KO SĒNESI 9
9
Ko e Kovinānite ‘a e ‘Otuá mo Noa
1PEA tāpuaki‘i ‘e he ‘Otua ‘a Noa mo ‘ene fānau, ‘o ne folofola kiate kinautolu, Mou fakatupu; mou fakatokolahi, mo fakafonu ‘a e fonua.#Sēn 1.28 2Pea ko homou ngeia mo homou manavahē‘ia ‘e tō ki he manu kotoa pē ‘o ‘uta, mo e manu puna kotoa pē ‘o e langi; ‘io, ‘a e me‘a kotoa pē ‘oku lakuna mai ‘e he kelekele, pea mo e ika kotoa pē ‘o e tahi: kuo tuku kinautolu ke mou fa‘iteliha ki ai. 3Ko e me‘a kotoa pē ‘oku ngaue, ‘a ia ko e pehē ‘oku mo‘ui, ko ho‘omou me‘akai ia; hangē ko e mohuku kuo u ‘atu kotoa pē ia kiate kimoutolu. 4Ka ko e kakano ‘a ia ‘oku kei ‘i ai ‘ene mo‘ui, ‘a ia ko hono toto, ‘e ‘ikai te mou kai ia.#Sēn 17.10-14; Lev 19.26; Teu 12.16,23; 15.23 5Mo ‘eni foki, te u ‘eke homou toto, ho‘omou mo‘ui; te u ‘eke ia ki he manu kotoa pē pea ki he tangata kotoa pē: ko e mo‘ui ‘a e tangata te u ‘eke ki he tangata ko hono tokoua. 6Ko ia ‘oku ne lilingi ‘a e toto ‘o ha tangata, ‘e lilingi hono toto ‘e ha tangata: he ko e ‘īmisi ‘o e ‘Otua na‘a ne ngaohi ai ‘a e tangata.#Sēn 1.26; ‘Eki 20.13
7Pea ko kimoutolu, mou fakatupu, mo fakatokolahi; mau hangē ha neveneve ‘i he fonua, ‘o mafola ai.#Sēn 1.28
8Pea folofola ‘a e ‘Otua kia Noa, pea ki he‘ene fānau foki, ‘o pehē, 9Ko au ē ‘oku ou fakapapau ni ‘eku fuakava mo kimoutolu, pea mo homou hako ‘amui, 10pea mo e me‘a mo‘ui kotoa pē ‘oku ‘iate kimoutolu, pe ko e manupuna, pe ko e manu lalata, pe ko e ngaahi fa‘ahinga kaivao ‘o ‘uta ‘oku ‘iate kimoutolu; ‘o fai mei he me‘a kehekehe na‘e ‘alu mei he ‘a‘ake ki he manu kotoa pē ‘i māmani: 11‘io, ‘oku ou fakapapau ‘eku fuakava mo kimoutolu; pea ‘e ‘ikai te u toe tu‘usi ‘a e kakano kotoa pē ‘i ha lōmaki vai, pea ‘e ‘ikai toe ai ha lōmaki ke faka‘auha ‘a e fonua. 12Pea folofola ‘a e ‘Otua, Ko eni ‘a e faka‘ilonga fuakava ‘oku ou tuku ‘i he vaha‘a ‘o‘oku mo kimoutolu, pea mo e me‘a mo‘ui kotoa pē ‘oku ‘iate kimoutolu, ‘o fai atu ki he ngaahi to‘utangata ‘o ta‘engata: 13kuo u ‘ai ‘eku ‘umata ‘i he ngaahi ‘ao; pea ‘e hoko ia ko e faka‘ilonga fuakava ‘i he vaha‘a ‘o‘oku mo māmani. 14Pea ka faifai pea u tānaki ‘ao mai ki he fonua, pea ‘e hā ‘a e ‘umata ‘i he ‘ao, 15pea te u manatu ai ki he‘eku fuakava, ‘a e fuakava ‘a‘aku mo kimoutolu mo e fa‘ahinga me‘a mo‘ui kehekehe, ‘io, ‘a e kakano kotoa pē; pea ‘e ‘ikai toe hoko ‘a e vai ko e lōmaki, ‘o maumau‘i ‘a e kakano kotoa pē. 16Pea ‘e tu‘u ‘a e ‘umata ‘i he ‘ao, pea te u mamata ki ai mōku fakamanatu ki he fuakava ta‘engata ‘a e ‘Otua mo e me‘a mo‘ui kotoa pē, ‘io, ‘a e kakano kotoa pē ‘oku ‘i he fonua. 17Pea folofola ‘a e ‘Otua kia Noa, Ko eni ia ‘a e faka‘ilonga ‘o e fuakava kuo u fokotu‘u ‘iate au mo e kakano kotoa pē ‘oku ‘i he fonua.
Ko Noa mo hono Fanga Fohá
18Pea ko e ngaahi foha ‘o Noa na‘e ‘alu atu mei he ‘a‘ake; ko Semi, mo Hami, mo Sēfeti: pea ko Hami ko e tamai ia ‘a Kēnani. 19Ko eni ‘a e ha‘a Noa ‘e toko tolu. Pea ko kinautolu ia na‘e mofele mei ai ‘a e fonua kotoa.
20Pea hanga ‘a e fa‘a ko Noa ‘o tō vaine: pea ne inu mei he uaine ‘o ne konā; 21pea na‘a ne ta‘evala ‘i hono loto tēniti. 22Pea sio ‘a Hami, ko e tamai ‘a Kēnani, ki he telefua ‘o ‘ene tamai, ‘o ne fakahā ki hono ongo tokoua ‘i tu‘a. 23Pea to‘o ‘e Semi mo Sēfeti ‘a e pulupulu, ‘o na ‘ai ki hona uma, ‘o na hā‘ele fakaholomui ‘o ‘ufi‘ufi ‘aki ‘a e telefua ‘o ‘ena tamai; pea na‘e hanga kimui hona mata, ko ia na‘e ‘ikai te na sio ki he telefua ‘o ‘ena tamai. 24Pea ‘ā ‘a Noa mei he‘ene uaine‘ia, pea ne ‘ilo ‘a e me‘a kuo fai kiate ia ‘e hono foha si‘i. 25Pea pehē ‘e ia,
Ko Kēnani, ke mala‘ia mu‘a,
Ke ne tamaio‘eiki ‘o e tamaio‘eiki ki hono ongo tokoua!
26Pea ne toe pehē,
Ke mālō‘ia ‘a Sihova, ‘Otua ‘o Semi;
Pea hoko ‘a Kēnani ko ‘enau tamaio‘eiki!
27Ke fakamafola ‘e he ‘Otua ‘a Sēfeti;#9.27 Sēfeti; ‘Oku vāofi ‘a hono pu‘aki ‘o e hingoá ni mo e faka-Hepelū ‘o e tupulakí.
Pea ke ne nofo he ngaahi tēniti ‘o Semi,
Pea hoko ‘a Kēnani ko ‘enau tamaio‘eiki!
28Pea mo‘ui atu ‘a Noa hili ‘a e Lōmaki ko e ta‘u ‘e tolungeau mo e ta‘u ‘e nimangofulu. 29Pea ko e fuoloa ‘o Noa ko e ta‘u ‘e hivangeau mo e ta‘u ‘e nimangofulu; pea pekia.
Currently Selected:
KO SĒNESI 9: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.