KO SĒNESI 28
28
1KO ia na‘e ui mai ‘e ‘Aisake ‘a Sēkope, ‘o ne fai hono tāpuaki; pea ne tu‘utu‘uni ia ‘o pehē, ‘oua te ke mali mo ha ‘ōfefine ‘o ha taha Kēnani. 2Tu‘u, ‘o ‘alu ki Mesopotēmia, ki he ‘api ‘o Petueli ko e tamai ‘a ho‘o fa‘ē; pea ke kumi ai hao uaifi mei he fānau ‘a Lēpani ko e tuonga‘ane ‘o ho‘o fa‘ē. 3Pea ‘ofa ke tāpuaki‘i koe ‘e Sātai koe ‘Otua, pea ke ne ‘ai ke ke fanafanau mo tupu ke lahi, pea ke ke hoko ko e koto kakai; 4pea ke ne ‘atu ‘a e tāpuaki ‘o ‘Epalahame mo‘ou, pea mo ho hako foki; ke tō mo‘o tofi‘a ‘a e fonua ‘oku ke nofo muli ai, ‘a ia na‘e foaki ‘e he ‘Otua mo‘o ‘Epalahame.#Sēn 17.4-8 5Pea tuku atu ‘e ‘Aisake ‘a Sēkope, pea ne ‘alu ki Mesopotēmia ki he matāpule Sīlia ko Lēpani, ko e foha ‘o Petueli, pea ko e tuonga‘ane foki ‘o Lepeka ko e fa‘ē ‘a Sēkope mo ‘Īsoa.
Ko e Toe Mali ‘a ‘Īsoa mo e Fefine ‘e Taha
6Pea hā kia ‘Īsoa kuo fai ‘e ‘Aisake ‘a e tāpuaki ‘o Sēkope, pea kuo ne fekau atu ia ki Mesopotēmia, ke kumi hono uaifi mei ai; kae‘uma‘ā foki ‘i he‘ene fai hono tāpuaki kuo ne na‘ina‘i ia ‘o pehē, ‘E ‘ikai te ke mali mo ha ‘ōfefine ‘o ha taha Kēnani; 7pea kuo tuitala foki ‘a Sēkope ki he‘ene tamai mo ‘ene fa‘ē, pea kuo ne ‘alu ki Mesopotēmia; 8ko ia ‘i he vakai ‘e ‘Īsoa ‘oku tokotokangatāmaki ‘a e finangalo ‘o ‘ene ‘eiki ko ‘Aisake ki he kau fefine Kēnani; 9ko ia na‘a ne ‘alu ki ha‘a ‘Isime‘eli, ‘o ne fakalahi ‘aki ‘a e ongo uaifi kuo ne ma‘u ha fefine ‘e taha ko Mahalati ko e ‘ōfefine ‘o ‘Isime‘eli ko e foha ‘o ‘Epalahame, pea ko e tuofefine ‘o Nepaiote.
Ko e Misi ‘a Sēkope ‘i Pēteli
10Pea na‘e ‘alu atu ‘a Sēkope mei Peasipa, ‘o ne fononga ki Kālana. 11Pea ne hoko fāinoa ki ha feitu‘u, pea ne nofo ai ‘i he pō ko ia, he kuo tō ‘a e la‘a; pea ne to‘o ha taha ‘o e ngaahi maka ‘o e feitu‘u, ‘o ne fokotu‘u mōno ‘olunga, pea ne tokoto ai ‘i he potu ko ia ke mohe. 12Pea ne misi, pea tā ko ha tu‘unga kuo tu‘u ‘i he kelekele, ‘o tau hake hono ‘ulu ki he langi; pea ko e kau ‘Āngelo ‘ena ‘a e ‘Otua ‘oku ‘alu hake mo ‘alu hifo ‘i ai.#Sioné 1.51 13Pea tā ko Sihova ‘oku tu‘u mei ‘olunga,#28.13 mei ‘olunga; pe ‘i hono tafa‘akí. ‘o ne folofola mai, Ko au ko Sihova ko e ‘Otua ‘o ‘Epalahame ko ho‘o ‘eiki, pea ko e ‘Otua ‘o ‘Aisake; ko e kelekele ‘oku ke tokoto ai, te u ‘atu ia mo‘ou mo ho hako;#Sēn 13.14-15 14pea ‘e hoko ho hako ke tatau mo e efu ‘o e fonua, pea te ke mafola koe ki lulunga, mo hahake, mo e tokelau, mo e tonga; pea ‘e monū‘ia ‘iate koe ‘a e fa‘ahinga kotoa pē ‘o e kelekele, pea ‘i ho hako foki.#28.14 ‘e monū‘ia… kelekele; pe ‘e kole mai ‘a e pule‘anga kotoa pē ke u fakamonū‘ia‘i kinautolu, ‘o hangē ko ‘eku fakamonū‘ia‘i koe mo ho hakó. #Sēn 12.3; 22.18 15Pea ko eni ko au te u ‘iate koe, pea te u tauhi koe ‘i ho ngaahi founga kotoa pē, pea te u fakafoki koe ki he kelekele ko eni; he ‘e ‘ikai te u li‘aki koe kae‘oua ke u fai ‘a e ngaahi me‘a kuo u lea ai kiate koe.
16Pea ofo ‘a Sēkope mei he‘ene mohe, pea ne pehē, Tā ‘oku ‘afio ‘a Sihova ‘i he potu ni, ka u ta‘e‘ilo ki ai ‘e au. 17Pea na‘a ne manavahē, ‘o ne pehē, Hono ‘ikai fakalilifu ‘a e potu ni; ‘oku ‘ikai ko ha potu kehe eni, ka ko e fale ‘o e ‘Otua, ‘io, ko e matapā eni ‘o langi.
18Pea tu‘u hengihengi hake ‘a Sēkope, pea ne to‘o ‘a e maka kuo ne ‘olunga ‘aki, pea ne fokotu‘u ia ko e pou, pea ne lilingi ha lolo ki hono funga. 19Pea ne fakahingoa ‘a e potu ko ia ko Pēteli (ko Fale-‘o-e-‘Otua); ka ko Lusa ‘a e hingoa ‘o e kolo ‘i mu‘a. 20Pea fai ai ‘e Sēkope ‘ene tukumo‘ui, he‘ene pehē, Kapau ‘e ‘iate au ‘a e ‘Otua, pea ne tauhi au ‘i he hala ko eni ‘oku ou ‘alu ai, pea ne tuku mai ha mā ke u kai, mo ha kofu ke u ‘ai, 21ka u toe ha‘u lelei ki he fale ‘o ‘eku ‘eiki; ‘e toki hoko ‘a Sihova ko hoku ‘Otua; 22pea ko e maka ni, ‘a ia kuo u fokotu‘u ko e pou, ‘e hoko ia ko e fale ‘o e ‘Otua; pea ‘ilonga ha me‘a te ke ‘omi kiate au te u mātu‘aki ‘atu hono vahe hongofulu kiate koe.
Currently Selected:
KO SĒNESI 28: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.