dalim Josef blanga lukaftum det dubala wekinmen deya langa det jeil.
Wal dubala bin jidan langa det jeil longtaim na, 5en wan nait dubala bin abum drim garram wed blanga dubala.
6Ailibala neksdei wen Josef bin kaman langa dubala, imbin luk dubala feis bin brabli sedwan, 7en imbin askim dubala, “Wotrong langa yunbala?”
8En dubala bin tok, “Minbala bin abum nogudwan drim, en minbala kaan sabi det mining blanga det dubala drim, dumaji nobodi iya blanga dalim minbala.”
Wal Josef bin tok, “Yunbala dalim mi det dubala drim blanga yunbala, dumaji God im sabi detkain, en afta im garra shoum mi wanim det dubala drim tok, en ai garra dalim yunbala.”
9Wal det bamen bin tok basdam, “Langa main drim aibin luk wanbala tri gulum greiptri, en det tri bin jandap lida langa mi garram thribala wadi. 10Detlot thribala wadi bin kamat brom det tri, en ola bushis bin gro langa detlot wadi. Afta na ola purdiflawa bin kamat langa detlot bushis, en ola greip daga bin gro langa detlot bushis, en deibin brabli kukwan na. 11Wal aibin holdim det kap blanga det king, en aibin gajim detlot greip daga, en aibin skwisim detlot greip daga blanga meigim ola jus kamat langa det kap, en afta aibin gibit langa det king na.” Lagijat na det bamen bin tok.
12,13Wal Josef bin tok, “Detlot thribala wadi olabat tok thribala dei. Olabat tok thrideistaim det king garra larramgo yu brom dijan jeil, en yu garra gedimbek det wek blanga yu weya yubin oldei holdim det kap blanga gibit dringk langa det king. Dijan im gudnyus blanga yu.
14“Wal yu garra jinggabat mi wen yu jidan gudbala deya atsaid. 15Yu wandi tok gudbalawei blanga mi langa det king blanga larramgo mi, dumaji deibin deigidawei mi brom det kantri blanga ola Hibru pipul, en iya langa dijan kantri ai nomo bin dum enijing rong blanga jidan iya langa jeil.” Lagijat na Josef bin tok.
16Brom deya wen det hed kuk bin irrim det wed bin gudwan blanga det bamen, imbin dalim Josef blanga im drim na, “Aibin abum drim du. En langa det drim aibin garrimap thribala dish garram daga ontop langa main hed. 17Det topwan dish bin abum olkain daga weya det king bin oldei laigim dagadagat. Bat ola bard bin binijimap ol detlot daga langa det dish.” Lagijat na det kuk bin tok.
18,19Wal Josef bin tok, “Detlot thribala dish olabat tok thribala dei. Olabat tok thrideistaim det king garra deigimat yu, en ola blijiman garra kadimof yu hed, en afta dei garra heingimap det bodi blanga yu ontop langa wadi, en ola bard garra binijimap yu bodi na. Dijan im bednyus blanga yu.” Lagijat na Josef bin tok.
20Brom deya thrideistaim det king bin abum bigbala padi. Imbin meigim blendibala daga blanga ola hedmen blanga im, en imbin jandim wed blanga larramgo det dubala wekinmen blanga im hubin jidan langa det jeil, en deibin bringimap dubala langa det king, 21en imbin pudumbek det bamen langa im wek weya imbin abum bifo. 22Bat ola blijiman bin kadimof det hed blanga det hed kuk, en deibin heingimap im bodi ontop langa wadi.
Wal lagijat na imbin hepin jis laik weya Josef bin tok blanga dubala drim. 23Bat afta na wen det bamen bin gedimbek im wek, im nomo bin lukbek langa Josef, en im nomo bin jinggabat im enimo.

Currently Selected:

Jenasis 40: rop

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy