KO SĒNESI 41
41
Ko e Faka‘uhinga ‘e Siosifa ‘a e ngaahi Misi ‘a Felo
1PEA ‘i he faka‘osi ‘o ha ta‘u ‘e ua, na‘e misi ‘a Felo: tā ‘oku ne tu‘u ‘i he ve‘e vaitafe. 2Pea ‘iloange na‘e ‘alu hake mei he vaitafe ha fanga kau ‘e toko fitu na‘e matamatalelei mo sisino; pea nau kaikai ‘i he mohuku ano. 3Pea tā na‘e ‘alu hake kimui mei he vaitafe ha fanga kau kehe ‘e toko fitu na‘e matamata kovi mo tutue; ‘o nau tu‘u fakataha mo e fanga kau ko ē ‘i he ngutu ‘o e vaitafe. 4Pea ko e fanga kau na‘e matamata kovi mo tutue na‘a nau folofua ‘a e fanga kau ‘e fitu na‘e matamatalelei mo sisino. Pea ‘ā ai ‘a Felo. 5Pea mohe ia ‘o misi ko hono tu‘o ua: pea tā na‘e ‘alu hake ha fo‘i koane ‘e fitu ‘i ha sino pē taha, ‘o fuo lalahi mo lelei. 6Pea vakai, na‘e tupu hake kimui ha fo‘i koane ‘e fitu na‘e fua mate, pea pakukā ‘i he matangi hahake. 7Pea ko e ngaahi fo‘i koane na‘e fua mate na‘a nau folo ‘a e fo‘i koane ‘e fitu na‘e fuolalahi mo fai kakano. Pea ‘ā ai ‘a Felo, pea tā ko e misi pē. 8Pea ‘i he‘ene pongipongi na‘e hoha‘a hono finangalo; ‘o ne fekau ke ui mai ‘a e kau sikalaipe kotoa pē ‘o ‘Isipite, mo hono kau tangata poto kotoa pē: pea na‘e fakamatala ‘e Felo ‘ene misi kiate kinautolu, ka na‘e ‘ikai ha taha te ne faka‘uhinga kia Felo.#Tān 2.2
9Pea na‘e toki lea kia Felo ‘e he matāpule ‘o e ha‘a ngaohi kava, ‘o pehē, Kuo u toki manatu he ‘aho ni ki he‘eku hia. 10Na‘e tuputāmaki ‘a e ‘Afiona ki he‘ene kau tamaio‘eiki ‘o tuku au ke u nofo pōpula ‘i he fale ‘o e kapiteni ‘o e Kā‘ate, ‘a au mo e matāpule ‘o ha‘a ta‘o mā: 11pea ma misi fakatou‘osi ‘i ha pō pē taha, ‘a au mo ia, ‘o takitaha ma‘ana ‘a e misi mo hono ‘uhinga. 12Pea na‘a mau ‘i ai mo ha talavou ko e tangata Hepelū, ko e tamaio‘eiki ‘o e kapiteni ‘o e Kā‘ate; pea na‘a ma fakamatala kiate ia, pea na‘a ne faka‘uhinga kiate kimaua ‘ema misi; ‘o takitaha ‘a e misi hono ‘uhinga. 13Pea hangē ko ‘ene fakamatala kiate kimaua na‘e pehē ‘ene hoko; ko au na‘e fakafoki ‘e he ‘Afiona ki hoku lakanga, pea ko e tangata ko ē na‘e tautau.
14Pea fekau ‘e Felo ke ui ange ‘a Siosifa, pea na‘a nau ‘omi fakavave ia mei he ‘ana: pea na‘a ne tele hono kava, ‘o ne fetongi hono kofu, ‘o ne hū mai kia Felo. 15Pea folofola ‘a Felo kia Siosifa, ‘o pehē, Kuo u misi, pea ‘oku ‘ikai ha taha ke faka‘uhinga ia: ka kuo u fanongo kiate koe, tokua ko ho‘o fanongo leva ki ha misi pea ke faka‘uhinga ia.
16Pea tali ‘e Siosifa kia Felo, ‘o pehē, ‘Oku ‘ikai ko au: ko e ‘Otua pē te ne ‘omi ha me‘a ke tu‘umālie ai ‘a e ‘Afiona.
17Pea fakamatala ‘e Felo kia Siosifa, ‘o pehē, ‘I he‘eku misi ‘iloange ‘oku ou tu‘u ‘i he ngutu vaitafe: 18pea tā na‘e hake mei he vaitafe ha fanga kau ‘e toko fitu na‘e sisino mo matamatalelei; pea nau kaikai ‘i he mohuku ano: 19pea ‘iloange na‘e ‘alu hake kimui ha fanga kau kehe ‘e fitu na‘e tutue pea matamatakovi ‘aupito mo ‘ūhui; kuo te‘eki te u sio ki hano tatau ‘i he fonua kotoa ‘o ‘Isipite ‘i he kovi. 20Pea ko e fanga kau ‘ūhui mo kovi na‘a nau folofua ‘a e ‘uluaki fanga kau ‘e toko fitu na‘e sisino. 21Pea neongo kuo nau hū ki honau kete, ka na‘e ‘ikai ‘ilonga ‘enau ‘i ai; he na‘a nau matamata kovi ai pē ‘o hangē ko ia ‘i he kamata‘anga, pea u ‘ā ai. 22Pea u vakai ‘i he‘eku misi, pea tā na‘e ‘alu hake ‘i ha sino pē taha ha fo‘i koane ‘e fitu na‘e fuomo‘ui mo lelei; 23pea ‘iloange na‘e tupu hake ha fo‘i koane kehe ‘e fitu na‘e fuomate mo kau pē, mo pakukā ‘i he matangi hahake; 24pea ko e ngaahi fo‘i koane na‘e fuomate na‘a nau folo ‘a e fo‘i koane ‘e fitu na‘e lelei: pea na‘a ku tala ia ki he kau sikalaipe; pea na‘e ‘ikai ha taha te ne mafakamatala kiate au.
25Pea lea ‘a Siosifa kia Felo, ko e misi ‘a e ‘Afiona ‘oku taha pē: kuo fakamatala ‘e he ‘Otua kia Felo ‘a e me‘a ‘oku ne teu fai. 26Ko e kau lelei ‘e toko fitu ko e ta‘u ‘e fitu ia; pea ko e fo‘i koane lelei ‘e fitu ko e ta‘u ‘e fitu ia; ko e misi ‘oku taha pē. 27Pea ko e fanga kau ‘ūhui mo kovi ‘e toko fitu na‘e ‘alu hake kimui ko e ta‘u ‘e fitu ia; pea ko e fo‘i koane ‘e fitu na‘e nge‘esi pē, mo pakukā ‘i he matangi hahake, ko e ta‘u honge ‘e fitu ‘e hoko ai. 28Ko eni ‘a e me‘a kuo u fakamatala kia Felo; ‘oku fakahā ‘e he ‘Otua ki he ‘Afiona ‘a e me‘a ‘oku ne teu ke fai. 29Vakai, ‘oku ha‘u ha ta‘u ‘e fitu ‘a ia ‘e mahu lahi ai ‘a ‘Isipite kātoa; 30pea ‘e hoko ai ha ta‘u honge ‘e fitu, pea ‘e ngalo kotoa ‘a e mahu ‘i he fonua ko ‘Isipite, pea ‘e ‘auha ‘a e fonua ‘i he honge; 31‘io ‘e ‘ikai ‘iloa ‘a e mahu na‘e ‘i he fonua koe‘uhi ko e honge ko ia ‘e hoko ai; he ‘e mamafa ‘aupito ia. 32Pea ko e me‘a ‘i hono ‘ai ‘o lōua ‘a e misi kia Felo, ko hono ‘uhinga kuo pau ‘a e me‘a mei he ‘Otua, pea ‘e vave ‘ene fai.
33Pea ko ia ke vakai ‘e Felo ha tangata ‘oku mafai mo poto, pea ke ne fokotu‘u ia ke angi ki he fonua ko ‘Isipite. 34Pea ke fai ‘e Felo mo fokotu‘u ha kau ‘ōfisa ki he fonua, ke to‘o hono vahe nima ‘o e fonua ko ‘Isipite ‘i he ta‘u ‘e fitu ‘o e mahu. 35Pea ke nau tānaki ‘a e me‘akai kehekehe ‘o e ta‘u lelei ‘e fitu ko ia ‘oku ha‘u, ‘o nau fa‘oaki uite ‘i he malu ‘o Felo, ko e me‘akai ki he‘enau ngaahi kolo, pea ke nau tauhi ia. 36Pea ko e me‘akai ko ia ko e tokonaki ki he fonua ki he ta‘u honge ‘e fitu, ‘a ia ‘e hoko ki ‘Isipite, koe‘uhi ke ‘oua na‘a ‘auha ‘a e fonua ‘i he honge.
Ko Hono Fakanofo ‘o Siosifa ko e Kōvana ‘o ‘Isipite
37Pea na‘e hā lelei ‘a e me‘a kia Felo, mo ‘ene kau tamaio‘eiki kotoa. 38Pea folofola ‘a Felo ki he‘ene kau tamaio‘eiki, Te tau ‘ilo ‘i fē ha taha ‘oku hangē ko eni, ha tangata ‘oku ‘i ai ‘a e laumālie ‘o e ‘Otua? 39Pea folofola ‘a Felo kia Siosifa, Ko e me‘a ‘i he fakahā ‘e he ‘Otua kiate koe ‘a e ngaahi fu‘u me‘a ni, ‘oku ‘ikai ha taha ‘oku mafai mo poto ‘o hangē ko koe. 40Ko koe te ke pule ‘i hoku fale, pea ko hoku kakai kotoa pē te nau fai ‘enau nofo ‘o fakatatau ki ho‘o angi; ko e taloni pē te u mā‘olunga ai ‘iate koe.#Ngā 7.10 41Pea folofola ‘a Felo kia Siosifa, Ko eni kuo u fakanofo koe ke pule ki ‘Isipite kātoa. 42Pea na‘e to‘o ‘e Felo ‘a e mama mei hono nima, ‘o ne ‘ai ki he nima ‘o Siosifa, pea ne fakakofu ‘aki ia ha tupenu mahu‘inga, pea ne ‘ai ha kahoa koula ki hono u‘a;#Tān 5.29 43na‘a ne fakaheka foki ia ki hono ua ‘o ‘ene sāliote; pea na‘a nau kalanga ‘i mu‘a, Punou; pea na‘a ne fakanofo ia ki he fonua kotoa ‘o ‘Isipite. 44Pea na‘e folofola ‘a Felo kia Siosifa, Ko Felo au, pea ‘e ‘ikai ha tangata ‘i he fonua kotoa ‘o ‘Isipite te ne hiki hono nima pe ko hono va‘e ta‘e te ke kau ai. 45Pea na‘e fakahingoa ‘e Felo ‘a Siosifa ko Safinate Peanea, pea na‘a ne ‘ange mōno ‘unoho ‘a ‘Asinate ko e ‘ōfefine ‘o Potifela ko e taula‘eiki ‘o ‘Oni. 46Pea na‘e ‘alu atu ‘a Siosifa kuo ‘iate ia ‘a e fonua ko ‘Isipite. Pea kuo tolungofulu ta‘u ‘a Siosifa ‘i he‘ene tu‘u ‘i he ‘ao ‘o Felo ko e Tu‘i ‘Isipite. Pea na‘e ‘alu atu ‘a Siosifa mei he ‘ao ‘o Felo, ‘o ne angi atu ‘i he fonua kotoa ‘o ‘Isipite.
47Pea ‘i he ta‘u mahu ‘e fitu na‘e fua ngafuhifuhi ‘a e kelekele. 48Pea na‘a ne tānaki ‘a e me‘akai kehekehe ‘o e ta‘u ‘e fitu, ‘a ia na‘e ‘i he fonua kotoa ‘o ‘Isipite, pea ne tuku ‘a e me‘akai ‘i he ngaahi kolo: ko e me‘akai ‘o e tuku‘uta na‘e takatakai ‘a e kolo takitaha na‘a ne tuku ia ‘i he kolo ko ia. 49Pea na‘e fa‘oaki koane ‘e Siosifa ‘o hangē ko e ‘one‘one ‘o e tahi hono lahi, ‘io, na‘e lahi ‘aupito, ko ia na‘e tuku hono fua; he na‘e ‘ikai mafua.
50Pea na‘e fanau‘i kia Siosifa ha ongo foha ‘e toko ua ‘i he te‘eki ke hoko ‘a e ta‘u honge, ‘a ia na‘e fā‘ele‘i kiate ia ‘e ‘Asinate ko e ‘ōfefine ‘o Potifela ko e taula‘eiki ‘o ‘Oni. 51Na‘e fakahingoa ‘e Siosifa ‘a e ‘uluaki ko Manase (ko Fakangalo),#41.51 Manase; ‘Oku vāofi ‘a hono pu‘aki ‘o e hingoá ni mo e faka-Hepelū ‘o e ‘ai ha taha ke ngalo ‘iate ia ha me‘a. he‘ene pehē, Kuo fakangalo ‘e he ‘Otua ‘iate au ‘eku ongosia kotoa, mo e fale kotoa ‘o ‘eku tamai. 52Pea na‘a ne fakahingoa ‘a hono ua ko ‘Ifalemi (ko Fua-loua),#41.52 ‘Ifalemi; ‘Oku vāofi ‘a hono pu‘aki ‘o e hingoá ni mo e faka-Hepelū ‘o e ma‘u fānaú. he‘ene pehē, He kuo fakafua au ‘e he ‘Otua ‘i he fonua ‘o ‘eku tu‘utāmaki.
53Pea na‘e ‘osi ‘a e ta‘u ‘e fitu ‘o e mahu, ‘a ia na‘e hoko ki he fonua ko ‘Isipite. 54Pea na‘e kamata hoko ‘a e ta‘u ‘e fitu ‘o e honge, ‘o hangē ko e lea ‘a Siosifa: pea ko e honge na‘e ‘i he ngaahi fonua kotoa pē; ka ‘i he ngaahi feitu‘u ‘o ‘Isipite na‘e ‘i ai ha me‘akai.#Ngā 7.11 55Pea ‘i he faifai pea honge ‘a e ngaahi feitu‘u kehekehe ‘o ‘Isipite, pea tangi ‘a e kakai kia Felo ke ‘omi ha me‘akai: pea tala ‘e Felo ki he kakai ‘Isipite, Mou ō kia Siosifa; pea ‘ilonga ha me‘a ‘oku ne tala kiate kimoutolu, mou fai.#Sioné 2.5 56Pea ko e honge na‘e ‘i he funga ‘o māmani kotoa, pea na‘e fakaava ‘e Siosifa ‘a e ngaahi feleoko, ‘o ne fakatau ki he kakai ‘Isipite; pea na‘e faifai pea mamafa ‘a e honge ‘i ‘Isipite. 57Pea na‘e ha‘u ki ‘Isipite ‘a e ngaahi fonua kehekehe ke fakatau me‘akai meia Siosifa; he na‘e mamafa ‘a e honge ‘i he fonua kotoa pē.
Currently Selected:
KO SĒNESI 41: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.