KO SĒNESI 34
34
Ko e Fakamālohi‘i ‘o Taina
1PEA ko Taina ko e ta‘ahine ‘a Lia, ‘a ia na‘a ne fā‘ele‘i kia Sēkope, na‘a ne ‘alu atu ke fe‘iloaki mo e kau ta‘ahine ‘o e fonua. 2Pea ko Sikemi ko e foha ‘o Hēmoa ko e Hevi, ko e ‘eiki ‘o e fonua, na‘a ne sio ki he ta‘ahine, ‘o ne puke ia, ‘o ne mohe mo ia ‘o kākaa‘i. 3Pea na‘e pīkitai hono loto kia Taina ko e ‘ōfefine ‘o Sēkope, pea ne ‘ofa ki he ta‘ahine, ‘o ne lea ke fakafiemālie ia.#34.3 ‘o… fakafiemālie ia; pe ‘o ne feinga ke ne manako ‘iate ia. 4Pea lea ‘a Sikemi kia Hēmoa ko ‘ene ‘eiki, ‘o pehē, Ke ke ma‘u mai ‘a e finemui ni mōku ‘unoho.
5Pea fanongo ‘e Sēkope kuo ne ‘uli‘i hono ‘ōfefine ko Taina; ka kuo ‘i ‘uta hono ngaahi foha ‘i he‘ene fanga manu: ko ia na‘e fakalongo pē ‘a Sēkope kae‘oua ke nau ō mai. 6Pea me‘a atu ‘a Hēmoa ko e tamai ‘a Sikemi kia Sēkope ke alea mo ia. 7Pea omi mei ‘uta ‘a e ngaahi foha ‘o Sēkope ‘i he‘enau fanongo ki ai: pea na‘e mamahi ‘a e kau tangata ko ia, pea nau ‘ita lahi koe‘uhi kuo ne fai ha me‘a fakalielia ‘i ‘Isileli, ‘i he‘ene mohe mo e ‘ōfefine ‘o Sēkope; ‘a ia ko e me‘a na‘e tāpuhā. 8Pea na‘e alea ‘a Hēmoa mo kinautolu, ‘o ne pehē, ‘Oku piki ‘a e loto ‘o hoku foha ko Sikemi ki ho‘omou ki‘i fefine: ‘ē, mou foaki ‘a e ta‘ahine kiate ia mōno uaifi. 9Pea tau femali‘aki: mou ‘omi homou ngaahi ‘ōfefine kiate kimautolu, pea ma‘u homau ngaahi ‘ōfefine kiate kimoutolu. 10Pea tau toki nonofo: ‘e ‘atā ‘a e fonua ni kiate kimoutolu: mou nofo ai ‘o fai fakatau, pea ma‘u tofi‘a ‘i ai.
11Pea lea ‘a Sikemi ki he tamai ‘a e fefine, pea ki hono ngaahi tuonga‘ane, Mou ‘ofa foki ki he‘eku me‘a, pea neongo pe ko e hā te mou tala mai, te u ‘atu. 12Neongo pe ko e hā ha fu‘u koloa te mou ‘eke kiate au ma‘amoutolu pea ma‘a e ta‘ahine, ka te u ‘atu pē: ha me‘a pē te mou tala mai: ka mou tuku mai ‘a e ta‘ahine ke ma nonofo.
13Pea ko e ngaahi foha ‘o Sēkope na‘a nau vosa‘i ‘a Sikemi mo ‘ene tamai ko Hēmoa, pea nau puleaki‘i kinaua, koe‘uhi kuo ne ‘uli‘i ‘a Taina ko honau tuofefine. 14Ko ia na‘a nau tali kiate kinaua, ‘E ‘ikai te mau lava ke fai ‘a e me‘a ko eni, ke ‘atu homau tuofefine ki ha tangata ‘oku ‘ikai ke kamu; he ko e me‘a fakamā ia kiate kimautolu: 15ko e me‘a pē ko eni te mau loto ai ki ho‘omou me‘a: ‘o kapau te mou fai tatau mo kimautolu, ‘o mou kamu ‘a e tangata kotoa pē; 16pea te mau toki ‘atu ai homau ngaahi ‘ōfefine kiate kimoutolu, pea mau to‘o homou ngaahi ‘ōfefine mo‘omautolu, pea te tau nonofo, ‘o hoko ko e kakai pē taha. 17Ka ‘o kapau ‘e ‘ikai te mou fai ki he me‘a ‘oku mau tala, ‘o kamu, pea te mau to‘o homau ki‘i fefine, ‘o ‘alu.
18Pea na‘e hā lelei ‘enau lea kia Hēmoa mo hono foha ko Sikemi. 19Pea na‘e ‘ikai fakatotoka ‘e he talavou ke fai ‘a e me‘a, he na‘a ne mamana ki he ‘ōfefine ‘o Sēkope: pea ko e fahu ia ‘o e fāmili ‘o ‘ene ‘eiki.
20Pea na‘e me‘a ange ‘a Hēmoa mo hono foha ko Sikemi ki he matapā ‘o hona kolo, ‘o nau alea mo e kau tangata ‘o hono kolo, ‘o pehē, 21Ko e kau tangata ni ‘oku lelei ‘enau fakafeangai kiate kitautolu; ‘ē, tau tuku mu‘a ke nau nofo ‘i he fonua, ‘o fai fakatau ai; he vakai ‘oku fu‘u ‘atā ‘a e fonua kiate kinautolu; tau to‘o honau ngaahi ‘ōfefine mōtau ‘unoho, pea tau ‘atu hotau ngaahi ‘ōfefine kiate kinautolu. 22Ka ko e me‘a ni pē ‘e loto ai ‘a e kau tangata ke nonofo mo kitautolu, ‘o kakai taha mo kitautolu, ‘a e kamu ‘o ‘etau kau tangata kotoa pē, ‘o hangē ko kinautolu. 23Pea ko ‘enau fanga manu mo ‘enau koloa, ‘io, ‘a ‘enau manu ngāue fua pē, ‘ikai ‘e hoko ia ko ‘etau me‘a? kehe pē ke tau fai ki honau loto, pea te nau nofo pē mo kitautolu. 24Pea na‘e tali ‘a e lea ‘a Hēmoa mo hono foha ko Sikemi ‘e he kakai kotoa na‘e kau ki hona kolo; pea na‘e kamu ‘a e kau tangata kotoa pē na‘e kau ki he kolo.
25Pea ‘i hono tolu ‘o e ‘aho, lolotonga na‘a nau fakailiili, na‘e hanga ‘a e ongo foha ‘o Sēkope, ko Simione mo Līvai, ko e ongo tuonga‘ane ‘o Taina, ‘o na to‘o ‘ena heletā, ‘o na hū ta‘emanavahē ki he kolo, ‘o na taa‘i ‘a e tangata kotoa pē; 26kae‘uma‘ā na‘a na have‘i ‘aki ‘a e mata ‘o e heletā ‘a Hēmoa mo hono foha ko Sikemi; pea na to‘o ‘a Taina mei he fale ‘o Sikemi, ‘o na hū kitua‘ā. 27Na‘e ha‘u ‘a e ngaahi foha ‘o Sēkope ki he pekia, ‘o nau vete ‘a e kolo, koe‘uhi kuo nau ‘uli‘i honau tuofefine. 28Na‘a nau ‘ave ‘enau fanga manu iiki, mo ‘enau fanga manu lalahi, mo ‘enau fanga ‘asi ‘a ia na‘e ‘i he kolo mo ia na‘e ‘i he vao; 29pea nau ‘ave ‘enau koloa kotoa, mo e kau tamaiki, mo honau ngaahi uaifi, ‘io, na‘a nau vete mo e me‘a kotoa pē ‘i fale.
30Pea pehē ‘e Sēkope kia Simione mo Līvai, Kuo mou fakatupu mamahi kiate au, ‘i ho‘omou fakanamukuu‘i au ‘i he lotolotonga ‘o e kakai ‘o e fonua, ‘a e ha‘a Kēnani, mo e ha‘a Pēlisi: pea ‘oku ou kaungatāmaki au, pea te nau fakataha mai ko hoku ngaohi, pea te nau taa‘i au: pea te u ‘auha, ‘a au mo hoku fale.
31Ka ka tali ‘e kinaua, He ko e pehē koā ke ne fai ki homa tuofefine ‘o hangē ko ha fefine fe‘auaki ia.
Currently Selected:
KO SĒNESI 34: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.