KO SĒNESI 27
27
Ko hono Tāpuaki‘i ‘e ‘Aisake ‘a Sēkope
1PEA na‘e faifai pea motu‘a ‘a ‘Aisake, pea po‘uli hono fofonga. Pea ne ui mai ‘a hono ‘uluaki foha ko ‘Īsoa, ‘o ne pehē ki ai, Tama; pea tali ‘e ia, Ko au.
2Pea ne pehē, Hanga mai, ko eni kuo u motu‘a, ‘oku ‘ikai te u ‘ilo pe te u pekia fakakū: 3ko ia ke ke kātaki ‘o to‘o ho‘o nāunau, ‘a ho‘o hōfangahau mo ho‘o kaufana, pea ke ‘alu ki he vao ‘o kumi mai ha‘aku kiki; 4pea ke ngaohi ha‘aku lo‘i manu, ‘a e me‘a ‘oku ou manako ai, pea ke ‘omi kiate au ke u kai: hei‘ilo ‘e lava ai ‘a hoku loto ke fai ho tāpuaki‘i ‘i he te‘eki ke u mate.
5Ka ka fanongo pē ‘e Lepeka, lolotonga ‘a e fai ‘e ‘Aisake ‘ene me‘a ki hono foha ko ‘Īsoa. Pea na‘e ‘alu ‘a ‘Īsoa ki he vao ke kumi mai ha manu. 6Pea lea ‘a Lepeka ki he‘ene tama ko Sēkope, ‘o pehē, ‘Ē, na‘a ku fanongo ki ho‘o ‘eiki ‘ene me‘a kia ‘Īsoa ko ho ta‘okete, ‘o pehē, 7‘Omi mu‘a ha‘aku manu, pea ngaohi ha‘aku lo‘i manu ke u kai, ka u fai ho tāpuaki‘i ‘i he ‘ao ‘o Sihova ‘i he te‘eki te u mate. 8Ko ia ke ke tuitala, tama, ki he‘eku lea, fai ki he me‘a te u tu‘utu‘uni atu. 9‘Alu pē ki he fanga manu, pea ‘omi mei ai kiate au ha ongo ki‘i kosi lelei; ka u ngaohi ‘aki ia ha lo‘i manu ma‘a ho‘o ‘eiki, ‘a e me‘a ‘oku ne manako ai; 10pea ke ‘ave ‘e koe ki ho‘o ‘eiki ke ne tokoni; hei‘ilo te ne tāpuaki‘i koe ‘i he te‘eki ke ne pekia.
11Pea tali ‘e Sēkope ki he‘ene fa‘ē ko Lepeka, ‘Ā, ko ‘Īsoa ko hoku ta‘okete ko e tama fulufulua, ka ‘oku te hamolemole kita: 12pea na‘a fā ‘a e tangata‘eiki kiate au, pea te u hā kiate ia ko e pau‘u, pea te u fakatō kiate au ha mala, ‘o ‘ikai ko e monū.
13Pea tali ‘e he‘ene fa‘ē, Ke tō mai kiate au, tama, hao fakamala‘ia; kehe pē ke ke tuitala ki he‘eku lea, pea ke ‘alu ‘o ‘omi ‘a e me‘a. 14Pea ne ‘alu, ‘o to‘o, ‘o ‘omi ki he‘ene fa‘ē: pea hanga ‘ene fa‘ē ‘o ngaohi lo‘i manu ‘aki, ‘a ia ko e manako ‘o ‘ene tamai. 15Pea to‘o ‘e Lepeka ha ngaahi kofu ‘o ‘ene tama lahi ko ‘Īsoa, ‘a e ngaahi kofu mahu‘inga na‘e ‘iate ia ‘i he fale, pea ne ‘ai ia kia Sēkope ko ‘ene tama kimui: 16pea ne ‘ai foki ‘a e kili ‘o e ongo kosi ki hono ongo nima, pea mo hono u‘a mo ‘ene molemole: 17pea ne tuku ki he nima ‘o ‘ene tama ko Sēkope ‘a e lo‘i manu mo e mā kuo ne ngaohi.
18Pea hū atu ia ki he loki ‘o ‘ene tamai, pea ne pehē, ‘Ala: pea pehē ‘e ia, Ko au; ka ko hai koe, siana?
19Pea tali ‘e Sēkope ki he‘ene tamai, Ko ‘Īsoa au, ko ho ‘uluaki; kuo u fai pē ‘o hangē ko ho‘o me‘a mai: me‘a hake ā, ‘o ta‘utu, pea ‘ilo ‘eku fita‘a ni; hei‘ilo ‘e fai hoku tāpuaki‘i ‘e ho finangalo.
20Pea me‘a ‘a ‘Aisake ki hono foha, Tama, na‘e fēfē ho‘o ma‘u vave pehē?
Pea pehē ‘e ia, Koe‘uhi na‘e fakafekitaki ia kiate au ‘e Sihova ko ho ‘Otua.
21Pea me‘a ‘a ‘Aisake kia Sēkope, Tama, ‘unu‘unu mai mu‘a ke u fā kiate koe, pe ko hoku foha ko ‘Īsoa mo‘oni koe, pe ‘ikai. 22Pea ‘unu‘unu atu ‘a Sēkope ki he‘ene ‘eiki ko ‘Aisake, pea ne fā ia, ‘o ne pehē, Ko e le‘o ko e le‘o ‘o Sēkope, ka ko e nima ko e nima ‘o ‘Īsoa. 23Pea na‘e ‘ikai te ne mea‘i ia, koe‘uhi na‘e fulufulua hono nima ‘o hangē ko e nima ‘o ‘Īsoa ko hono ta‘okete: ko ia na‘a ne tāpuaki‘i ia. 24Pea ne pehē, Ko hoku foha ko ‘Īsoa mo‘oni koe? Pea tali ‘e ia, Ko au.
25Pea ne pehē ‘unuaki mai kiate au ka u kai ‘a e fita‘a ‘a si‘oku foha, koe‘uhi ke fai ho tāpuaki ‘e hoku loto. Pea na‘a ne toloaki atu ‘a e me‘a, pea ne fai ‘ene taumafa; pea ne ‘ange foki ha‘ane uaine pea ne inu. 26Pea me‘a kiate ia ‘e ‘Aisake ko ‘ene ‘eiki, Tama, ke ke ‘unu‘unu mai, ‘o ‘uma kiate au. 27Pea ne ‘unu‘unu ki ai, ‘o ‘uma kiate ia: pea taufa mai ‘a e nanamu ‘o hono kofu, pea ne tāpuaki‘i ia, ‘o pehē.
Uoi! ‘a e nanamu ‘o hoku foha,
Hangē he nanamu he toafa,
Kuo tāpuaki‘i ‘e Sihova;#Hep 11.20
28Pea tuku ‘e ‘Otua ho ‘inasi,
‘A ia ko e hahau ‘o e langi.
Mo e kelekele ‘oku fungani,
Mo e koane mo e uaine ke lahi:
29Ke tauhi koe ‘e he ngaahi kakai,
Pea punou atu he ngaahi matakali;
Ke ke hau koe ki ho ngaahi tokoua
Pea punou atu he fānau ‘a ho‘o finemotu‘a.
Ke mala‘ia ‘a ia te ne tutuku‘i koe,
Pea monū‘ia ‘a ia te ne tāpuaki‘i koe.#Sēn 12.3
Ko e Holi ‘a ‘Īsoa ki he Tāpuaki ‘o ‘Aisaké
30Pea kuo ‘osi ‘a e tāpuaki‘i ‘e ‘Aisake ‘a Sēkope, pea kuo toki sītu‘a ‘a Sēkope ki he‘ene tamai ko ‘Aisake, mo e hū mai ‘a hono tokoua ko ‘Īsoa mei he‘ene tulimanu. 31Pea kuo ngaohi ‘e ia foki ha lo‘i manu, pea ne ‘omi ki he‘ene tamai, ‘o ne pehē ki ai, ‘Alā, ke ke me‘a hake pea ke ‘ilo ‘a e fita‘a ‘a ho foha: hei‘ilo ‘e fai hoku tāpuaki‘i ‘e ho finangalo.
32Pea fehu‘i kiate ia ‘ene ‘eiki ko ‘Aisake, Ko hai koe? Pea ne tali, Ko ho foha au, ‘a ho ‘uluaki, ‘a ‘Īsoa.
33Pea fu‘u tetetete lahi ‘aupito ‘a ‘Aisake, ‘o ne pehē, Ko hai tū ia ne ne ma‘u manu, ‘o ‘omi kiate au, pea kuo u hili kai ai te‘eki te ke ha‘u, pea kuo u tāpuaki‘i ia? ‘io pea ‘e ‘a‘ana foki ‘a e tāpuaki.
34Pea ‘i he fanongo ‘e ‘Īsoa ki he me‘a ‘a ‘ene ‘eiki, na‘a ne ‘ai ‘ene fu‘u fākafoa lahi mo fakamamahi ‘aupito, mo ne pehē ki he‘ene ‘eiki, Tāpuaki au, ‘alā, ‘a au foki.
35Pea me‘a mai ‘e ia; Kuo ha‘u fakakākā mai ‘a ho tokoua, pea kuo ne ‘ave ho tāpuaki.
36Pea ne pehē, Hono ‘ikai mo‘oni hono hingoa ko Sēkope (ko Hākiva‘e)? He ko hono tu‘o ua eni ‘ene fiemua‘i au: na‘a ne ‘ave mu‘a hoku tu‘unga-hoko, pea vakai kuo ne toe ‘ave eni ‘a hoku tāpuaki. Pea ne pehē, Kuo ‘ikai te ke ta‘ofi ha tāpuaki ma‘aku?#27.36 Sēkope; ‘Oku vāofi ‘a hono pu‘aki ‘o e hingoá ni mo e faka-Hepelū ‘o e kākaá.
37Pea tali ‘e ‘Aisake, ‘o ne pehē kia ‘Īsoa, Ko eni kuo u fakanofo ia ko ho‘o ‘eiki, pea kuo tuku ke tamaio‘eiki kiate ia hono kāinga kotoa pē, pea kuo u tuku ‘a e koane mo e uaine mōno tauhi: pea ko e hā te u fai ma‘au, nga‘ata?
38Pea tali ‘e ‘Īsoa ki he‘ene ‘eiki, ‘Alā, na‘e taha tofu pē ho‘o tāpuaki? ke ke tāpuaki au, ‘alā, ‘a au foki. Pea ‘ai atu ‘e ‘Īsoa hono le‘o, ‘o fākafoa.#Hep 12.17
39Pea tali ‘ene ‘eiki ko ‘Aisake ‘o ne pehē kiate ia,#Hep 11.20
‘E! he mama‘o ho nofo‘anga he kelekele lelei,
Mo e hahau ‘oku hifo mei langi;
40Ko ho‘o heletā te ke ma‘u ai ho fafanga,#Sēn 36.8; 2 Tu‘i 8.20
Pea ke tamaio‘eiki ki ho tokoua;
Ka ‘oka faifai pea ke mofuta,#27.40 mofuta; pe angatu‘u.
‘E motu ‘ene kola mei ho u‘a.
41Pea na‘e lama ‘e ‘Īsoa ‘a Sēkope, koe‘uhi ko e tāpuaki‘i ia ‘e he‘ene ‘eiki: pea pehē ‘e ‘Īsoa ‘i hono loto, ‘Oku tu‘unuku mai ‘a e tēngihia ‘o ‘eku ‘eiki; pea u toki fakapoongi ‘a hoku tokoua ko Sēkope.
42Pea na‘e fakahā kia Lepeka ‘a e ngaahi lea ‘a ‘ene tama lahi ko ‘Īsoa; pea ne fekau ke ui mai ‘a ‘ene tama ki mui ko Sēkope, pea ne pehē kiate ia, ‘Ē, ko ho tokoua ko ‘Īsoa ‘oku ne fakalelu ‘a e mamahi ‘o hono loto kiate koe, ko ‘ene pehē te ne fakapoongi koe. 43Pea ko eni, tama, ke ke tuitala ki he‘eku lau, pea ke tu‘u ‘o hola leva ki Kālana kia Lēpani ko hoku tuonga‘ane. 44Pea ke nofo ai ‘o ‘aho si‘i, kae‘oua ke ‘osi ‘a e mamahi ‘a ho tokoua; 45‘oua ke lolou meiate koe ‘a e ‘ita ‘a ho tokoua, pea ngalo ‘a e me‘a kuo ke fai kiate ia: pea te u toki fekau atu ‘o ‘omi koe mei ai; he koe‘uma‘ā ho‘omo fakatou mole meiate au ‘i ha ‘aho pē taha?
Ko Hono Fekau ‘e ‘Aisake ‘a Sēkope ke ‘Alu kia Lēpani
46Pea lea ‘a Lepeka kia ‘Aisake, Kuo kina ‘eku mo‘ui ko e me‘a ‘i he ongo fafine Heti; kapau ‘e mali ‘a Sēkope foki mo ha fefine Heti, ha taha ‘o e fonua ni, ‘o hangē ko e ongo fafine ko eni, pea koe‘uma‘ā ai pē ‘eku mo‘ui?
Currently Selected:
KO SĒNESI 27: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.