YouVersion Logo
Search Icon

KO SĒNESI 42

42
Ko e Fononga ki ‘Isipite ‘a e Fanga Tokoua ‘o Siosifá ‘o Fakatau Me‘akai
1PEA ‘i he ‘ilo ‘e Sēkope ‘oku ai ha koane ‘i ‘Isipite, na‘a ne pehē ki he‘ene fānau, Ko e hā ‘oku mau fesiofaki ai. 2Pea ne pehē foki, Ko eni kuo u fanongo ‘oku ai ha koane ‘i ‘Isipite: mou ‘alu hifo mu‘a ki ai, ‘o fakatau mei ai ma‘atautolu; koe‘uhi ke tau mo‘ui, ‘o ‘oua te tau mate.#Ngā 7.12 3Ko ia na‘e ‘alu hifo ‘a e ngaahi tokoua ‘e hongofulu ‘o Siosifa ke fakatau koane mei ‘Isipite. 4Ka ko Penisimani, ko e tehina ‘o Siosifa, na‘e ‘ikai tuku ia ‘e Sēkope ke ‘alu mo hono ngaahi tokoua; he‘ene pehē, Na‘a hoko kiate ia ha tu‘utāmaki.
5Pea na‘e ha‘u ‘a e fānau ‘a ‘Isileli ke fakatau fakataha mo e kakai na‘e ha‘u; he na‘e honge ‘a e fonua ko Kēnani. 6Pea ko Siosifa ko e kōvana ia ‘o e fonua, ko ia ia na‘a ne fakatau ki he kakai ‘o e fonua: pea na‘e ha‘u ‘a e ngaahi tokoua ‘o Siosifa, ‘o nau tulolo kiate ia, ‘o punou ki he kelekele. 7Pea ‘i he mamata ‘a Siosifa ki hono ngaahi tokoua, na‘a ne ‘ilo kinautolu, ka na‘a ne fai kiate kinautolu ‘o hangē ha muli, ‘o ne lea fakapuhopuha kiate kinautolu, ‘o ne pehē kiate kinautolu, Ko ho‘omou omi mei fē?
8Pea nau pehē, Mei he fonua ko Kēnani ke fakatau me‘akai. Pea na‘e ‘ilo ‘e Siosifa hono ngaahi tokoua, ka ko kinautolu na‘e ‘ikai te nau ‘ilo ia. 9Pea na‘e manatu ‘e Siosifa ki he ngaahi misi na‘a ne fai kiate kinautolu, pea ne pehē ki ai, Ko e kau mataki kimoutolu; kuo mou omi ke vakai ‘a e ta‘eū ‘o e fonua.#Sēn 37.5-10
10Pea nau tali, ‘Ēī, ‘oku ‘ikai, he kuo omi ‘a ho‘o kau tamaio‘eiki ke fakatau me‘akai. 11Ko kimautolu kātoa ko e fānau ‘a ha tangata pē taha; ko e kakai fai mā‘oni‘oni kimautolu, ‘oku ‘ikai ko e kau mataki ‘a ho‘o kau tamaio‘eiki.
12Pea ne pehē kiate kinautolu, ‘Ikai, ka ko ho‘omou omi pē ke vakai ‘a e ta‘eū ‘o e fonua.
13Pea nau pehē ange, Ko kimautolu ko ho‘o kau tamaio‘eiki ko e toko hongofulu mā ua, ko e tautehina, ko e fānau ‘a e tangata pē taha ‘i he fonua ko Kēnani: pea ke ke me‘a, ko e kimui ‘oku ‘i he‘emau ‘eiki ‘i he taimi ni, pea ko e toko taha ‘oku ‘ikai.
14Pea pehē ‘e Siosifa kiate kinautolu, ‘Āua, ‘ikai ko ia ia na‘a ku tala atu, ko e kau mataki kimoutolu: 15ko e me‘a ko eni ‘e sivi ‘aki kimoutolu: Tangi e mo‘ui ‘a Felo, ‘e ‘ikai te mou ‘alu atu kae‘oua ke ha‘u homou tehina. 16Fekau atu hamou toko taha ke ‘omi homou tehina, ka ko kimoutolu ‘e nofo pilīsone, koe‘uhi ke fakamo‘oni ko e kau tangata fai mo‘oni kimoutolu: he ka ‘ikai, tangi e mo‘ui ‘a Felo ko e kau mataki kimoutolu. 17Pea ne ‘ai fakataha kinautolu ki he pilīsone, ‘o ‘aho tolu.
18Pea ‘i hono ‘aho tolu na‘e lea ‘a Siosifa kiate kinautolu, ‘o pehē, Mou fai eni, pea te mou mo‘ui; he ko e tokotaha au ‘oku ou ‘a‘apa ki he ‘Otua: 19kapau ko e kau fai mo‘oni kimoutolu, pea ke nofo pōpula ‘i he pilīsone hamou toko taha; ka mou ō kimoutolu ‘o ‘ave koane telia ‘a e honge ‘o homou ngaahi ‘api; 20ka mou ‘omi kiate au homou tehina kimui, pea ‘e fakamo‘oni ai ho‘omou lea; pea ‘e ‘ikai ai te mou mate. Pea na‘a nau fai pehē.
21Pea felāuaki ‘a e tu‘unga me‘a ni, Kuo tau hia mo‘oni ‘i hotau tehina, ‘i he‘etau sio ki he mamahi ‘o hono loto, ‘i he‘ene kōlenga kiate kitautolu kae ‘ikai te tau tokanga; ko hono ō ia kuo hoko ai kiate kitautolu ‘a e mamahi ko eni.
22Pea tali ‘e Lūpeni kiate kinautolu, ‘o pehē, ‘Ikai na‘a ku tala kiate kimoutolu, ‘o pehē, ‘Oua te mou fai ha kovi ki he tama; ka na‘e ‘ikai te mou tokanga? Pea ko eni foki ‘oku ‘eke hono toto. 23Ka ko kinautolu na‘e ‘ikai te nau mahalo ‘oku ‘ilo‘i ‘e Siosifa; he na‘e hikilea ‘enau fe‘iloaki. 24Pea ne tafoki meiate kinautolu, ‘o tangi; pea ne foki mai ‘o alea mo kinautolu, pea ne fili ‘a Simione, ‘o ne ha‘i ia ‘i honau ‘ao.
Ko e Foki ‘a e Fanga Tokoua ‘o Siosifá ki Kēnani
25Pea na‘e tu‘utu‘uni ‘e Siosifa ke fakafonu koane ‘enau ngaahi ‘angame‘a, pea ke fakafufū ‘a e pa‘anga ‘a e tangata takitaha ki he‘ene tangai, pea ke ‘ange hanau ‘oho ki he hala: ‘io, na‘e pehē ‘ene fai kiate kinautolu. 26Pea na‘a nau fakaheka ‘enau koane ki he‘enau fanga ‘asi, ‘o nau ‘alu mei he potu ko ia. 27Pea ‘i he vete ‘e ha taha ‘ene tangai ke ‘ange ha me‘akai ki he‘ene ‘asi ‘i he mālōlō‘anga, na‘a ne vakai ‘ene pa‘anga, tā ‘oku ‘i he‘ene ngutu‘i tangai. 28Pea ne pehē ki hono ngaahi tokoua, Kuo fakafoki mai ‘eku pa‘anga; he vakai foki ‘oku ‘i he‘eku tangai: pea na‘e tō honau manava, ‘o nau fetete‘i he‘enau pehē, Ko e hā ‘a e me‘a ni kuo fai ‘e he ‘Otua kiate kitautolu?
29Pea na‘a nau a‘u ki he‘enau ‘eiki ko Sēkope ki he fonua ko Kēnani, pea nau fakamatala kiate ia ‘a e me‘a kotoa kuo hoko kiate kinautolu: ‘o nau pehē, 30Ko e matāpule ‘oku ‘eiki ‘i he fonua na‘a ne lea fakapuhopuha‘a kiate kimautolu, ‘o ne tuku ko e ni‘ihi kimautolu kuo mau ō ange ke mataki‘i ‘a e fonua. 31Pea ne mau tali ki ai, Ko e kakai fai mā‘oni‘oni kimautolu; ‘oku ‘ikai ko e kau mataki: 32‘oku mau toko hongofulu mā toko ua, ko e tautehina, ko e kau tamai taha; ko e toko taha kuo ‘ikai, pea ko e kimui ‘oku ‘i he‘enau tamai ‘i he taimi ni ‘i he fonua ko Kēnani. 33Pea me‘a kiate kimautolu ‘a e matāpule ‘oku ‘eiki ‘i he fonua, ‘o pehē, Ko e me‘a ko eni te u ‘ilo ai ko e kau mā‘oni‘oni kimoutolu; ke mou tuku ‘iate au hamou toko taha, pea mou ‘ave ha me‘a telia ‘a e honge ‘o homou ngaahi fāmili, ‘o mou ō: pea mou ‘omi kiate au homou tehina kimui: 34pea te u ‘ilo ai ‘oku ‘ikai ko e kau mataki kimoutolu, ka ko e kau fai mo‘oni, pea te u toki tuku atu homou tokoua, pea te mou fai fakatau ‘i he fonua.
35Pea ‘i he‘enau lilingi ‘enau ngaahi tangai Pea tā ko e kofu pa‘anga ‘a e tangata takitaha na‘e ‘i he‘ene tangai: pea ‘i he‘enau vakai ‘a e ngaahi kofu pa‘anga, ‘e kinautolu mo ‘enau ‘eiki, na‘a nau manavahē. 36Pea lea ‘e he‘enau ‘eiki ko Sēkope kiate kinautolu, Kuo mou ‘ave ‘eku fānau meiate au; ko Siosifa ‘oku ‘ikai, pea ko Simione ‘oku ‘ikai, pea ‘oku mou fie ‘ave mo Penisimani: ‘oku tō kiate au ‘a e ngaahi me‘a ni kotoa.
37Pea lea ‘e Lūpeni ki he‘ene ‘eiki, ‘o pehē, Te ke tāmate‘i hoku ongo foha ‘o‘oku, ‘o kapau ‘e ‘ikai te u ‘omi ia kiate koe: tuku ia kia au, pea te u fakafoki ia kiate koe.
38Ka ka pehē ‘e ia, ‘E ‘ikai ‘alu hifo hoku foha mo kimoutolu; he kuo mate hono tokoua, pea ko ia pē toko taha ‘oku toe: pea kapau ‘e hoko kiate ia ha tu‘utāmaki ‘i he hala ‘oku mou ‘alu ai, te mou ‘ohifo hoku hina ni ki fa‘itoka ‘i he mamahi.

Currently Selected:

KO SĒNESI 42: TMB

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy