YouVersion Logo
Search Icon

Jenasis 17

17
God bin dalim Eibrahem blanga sekamsais
1Bambai na wen Eibram bin 99 yiya ol, YAWEI det trubala God bin kamat langa im, en imbin tok, “Mi na YAWEI det Boswan God, en yu garra lisin langa mi en nomo dum enijing nogudwan. 2En ai garra kipum main strongwan pramis garram yu, en ai garra gibit yu bigismob biginini.”
3Wal Eibram bin baudan langa graun blanga shoum rispek langa God, 4en God bin tok, “Dijan na main strongwan pramis weya ai meigim garram yu. Yu garra jidan dediwan blanga loda difrinwan traib. 5,6En ai garra tjeinjim det neim blanga yu na. Dei kaan gulum yu Eibram. Ai tjeinjim det neim en gulum yu Eibrahem, dumaji ai garra gibit yu bigismob biginini, en ai garra meigim yu jidan dediwan blanga loda difrinwan traib, en sambala king garra kamat brom yu femili lain.#Rom 4:17
7“Wal ai garra kipum main strongwan pramis garram yu en garram yu bigininimob en garram olabat biginini en garram detlot biginini hu garra kaman bambai. En mi na garra jidan God blanga yu en blanga yu bigininimob ola taim.#Luk 1:55 8En dijan kantri gulum Keinan weya yu jidan streinja, wal ai garra gibit dijan kantri langa yu en langa yu biginini olabat olagija. En mi na garra jidan God blanga olabat.#Eks 7:5
9,10“Wal yu en ol yu biginini hu garra kaman bambai garra kipum dijan strongwan pramis. Yu garra sekamsais ola lilboi langa yu kemp wen olabat 8 dei ol.#Eks 7:8; Rom 4:11 11-13Yu garra sekamsais yu ronwan san en ola wekinmen blanga yu hu jidan jis laiga prisana en hubin bon langa yu kemp en ola wekinmen weya yu bin baiyim brom najalot kantri. Ol detlot na yu garra kadim olabat. Dijan mak garra jidan pruf langa yumob bodi blanga det strongwan pramis weya aibin meigim garram yu olagija. 14En if eni lilboi jidan eniwei weya dei nomo bin kadim im, wal im nomo blanga main, dumaji imbin breigim det strongwan pramis blanga main. Dijan strongwan pramis na yu en ol yu biginini hu garra kaman bambai garra kipum olagija.
15“Wal ai garra tjeinjim det neim blanga yu waif. Yu kaan gulum im Serai. Blanga im neim Sera na, 16en ai garra meigim im brabli gudbinji, dumaji im garra abum im ronwan san blanga yu. Im garra jidan mamiwan blanga bigismob traib, en sambala king garra kamat brom im du.” Lagijat na God bin tok.
17Wal Eibrahem bin baudan langa graun igin, en imbin laf, en imbin tok miselp, “Mi 100 yiya ol na, en im reken ai garra abum main ronwan lilboi. En main waif Sera im brabli olgamen 90 yiya ol na, en im reken Sera garra abum beibi. Minbala kaan abum biginini.”
18Wal Eibrahem bin askim God na, “Wotfo yu kaan larram Ishmeil teikoba ola ebrijing blanga mi?”
19Wal God bin tok, “Nomo. Sera na garra faindim beibi, en im garra abum ronwan san blanga yu, en yu garra gulum im neim Aisik. En ai garra kipum main strongwan pramis garram im en garram ola biginini blanga im olagija. 20Bat aibin irrim yu weya yubin tok blanga Ishmeil, en ai garra gudbinji langa im en gibit im bigismob biginini du, en im garra jidan dediwan blanga twelbala king, en olabat garra abum bigmob biginini du, en ai garra meigim olabat bigiswan traib. 21Bat det strongwan pramis weya aibin meigim garram yu, ai garra kipum det strongwan pramis garram yu ronwan san Aisik. En yu waif Sera garra abum det lilboi Aisik wanyiyataim.” 22Lagijat na God bin tok, en wen imbin binij toktok, imbin libum Eibrahem na.
23-25Wal Eibrahem bin brabli olmen. Imbin 99 yiya ol gulijap wan handrid wen God bin tok lagijat langa im, en im san Ishmeil bin 13 yiya ol. Bat det seim dei weya God bin tok langa im, Eibrahem bin kadim ola boi en ola men. Imbin kadim im san Ishmeil en imbin kadim ola wekinmen hubin jidan jis laiga prisana en hubin bon langa im kemp, en imbin kadim ola wekinmen weya imbin baiyim brom najalot kantri. En deibin kadim Eibrahem du. 26,27Deibin sekamsais ol detlot boiwan brom Eibrahem kemp langa det seim dei.

Currently Selected:

Jenasis 17: rop

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy