KO SĒNESI 29
29
Ko e A‘u ‘a Sēkope ki he ‘Api ‘o Lēpaní
1PEA hiki ‘e Sēkope hono fononga ki he fonua ‘o e kakai Hahake. 2Pea ne vakai, tā ko e vai ‘ena ‘i he toafa, pea ko e tākanga sipi ‘e tolu ‘oku tākoto ofi ai; he ko e vai ia na‘a nau fakainu mei ai ‘a e fanga manu; pea ko e maka na‘e tāpuni ‘aki ‘a e vai ko e maka lahi. 3Pea na‘e ‘oua pē ke tānaki ki ai ‘a e fanga manu kotoa pē, pea nau toki teka‘i ‘a e maka mei he ngutu vai, ‘o nau fakainu ‘a e fanga sipi, pea nau toe ‘ai ‘a e maka ki hono potu ki he ngutu vai.
4Pea na‘e lea ‘a Sēkope kiate kinautolu, kāinga, ko e kakai mei fē kimoutolu? Pea nau tali, Ko e kakai Kālana kimautolu.
5Pea ne pehē ange, ‘Oku mou ‘ilo ‘a Lēpani ko e foha ‘o Nēhoa? Pea nau pehē ‘Oku mau ‘ilo ia.
6Pea ne pehē kiate kinautolu, ‘Oku ne lelei? Pea nau tali, ‘Oku ne lelei pē; pea ko hono ‘ōfefine ‘ena ko Lesieli ‘oku ha‘u mo e fanga, sipi.
7Pea ne pehē, Ka ‘oku kei ho‘atā fau, kei tuai ‘a e tānaki ‘o e fanga manu; mou fakainu ‘a e fanga sipi, ‘o ‘ave ‘o fafanga.
8Pea nau tali, ‘E ‘ikai te mau lava, kae‘oua ke tānaki mai ‘a e ngaahi tākanga sipi kotoa pē, ‘o nau fakateka ‘a e maka mei he funga vai; pea mau toki fakainu ‘a e sipi.
9Pea lolotonga ‘enau talanoa mo e ha‘u ‘a Lesieli mo e fanga sipi ‘a ‘ene ‘eiki; he na‘e ‘a‘ana hono tauhi. 10Pea ‘i he mamata leva ‘e Sēkope kia Lesieli ko e ‘ōfefine ‘o Lēpani ko e tuonga‘ane ‘o ‘ene fa‘ē, mo e fanga sipi ‘a Lēpani ko e tuonga‘ane ‘o ‘ene fa‘ē, na‘a ne ‘unu‘unu atu, ‘o fakateka ‘a e maka mei he ngutu vai, ‘o ne fakainu ‘a e fanga sipi ‘a Lēpani ko e tuonga‘ane ‘o ‘ene fa‘ē. 11Pea na‘e ‘uma ‘e Sēkope kia Lesieli, ‘o ne hua‘aki ‘ene fu‘u fākafoa. 12Pea tala ‘e Sēkope kia Lesieli, ko e tokoua ia ‘a ‘ene tamai, pea ko e tama ‘a Lepeka: pea lele ‘a e ta‘ahine, ‘o fakahā ki he‘ene tamai.
13Pea ‘i he fanongo leva ‘e Lēpani ki he pehē, Ko Sēkope ‘ena ko e tama ‘a hono tuofefine, na‘a ne lele ke fakafetaulaki kiate ia, ‘o ne fā‘ofua ki ai mo ne fekita kiate ia, ‘o ne fakahū mai ki hono fale. Pea fakamatala ‘e ia kia Lēpani ‘a e ngaahi me‘a ko ia kotoa. 14Pea pehē ‘e Lēpani kiate ia, Tā ko hoku hui koe mo hoku kakano. Pea na‘a na nonofo ‘o māhina kātoa.
Ko e Ngāue ‘a Sēkope ‘ia Lēpani kia Lesiaeli mo Lia
15Pea pehē ‘e Lēpani kia Sēkope, ‘oku totonu koā ho‘o ngāue ta‘etotongi mai koe‘uhi ko hoku kāinga? tala mai mu‘a pe ko e hā ‘a e totongi ‘e fai atu? 16Pea na‘e ma‘u ‘e Lēpani ha ongo ‘ōfefine ‘e toko ua: ko e hingoa ‘o e lahi ko Lia, pea ko e hingoa ‘o e si‘i ko Lesieli. 17Pea na‘e matakuikui ‘a Lia,#29.17 matakuikui; pe ongo mata faka‘ofo‘ofa. ka ko Lesieli na‘e hōihoifua mo matamatalelei.
18Pea na‘e ‘ofa ‘a Sēkope kia Lesieli; pea ne pehē, Te u ngāue kiate koe ‘o ta‘u fitu koe‘uhi ko Lesieli ko ho ‘ōfefine ki mui.
19Pea pehē ‘a Lēpani, ‘Oku lelei mu‘a ‘eku ‘atu ia kiate koe ‘i ha‘aku ‘atu ki ha tangata kehe: nofo mai kiate au. 20Pea na‘e ngāue ‘a Sēkope koe‘uhi ko Lesieli, ‘o fitu ta‘u; pea na‘e hangē kiate ia ko e ngaahi ‘aho si‘i pē, koe‘uhi ko ‘ene ‘ofa kiate ia.
21Pea na‘e toki lea ‘a Sēkope kia Lēpani, ‘o pehē, Ke ke tuku mai hoku uaifi, he kuo ‘osi hoku taimi, ka u ‘alu kiate ia. 22Pea fakataha ‘e Lēpani ‘a e kakai kotoa pē ‘o e feitu‘u, ‘o ne fai ha kātoanga. 23Pea ‘i he‘ene efiafi na‘a ne to‘o hono ‘ōfefine ko Lia, ‘o ne ‘ave ia kiate ia; pea ne ‘alu ki ai. 24Pea foaki ‘e Lēpani ‘a ‘ene kaunanga ko Sīlipa ki hono ‘ōfefine ko Lia ma‘ane kaunanga. 25Pea ‘i he‘ene pongipongi leva tā ko Lia ia: pea ne pehē kia Lēpani, Ko e hā ‘a e me‘a ni kuo ke fai kiate au? ‘Ikai ko Lesieli na‘a ku ngāue ai kiate koe? Pea ko e hā kuo ke kākaa‘i ai au?
26Pea tali ‘e Lēpani, ‘Oku ‘ikai ha fai pehē ‘i homau feitu‘u, ke tomu‘a mali ‘a e tehina ‘i he ta‘okete. 27Fakakakato ‘a e uike ‘o ‘eni, pea te mau toki ‘atu mo ‘ena foki, koe‘uhi ko e ngāue te ke fai kiate au, ‘o toe ta‘u ‘e fitu atu.
28Pea fai pehē ‘e Sēkope, ‘o ne fakakakato ‘a e uike ‘o e fefine ko ē: pea ne ‘atu kiate ia hono ‘ōfefine ko Lesieli mōno uaifi. 29Pea na‘e foaki ‘e Lēpani ki hono ‘ōfefine ko Lesieli ‘a ‘ene kaunanga ko Pīla‘a ma‘ane kaunanga ‘a‘ana. 30Pea ne ‘alu foki kia Lesieli, pea ne ‘ofa foki kia Lesieli ‘o lahi ‘ia Lia; pea ne ngāue foki kiate ia, ‘o toe fitu ta‘u atu.
Ko e Fānau ‘a Sēkopé
31Pea ‘i he ‘afio‘i ‘e Sihova ‘oku fai ha fehi‘a kia Lia, na‘a ne fakafanau ia; ka ka pa‘a pē ‘a Lesieli. 32Pea feitama ‘a Lia, pea ne fā‘ele‘i ha tama tangata, pea ne fakahingoa ia ko Lūpeni (ko Vakai-ko-e-tama);#29.32 Lūpeni; ‘Oku vāofi ‘a hono pu‘aki ‘o e hingoá ni mo e faka-Hepelū ‘o e Vakai, ko e tama mo e Kuó ne sio mai ki hoku faingata‘a‘iá. he‘ene pehē, Koe‘uhi ā kuo vakai ‘e Sihova ki hoku ngaohikovi‘i, he ko eni ‘e ‘ofa kiate au ‘a hoku husepāniti. 33Pea ne toe feitama, ‘o ne fā‘ele‘i ha tama tangata; pea ne pehē, Tā kuo fanongo ‘e Sihova: ‘oku fai ha fehi‘a kiate au, pea kuo ne foaki mai mo e me‘a ni foki: pea ne fakahingoa ia ko Simione (ko Fanongo).#29.33 Simione; ‘Oku vāofi ‘a hono pu‘aki ‘o e hingoá ni mo e faka-Hepelū ‘o e fanongo. 34Pea ne toe feitama ‘o ne fā‘ele‘i ha tama tangata; pea ne pehē, Ko e taimi ko eni ‘e pīkitai ‘a hoku husepāniti kiate au, he kuo u fā‘ele‘i ma‘ana ha tangata ‘e toko tolu: ko ia na‘e fakahingoa ia ko Līvai [ko Fakapiki].#29.34 Līvai; ‘Oku vāofi ‘a hono pu‘aki ‘o e hingoá ni mo e faka-Hepelū ‘o e fakapipiki, ha‘i. 35Pea ne toe feitama, ‘o fā‘ele‘i ha tama tangata; pea ne pehē, Ko e taimi ni te u fakamālō kia Sihova: ko ia na‘a ne fakahingoa ia ko Siuta [ko Fakamālō];#29.35 Siuta; ‘Oku vāofi ‘a hono pu‘aki ‘o e hingoá ni mo e faka-Hepelū ‘o e mālō, fakahīkihiki. pea motu ai ‘ene fanau.
Currently Selected:
KO SĒNESI 29: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.