KO SĒNESI 24
24
Ko e Hoa mo‘o ‘Aisake
1PEA kuo motu‘a ‘a ‘Epalahame, ‘o a‘ua‘u: pea kuo fakamonū‘ia ia ‘e Sihova ‘i he me‘a kotoa pē. 2Pea lea ‘a ‘Epalahame ki he‘ene tamaio‘eiki, ‘a e motu‘a ‘o hono ‘api, ‘a ia na‘e pule ki he‘ene ngaahi me‘a, ‘Ē, ke ke ‘ai mai ho nima ki hoku lalo tenga ni.#24.2 ke ke… tengá ni; Ko e anga ia hono ‘ai ha fuakava ke mātu‘aki ta‘eala ue‘i. 3Ka u fakafuakava koe ‘ia Sihova ko e ‘Otua ‘o Langi mo e ‘Otua ‘o Māmani, ‘o pehē, ‘e ‘ikai te ke kumi ha uaifi ma‘a hoku foha mei he kau fefine ‘o ha‘a Kēnani, ‘a ia ‘oku ou nofo ai: 4ka te ke ‘alu ki hoku fonua pea ki hoku kāinga, pea ke kumi mei ai ha uaifi ki hoku foha ko ‘Aisake.
5Pea tali ‘a e tamaio‘eiki, Ka na‘a ‘ikai loto ‘a e fefine ke ha‘u mo au ki he fonua ni: pea te u fakafoki hake koā ho foha ki he fonua na‘a ke ha‘u mei ai?
6Pea pehē ange ‘e ‘Epalahame, Ke ke vakai kiate koe ‘o kapau te ke fakafoki hoku foha ki he potu ko ia. 7Ko Sihova ko e ‘Otua ‘o Langi, ‘a ia na‘a ne ‘omi au mei he fale ‘o ‘eku tamai mo e fonua ‘o hoku tupu‘anga, ‘a ia foki na‘a ne fuakava kiate au, ‘o pehē, Te u ‘atu ki ho hako ‘a e fonua ni; te ne fekau ‘e ia ‘ene ‘āngelo ke fakamelomelo kiate koe, pea te ke ‘omi ha uaifi mei ai ma‘a hoku foha. 8Pea kapau ‘e ‘ikai loto ‘a e fefine ke omi mo koe, pea te ke toki ‘ata‘atā mei he‘eta fuakava ni: kehe pē ‘e ‘ikai te ke foki ‘aki hoku foha ki he potu ko ia. 9Pea ‘ai ‘e he tamaio‘eiki hono nima ki he talo tenga ‘o ‘ene ‘eiki ko ‘Epalahame; pea ne fuakava kiate ia ‘i he me‘a ko ia.
10Pea ‘ave ‘e he tamaio‘eiki ha kāmeli ‘e toko hongofulu ‘i he fanga kāmeli ‘a ‘ene ‘eiki, ‘o ne ‘alu; he na‘e ‘iate ia ‘a e koloa kotoa ‘a ‘ene ‘eiki ke fa‘iteliha ki ai; pea ne tu‘u ‘o fononga ki Mesopotēmia ki he kolo ‘o Nēhoa. 11Pea ne fakatokoto ‘a e fanga kāmeli ‘i tua‘ā kolo ofi ki he vaikeli, fe‘unga mo ‘ene efiafi, ‘a e taimi ‘oku hū kitua‘ā ai ‘a e kau fefine ke utu vai. 12Pea pehē ‘e ia, ‘E Sihova ko e ‘Otua ‘o ‘eku ‘eiki ko ‘Epalahame, ke ke fakata‘imālie‘i au he ‘aho ni, mo ke fai ‘ofa ki he‘eku ‘eiki ko ‘Epalahame. 13Ko eni ‘oku ou tu‘u ‘i he ngutu vai, pea ‘e ha‘u ‘a e fānau fefine ‘o e kakai ‘o e kolo ke ‘utu vai: 14pea ‘ilonga ‘a e ta‘ahine te u pehē ki ai, ‘Ē, matule mai ho‘o siā ke u inu; pea ka tali mai ‘e ia, ‘Inu pē, pea te u fakainu foki mo ho‘o fanga kāmeli: ‘ofa ko e fefine ia kuo ke tu‘utu‘uni ma‘a ho‘o tamaio‘eiki ko ‘Aisake: pea u ‘ilo ai kuo ke fai ‘ofa ki he‘eku ‘eiki.
15Pea ‘iloange, te‘eki ke ‘osi ‘ene lea, mo e hū mai kitua‘ā ‘a Lepeka, ‘a ia ne fanau‘i kia Petueli ko e tama ‘a Milika, ko e uaifi ‘o Nēhoa ko e tokoua ‘o ‘Epalahame ‘oku hili ‘i hono uma ‘ene siā. 16Pea na‘e hōihoifua ‘aupito ‘a e ta‘ahine, ko e tāupo‘ou foki, kuo te‘eki ke ne ‘ilo ha tangata: pea ‘alu hifo ia ki he vai ‘o ne fakafonu ‘ene siā, ‘o ne ‘alu hake. 17Pea lele ‘a e tamaio‘eiki ke fakafetaulaki kiate ia, mo ne pehē, Tuku ke u inu ha hu‘a vai mei ho‘o siā, ‘inē koā?
18Pea pehē ‘e he fefine, ‘Epu pē; pea ne fakavave, ‘o ne tuku hifo ‘ene siā, ‘o ne hapai ‘o fakainu ia. 19Pea kuo ‘osi ‘ene fakainu ia, pea pehē ‘e he fefine, Te u ‘utu foki ki ho‘o fanga kāmeli, ‘o fai pē ke nau fiu he inu. 20Pea fakato‘oto‘o ia ‘o lilingi ‘ene siā ki he kumete, pea ne toe lele ki he vai ke ‘utu mai, pea ne ‘utu ki he‘ene fanga kāmeli kotoa pē. 21Pea mo‘uvakaia ‘e he tangata ‘a e fefine mo fakalongo pē, ke ‘ilo pe kuo fakamonū‘ia ‘e Sihova hono fononga pe ‘ikai.
22Pea ‘i he faifai pea fiu ‘a e fanga kāmeli he inu, pea to‘o ‘e he tangata ha mama-ihu koula, ko e haafe sikeli hono mamafa, pea mo e ongo lelu ma‘a e nima ‘o e fefine, ko hona mamafa ko e sikeli koula ‘e hongofulu; 23pea ne pehē, Ko e ‘ōfefine ‘o hai koe, ‘inē? Tala mai pe ‘oku ‘ata‘atā ‘a e ‘api ‘o ho‘o ‘eiki ke mau ‘apitanga ai.
24Pea pehē ange ‘e he fefine, Ko e ‘ōfefine au ‘o Petueli, ko e tama ia ‘a Milika, ‘a ia na‘a ne fanau‘i kia Nēhoa. 25Na‘e ne pehē foki ki he tangata, ‘Oku lahi foki ‘a e hulu mo e me‘akai ‘i ‘api, pea ‘oku ‘ata‘atā ke mou ‘apitanga ai.
26Pea punou ‘a e tangata ‘o ne hū kia Sihova, 27‘o ne pehē, Mālō mo Sihova, ko e ‘Otua ‘o ‘eku ‘eiki ko ‘Epalahame, he ‘ikai tūkua ‘ene ‘alo‘ofa mo ‘ene mo‘oni ki he‘eku ‘eiki: ‘i he‘eku ‘i he hala na‘e taki au ‘e Sihova ki he fale ‘o e tokoua ‘o ‘eku ‘eiki.
28Pea lele ‘a e ta‘ahine ‘o ongoongo ki he fale ‘o ‘ene fa‘ē ‘a e ngaahi me‘a ko ia. 29Pea na‘e ai hano tuonga‘ane ‘o Lepeka, ko Lēpani hono hingoa: pea lele ‘a Lēpani ki he tangata kitua‘ā ki he vai. 30Pea ‘i he ‘iloange na‘a ne sio ki he mama-ihu mo e ongo lelu ‘i he nima ‘o hono tuofefine, kae‘uma‘ā ‘ene fanongo ki he ngaahi lau ‘a hono tuofefine ko Lepeka, Tokua na‘e pehē mo pehē ‘a e lea ‘a e tangata kiate au; ko ia na‘a ne ‘alu ki he tangata, tā ‘oku ne tu‘u mo e fanga kāmeli ‘i he ngutu vai. 31Pea ne pehē, Hū mai, ‘a e pele ‘a Sihova; ko e hā ‘oku ke tu‘u ai ‘i tua‘ā? Ka kuo ‘osi ‘eku teu ‘a e fale, mo ha potu ki he fanga kāmeli.
32Pea hū mai ‘a e tangata ki he fale; ka ka vete ‘e ia ‘a e teuteu ‘o e fanga kāmeli, ‘o ne ‘ange ha hulu mo ha me‘akai ki he fanga kāmeli, mo ha vai ke tafitafi ‘aki ‘a e va‘e ‘o e tangata, mo e va‘e ‘o e kau tangata na‘e ō mo ia. 33Pea na‘e teu ha‘ane kai; ka ka pehē ‘e ia, ‘E ‘ikai te u kai kae‘oua ke u fakahā hoku fononga. Pea pehē ‘e ia, Lea pē.
34Pea ne pehē, Ko e tamaio‘eiki au ‘a ‘Epalahame. 35Pea kuo fakamonū‘ia ‘aupito ‘e Sihova ‘a ‘eku ‘eiki; pea kuo ne hoko ‘o lahi: pea kuo ne foaki kiate ia ha fanga sipi, mo ha fanga pulu, mo ha siliva mo ha koula, mo ha kau tamaio‘eiki mo ha kau kaunanga, mo ha fanga kāmeli mo ha fanga ‘asi. 36Pea ko Sela, ko e uaifi ‘o ‘eku ‘eiki, na‘a ne fanau‘i ha foha ‘o ‘eku ‘eiki ka kuo ne motu‘a, pea ko ia kuo ne tuku ki ai ‘ene me‘a kotoa. 37Pea na‘e fakafuakava au ‘e he‘eku ‘eiki, ‘o pehē, ‘E ‘ikai te ke kumi uaifi mai ki hoku foha mei he kau fefine ‘o ha‘a Kēnani, ‘a ia ‘oku ou nofo ‘i honau fonua; 38ka te ke ‘alu ki he ‘api ‘o ‘eku tamai, pea ki hoku kāinga, pea te ke kumi mei ai ha uaifi ki hoku foha. 39Pea na‘a ku pehē ki he‘eku ‘eiki, Ka na‘a ‘ikai fie ha‘u ‘a e fefine mo au. 40Pea me‘a mai ‘e ia, Ko Sihova, ‘a ia ‘oku ou fakafeangai ki he‘ene ‘afio, te ne fekau ‘ene ‘āngelo ke ō mo koe; pea te ne fakamonū‘ia ho fononga; pea te ke kumi ha uaifi ki hoku foha mei hoku kāinga mo e fale ‘o ‘eku tamai: 41te ke toki ‘ata‘atā mei he‘eta fuakava ‘oka ke ka a‘u ki hoku kāinga, ‘o kapau ‘e ‘ikai te nau ‘atu kiate koe ha taha, pea ke ‘ata‘atā ai mei he‘eta fuakava.
42Pea u a‘u mai he ‘aho ni ki he vai; pea u pehē, ‘E Sihova, ko e ‘Otua ‘o ‘eku ‘eiki ko ‘Epalahame; kapau ko ho‘o fakamonū‘ia mo‘oni ‘a e fononga ‘oku ou fai: 43ko eni, lolotonga ‘eku tu‘u ‘i he funga vai; pea ka ha‘u ha finemui ke ‘utu vai, pea u pehē kiate ia, ‘Ē, tuku mai ke u inu ha hu‘a vai mei ho siā; pea ka pehē mai ‘e ia, 44Inu pē koe, pea te u ‘utu ki ho‘o fanga kāmeli foki: ‘ofa ko e fefine ia kuo tu‘utu‘uni ‘e Sihova ki he foha ‘o ‘eku ‘eiki. 45Pea kuo te‘eki ke ‘osi ‘eku lea ‘i hoku loto, mo e ‘iloange ‘oku hū mai ‘a Lepeka, ‘oku hili ‘ene siā ‘i hono uma; pea ne ‘alu hifo ki he vai ‘o ‘utu; pea u pehē kiate ia, Mai haku inu, ‘inē koā. 46Pea ne fakato‘oto‘o, ‘o tuku hifo ‘ene siā mei hono uma, mo ne pehē, ‘Inu pē, pea te u fakainu foki ho‘o fanga kāmeli: pea u inu, pea na‘a ne fakainu foki ‘a e fanga kāmeli. 47Peau fehu‘i kiate ia ‘o u pehē, Ko e ‘ōfefine ‘o hai koe? Pea pehē ‘e ia, Ko e ‘ōfefine ‘o Petueli, ko e foha ia ‘o Nēhoa, ‘a ia ne fanau‘i kiate ia ‘e Milika: pea u ‘ai ‘a e mama ki hono ihu, mo e ongo lelu ki hono nima. 48Pea u punou ‘o hū kia Sihova, ‘o u fakamālō kia Sihova ko e ‘Otua ‘o ‘eku ‘eiki ko ‘Epalahame, ‘a ia kuo ne taki au ‘i he hala totonu ke kumi ‘a e ‘ōfefine ‘o e tokoua ‘o ‘eku ‘eiki ma‘a hono foha. 49Pea ko eni, kapau ‘oku mou pehē ke fai ‘a e ‘ofa mo e mo‘oni ki he‘eku ‘eiki, tala mai: pea ka ‘ikai, pea tala mai; ka u afe ki he to‘omata‘u, pe ki he to‘ohema.
50Pea tali ‘e Lēpani mo Petueli, ‘o na pehē, Ko e me‘a ia meia Sihova; ‘e ‘ikai te mau fa‘a tali atu ha lelei pe ha kovi. 51Ko Lepeka ‘ena, ‘ave; pea tuku ke ne hoko ko e uaifi ‘o e foha ‘o ho‘o ‘eiki, ‘o hangē ko e folofola ‘a Sihova. 52Pea ‘i he ‘iloange na‘e fanongo ‘e he tamaio‘eiki ‘a ‘Epalahame ki he‘ena lea, na‘a ne fo‘ohifo ki he kelekele, ‘o ne hū kia Sihova. 53Pea to‘o mai ‘e he tamaio‘eiki ha ngaahi teunga siliva, mo ha ngaahi teunga koula, mo ha ngaahi kofu, ‘o ne ‘ange kia Lepeka: pea ne foaki mo e ngaahi me‘a mahu‘inga ki hono tuonga‘ane mo ‘ene fa‘ē.
54Pea nau kai mo inu, ‘a ia mo e kau tangata na‘e omi mo ia; pea nau mohe; pea pongipongi na‘a nau tu‘u hake, pea ne pehē, Tuku mai au ke u ‘alu ki he‘eku ‘eiki.
55Pea pehē ‘e he tuonga‘ane ‘o e fefine mo ‘ene fa‘ē, ‘Oua ke nofo si‘i hifo ‘a e ta‘ahine, ha ‘aho ‘e hongofulu nai, pea ke toki ‘alu.
56Pea ne pehē kiate kinautolu, ‘Oua te mou ta‘ofi au, he kuo fakamonū‘ia hoku fononga ‘e Sihova; tuku mai au ke u ‘alu ki he‘eku ‘eiki.
57Pea na pehē, ‘Oua ke ma ui ‘a e ta‘ahine, ‘o fehu‘i pe ko e hā hono loto. 58Pea na ui mai ‘a Lepeka, pea na pehē kiate ia, Te ke ‘alu mo e tangata ni? Pea ne pehē, Te u ‘alu.
59Pea nau toki tukuange honau tuofefine ko Lepeka, mo hono fefine tauhi, pea mo e tamaio‘eiki ‘a ‘Epalahame mo hono kakai. 60Pea nau tāpuaki‘i ‘a Lepeka, mo nau pehē ki ai, Nga‘ata, ko si‘omau tuofefine, ‘ofa ke ke hoko ko e ngaahi mano laui afe; pea ke ma‘u ‘e ho hako ‘a e ngaahi matanikolo ‘o e kakai ‘oku fehi‘a kiate kinautolu. 61Pea tutu‘u ‘a Lepeka mo hono kau fefine, pea nau heka kāmeli ‘o muimui ki he tangata; pea ‘ave ‘e he tamaio‘eiki ‘a Lepeka, ‘o ne fononga.
62Pea tā na‘e ha‘u ‘a ‘Aisake mei he‘ene ‘alu ki Pea-lehai-lo‘ai;#24.62 na‘e ha‘u… Pea-lehai-lo‘ai: Ko hono faka-Hepeluú ia. Ka ‘oku tu‘u ‘i he ngaahi hiki fuoloa ‘e ni‘ihi: na‘e ha‘u ‘a ‘Aisake ki Pea-lehai-lo‘ai. he na‘a ne nofo ‘i he feitu‘u ko Tonga. 63Pea ‘alu ‘a ‘Aisake ke fai ‘ene lotu ‘i he ngoue ‘i he‘ene efiafi hifo: pea ne tāngaki hake ‘o ne vakai, tā ‘oku ha‘u ha fononga kāmeli. 64Pea tāngaki hake foki ‘a Lepeka, ‘o ne ‘ilo ‘a ‘Aisake; pea ne hopo ki lalo mei he kāmeli. 65Pea ne pehē ki he tamaio‘eiki, Ko hai ‘a e tangata ko ‘ena ‘oku laka mai ‘i he ngoue ke fakafetaulaki mai kiate kitautolu? Pea pehē ‘e he tamaio‘eiki, Ko ‘eku ‘eiki ia. Pea to‘o ‘e he fefine hono pūlou, ‘o ‘ai.
66Pea fakamatala ‘e he tamaio‘eiki kia ‘Aisake ‘a e ngaahi me‘a kotoa pē kuo ne fai. 67Pea ‘ave ‘e ‘Aisake ‘a e fefine ki he tēniti ‘o ‘ene fa‘ē ko Sela; pea ne hanga ‘o ma‘u ‘a Lepeka mōno uaifi: pea ne ‘ofa ki ai: pea ko ‘ene toki fiemālie ē ‘a ‘Aisake talu ‘a e fai ‘o ‘ene fa‘ē.
Currently Selected:
KO SĒNESI 24: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.