YouVersion Logo
Search Icon

KO SĒNESI 47

47
1PEA ha‘u ‘a Siosifa ‘o fakahā kia Felo, ‘o pehē, Kuo ‘omai mei Kēnani ‘a ‘eku tamai mo hoku ngaahi tokoua, mo ‘enau fanga manu iiki, mo ‘enau fanga manu lalahi, mo ‘enau koloa kātoa: pea ko eni ‘oku nau ‘i Kōseni. 2Pea na‘a ne fili mei hono ngaahi tokoua ha kau tangata ‘e toko nima, ‘o ne ‘ave ki he ‘ao ‘o Felo. 3Pea folofola ‘a Felo ki hono ngaahi tokoua, Ko e hā ho‘omou ngāue? Pea nau tali kia Felo, Ko e kau tauhi sipi ‘a ho‘o kau tamaio‘eiki, ‘a kimautolu mo ‘emau mātu‘a foki.
4Na‘a nau pehē foki kia Felo, Ko ‘emau omi ke ‘āunofo ‘i he fonua ni; he ‘oku ‘ikai ha me‘akai ma‘a e fanga manu ‘a ho‘o kau tamaio‘eiki, he ‘oku mamafa ‘a e honge ‘i Kēnani: ko ia ke ke ‘ofa ‘o tuku ke nofo ‘a ho‘o kau tamaio‘eiki ‘i Kōseni. 5Pea folofola ‘a Felo kia Siosifa, ‘o pehē, Ta kuo ha‘u kiate koe ‘a ho‘o tamai, mo ho ngaahi tokoua. 6Ke ke fa‘iteliha ki he fonua ‘o ‘Isipite; fili ‘a e lelei ‘o e fonua, pea tuku ke nofo ki ai ‘a ho‘o tamai mo ho ngaahi tokoua; ‘io, ke nau nofo ‘i Kōseni: pea kapau ‘oku ke ‘ilo ‘iate kinautolu ha ni‘ihi ‘oku mafai, pea fokotu‘u kinautolu ke pule ki he‘eku fanga manu.
7Pea na‘e toki fakahū mai ‘e Siosifa ‘a ‘ene tamai ko Sēkope, ‘o ne fokotu‘u ‘i he ‘ao ‘o Felo: pea na‘e tāpuaki‘i ‘e Sēkope ‘a Felo. 8Pea me‘a ‘e Felo kia Sēkope, ‘Oku fiha ‘a e ta‘u ‘o ho‘o mo‘ui?
9Pea tali ‘e Sēkope kia Felo, Ko e lau ‘o e ngaahi ta‘u ‘o ‘eku nofo muli ko e ta‘u ‘e teau mā tolungofulu: kuo si‘i mo kovi pē ‘a e ngaahi ‘aho ‘o e ngaahi ta‘u ‘o ‘eku mo‘ui, pea kuo ‘ikai a‘u ki he lau ‘o e ngaahi ta‘u ‘o e mo‘ui ‘a ‘eku mātu‘a ‘i he taimi ‘o ‘enau pilikimi. 10Pea na‘e tāpuaki‘i ‘e Sēkope ‘a Felo, pea ne toki hū kitua‘ā meia Felo. 11Pea vahe ‘e Siosifa ha nofo‘anga ki he‘ene ‘eiki mo hono ngaahi tokoua, pea ne ‘ange kiate kinautolu ha tofi‘a ‘i ‘Isipite, ‘i he potu lelei ‘o e fonua, ko e feitu‘u ko Lamesisi, ‘o hangē ko e tu‘utu‘uni ‘a Felo. 12Pea na‘e tauhi ‘aki ha me‘akai ‘e Siosifa ‘a ‘ene tamai, mo hono ngaahi tokoua, mo e fale kotoa ‘o ‘ene ‘eiki, ‘o fakatatau ki he tokolahi ‘o e fāmili.
Ko e Honge
13Pea na‘e ‘ikai ha me‘akai ‘i he fonua kātoa; he na‘e mamafa ‘aupito ‘a e honge, pea na‘e pōngingia ‘a ‘Isipite mo Kēnani ko e me‘a ‘i he honge. 14Pea na‘e kātoa kia Siosifa ‘a e pa‘anga kotoa na‘e ‘iloa ‘i ‘Isipite mo Kēnani, ko e me‘a ‘i he‘enau fakatau koane: pea na‘e ‘omi ‘e Siosifa ‘a e pa‘anga ki he fale ‘o Felo. 15Pea ‘i he ‘osi ‘a e pa‘anga ‘i ‘Isipite mo Kēnani, na‘e ha‘u ‘a ‘Isipite kātoa kia Siosifa, ‘o nau pehē, ‘Omi ha‘amau me‘akai; he koe‘uma‘ā ‘emau mate ‘i ho ‘ao, he kuo ‘osi ‘a e pa‘anga.
16Pea lea ‘e Siosifa, ‘Omi ho‘omou fanga manu, pea te u ‘atu koe‘uhi ko ho‘omou fanga manu, ‘o kapau kuo ‘osi ‘a e pa‘anga. 17Pea nau ‘omi ‘enau fanga manu kia Siosifa; pea na‘a ne ‘ange kiate kinautolu ha me‘akai koe‘uhi ko ‘enau fanga hoosi, mo ‘enau fanga manu iiki, mo ‘enau fanga manu lalahi, mo ‘enau fanga ‘asi; pea na‘a ne tauhi kinautolu ‘aki ha me‘akai ‘i he ta‘u ko ia koe‘uhi ko ‘enau fanga manu kotoa pē.
18Pea ‘i he ‘osi ‘a e ta‘u ko ia na‘a nau ha‘u kiate ia ‘i he ta‘u ‘e taha, ‘o nau pehē kiate ia, ‘E ‘ikai te mau fufū mei he ‘Afiona kuo ‘osi ‘a e pa‘anga; pea kuo ma‘u ‘e he ‘Afiona ‘a e fanga manu; ‘oku ‘ikai ke toe ha me‘a ke fai ki ai ‘e he ‘Afiona, ka ko homau ngaahi sino pē, mo homau ngaahi kelekele: 19ka koe‘uma‘ā ‘emau mate ‘i ho ‘ao, ‘a kimautolu mo homau kelekele; ke ke fakatau mu‘a ‘a kimautolu mo homau ngaahi konga kelekele ki ha me‘akai, pea ko kimautolu mo homau kelekele te mau nofo ko e kau tamaio‘eiki ‘a Felo: ka ke ‘omi pe ha tenga ke mau mo‘ui, ‘o ‘oua na‘a mate ‘a kimautolu, pea ke ‘oua na‘a lusa ‘a e fonua.
20Ko ia na‘e fakatau kotoa ‘e Siosifa ‘a e kelekele ‘o ‘Isipite ma‘a Felo; he na‘e fakatau takitaha ‘e he ‘Isipite hono ‘api koe‘uhi kuo kūmia kinautolu ‘e he honge: pea ko ia na‘e hoko ‘a e fonua ko e me‘a ‘a Felo. 21Pea ko e me‘a ki he kakai, na‘a ne hiki kinautolu ki he ngaahi kolo mei he potu ‘e taha ‘o ‘Isipite ‘o a‘u ki he potu ‘e taha. 22Ngata ‘i he kelekele ‘o e kau taula‘eiki na‘e ‘ikai fakatau ia; he na‘e ai ha ‘inasi ‘o e kau taula‘eiki meia Felo, pea na‘a nau kai honau ‘inasi na‘e ‘ange ‘e Felo; ko ia ai na‘e ‘ikai te nau fakatau honau ngaahi konga kelekele ‘onautolu. 23Pea pehē ‘e Siosifa ki he kakai, Ko eni kuo u fakatau kimoutolu he ‘aho ni pea mo homou kelekele ma‘a Felo: ko e tenga eni ma‘amoutolu ke mou tōta‘u. 24Pea ‘i ho‘omou utu, te mou ‘ange hono vahe nima kia Felo, pea ko e vahe ‘e fā ‘e ‘amoutolu ke tōta‘u ‘aki, pea ma‘amou kai, pea ma‘a e kakai ‘o homou ngaahi ‘api, pea mo‘o kai ‘a homou tamaiki.
25Pea na‘a nau pehē, Kuo ke fakahaofi ‘emau mo‘ui: ke ‘ofa mai ‘a e ‘Afiona, ka mau hoko ko e kau tamaio‘eiki ‘a Felo. 26Pea na‘e fokotu‘u ‘a e tu‘utu‘uni ‘e Siosifa ki he kelekele ‘o ‘Isipite, pea ‘oku fai ki ai ‘o a‘u ki he ‘aho ni, ke to‘o ma‘a Felo hono vahe nima: ngata pē ‘i he kelekele ‘o e kau taula‘eiki, na‘e ‘ikai hoko ia ko e me‘a ‘a Felo.
Ko e Kole Faka‘osi ‘a Sēkope
27Pea na‘e nofo ‘a ‘Isileli ‘i ‘Isipite ‘i he feitu‘u ko Kōseni; pea na‘a nau ma‘u tofi‘a ai, mo nau tupu, mo nau faka‘au ke fu‘u lahi.
28Pea ko e mo‘ui ‘a Sēkope ‘i ‘Isipite ko e ta‘u ‘e hongofulu mā fitu: ko ia ko e fuoloa ‘o Sēkope, ko e ngaahi ta‘u ‘o ‘ene mo‘ui, ko e ta‘u ‘e teau mo e tau ‘e fāngofulu mā fitu. 29Pea na‘e fakaofiofi mai ‘a e taimi ‘o ‘Isileli ke pekia; pea ne ui ange hono foha ko Siosifa, ‘o ne pehē ki ai, ‘Ē, kapau leva ‘oku ke ‘ofa kiate au, ke ke ‘ai mai ho nima ki hoku lalo tenga,#47.29 ‘ai mai… tenga; Vakai ki he 24.2. ka ke fai ‘ofa kiate au mo ke fai mo‘oni, ‘o ‘oua ‘aupito te ke tanu au ‘i ‘Isipite;#Sēn 49.29-32; 50.6 30ka u ka tokoto mo ‘eku ngaahi kui, pea te ke ‘ave au mei ‘Isipite, pea tanu au ‘i honau tanu‘anga. Pea ne pehē, Te u fai pē ‘o hangē ko ho‘o me‘a.
31Pea ne pehē, Fuakava mai. Pea na‘a ne fuakava kiate ia. Pea ne fai ‘e Sēkope ‘ene hū, ‘o faaki ki he ‘ulu‘i mohenga.

Currently Selected:

KO SĒNESI 47: TMB

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy