KO SĒNESI 19
19
Ko e fai Angahala ‘a Sōtomá
1PEA omi ‘a e ongo ‘āngelo ki Sōtoma kuo efiafi, ‘oku lolotonga ta‘utu ‘a Lote ‘i he matanikolo ‘o Sōtoma: pea ‘i he mamata ki ai ‘a Lote na‘a ne tu‘u ke fakafetaulaki kiate kinaua; pea ne tū‘ulutui ‘o punou ki he kelekele; 2‘o ne pehē, Fakamolemole, hou‘eiki, ka mo afe mai mu‘a ki he fale ‘o‘ota ko e me‘avale kiate kimoua, ‘o mo tatoka ai ‘apō, mo tafitafi homo va‘e; ka mo toki uhu, ‘o fai homo fononga. Pea na me‘a mai, ‘Ikai, ka te ma mohe pē ‘i he mala‘e.
3Ka ka ta‘ofi ‘a kinaua ‘e ia; ko ia na‘a na afe ki ai, ‘o hū ki hono fale; pea ne fai ha kātoanga ma‘anaua ‘o ne ta‘o mā ta‘elēvani, ‘o nau tokoni.
4Ka ‘i he te‘eki ke na toka, na‘e kāpui ‘a e fale ‘e he kakai tangata ‘o e kolo, ‘a e kau tangata Sōtoma, ‘o fai mei he talavou ki he motu‘a, ‘a e kakai kotoa mei he ngaahi feitu‘u: 5pea nau kalanga kia Lote, ‘o nau pehē ange, Kofa‘ā ‘a e ongo tangata na‘e hū atu ‘aneefiafi? fei mo ‘omi kiate kimautolu ke mau fe‘iloaki mo kinaua.#Fkm 19.22-24
6Pea hū atu ‘a Lote ki he matafale kiate kinautolu, pea ne tāpuni ‘a e matapā mei hono tu‘a, 7mo ne pehē, Si‘i kāinga, ‘oua te mou fai ta‘etaau. 8Ko eni, ‘oku ai hoku ongo ‘ōfefine ‘a ia ‘oku te‘eki ke na ‘ilo ha tangata, ka u ‘omi mu‘a kinaua kiate kimoutolu, pea mou fa‘iteliha ki ai; kehe pē ke ‘oua te mou fai ha me‘a ki he ongo tangata ni he ka ne ta‘e‘oua ‘a e malu ‘o hoku fale ‘oku na hū mei ai.
9Pea nau pehē, Tu‘u ki hē. Pea nau pehē foki, Na‘e ha‘u ‘a e siana ni ko e ‘āunofo mai, pea ‘oku ne fie nofo ko e fakamaau? Sā! ‘e kovi ange ‘emau ngaohi koe ‘iate kinaua: pea nau teke‘i mālohi atu ‘a e tangata, ‘a Lote, ‘o nau ‘unu‘unu atu ke hae ‘a e matapā. 10Pea ala atu ‘a e ongo tangata, ‘o na fakahū mai ‘a Lote ki fale, ‘o na tāpuni ‘a e matapā. 11Pea na ‘ai ke popongi ‘a e kau tangata na‘e ‘i he matafale, ‘a e iiki mo e lalahi: pea nau fiu‘a kumi ki he matapā.#2 Tu‘i 6.18
Ko e Hiki ‘a Lote mei Sōtoma
12Pea me‘a ‘a e ongo ‘āngelo kia Lote, ‘Oku ‘i ai ‘i heni hao kavenga? ha‘o fānau tangata pe fānau fefine; ‘io, mo hai fua ‘oku ‘iate koe ‘i he kolo ni, ‘omi kitua‘ā mei he potu ni: 13he ‘oku ma teu faka‘auha ‘a e feitu‘u ni, koe‘uhi ko e me‘a lahi ‘a e tangi meiate kinautolu kuo a‘u ki he ‘ao ‘o Sihova; pea kuo fekau mai kimaua ‘e Sihova ke faka‘auha ia.
14Pea hū kitu‘a ‘a Lote, ‘o ne lea ki hono kavenga ‘i he‘ene fānau fefine, ‘o ne pehē, Mou tutu‘u, ‘o mahu‘i mei he potu ni; he ‘oku teu faka‘auha ‘e Sihova ‘a e kolo. Ka na‘e hangē ko ha‘ane fakahua kiate kinautolu.
15Pea pongipongi hake leva, pea fakavave ‘a Lote ‘e he ongo ‘āngelo, he‘ena pehē, Tu‘u, ‘ave ho uaifi mo ho ongo ‘ōfefine ‘oku ‘i heni; na‘a ke mole ‘i he tu‘utāmaki ‘o e kolo. 16Ka ka uatei pē ia; ko ia na‘e hanga ‘a e ongo tangata, ‘o na puke hono nima, mo e nima ‘o hono uaifi, mo e nima ‘o hono ongo ‘ōfefine; ko e me‘a ‘i he fai fakaalaala ‘a Sihova kiate ia: ‘o nau taki ia, ‘o tuku ki he tua‘ā kolo.#2 Pit 2.7 17Pea kuo na ‘omi leva kinautolu kitua‘ā, pea ne me‘a mai. Hola telia ho‘o mo‘ui; ‘oua te ke kilo kimui, pea ‘oua ‘e momo‘i tu‘u lolotonga ho‘o ‘i he Seakale: hola pē ki he mo‘unga na‘a ke mole.
18Pea lea ‘a Lote kiate kinaua, ‘Ēī, ‘oua mu‘a ‘e pehē: 19ko eni, ta‘e‘alo‘aloa kuo ke ‘ofa ‘ia kita me‘avale, pea kuo ke fai ha fu‘u ‘ofa lahi ‘i he fakahaofi ‘o ‘eku mo‘ui pea tala‘ehai te u lava ke hola ki he mo‘unga, pea na‘a ma‘u au ‘e he tu‘utāmaki pea u mate. 20Me‘a ange ko e kolo ko ē, ‘e vave ha‘aku hola ki ai, kae‘uma‘ā ko e ki‘i me‘a: ka u hola mu‘a ki he potu ko ia (‘ikai ko e ki‘i me‘a pē?) kae hao ‘eku mo‘ui.
21Pea ne me‘a kiate ia, Ko eni, kuo u toka‘i koe ‘i he me‘a ni foki, pea ‘e ‘ikai te u maumau‘i ‘a e kolo ko ia kuo ke lea ki ai. 22Fai vave, hola ki he potu ko ia; he ‘oku ‘ikai te u fa‘a fai ha me‘a kae‘oua ke ke a‘u ki ai. Ko hono ‘uhinga ia na‘e ui ‘a e kolo ko ia ko Soa [ko Ki‘i-me‘a].#19.22 Soa; ‘Oku vāofi ‘a hono pu‘aki ‘o e hingoá ni mo e faka-Hepelū ‘o e si‘isi‘i.
Ko e Faka‘auha ‘o Sōtoma mo Komola
23Kuo hopo ‘a e la‘ā ki māmani ‘i he a‘u ‘a Lote ki Soa. 24Pea na‘e toki faka‘uha ‘e Sihova ki Sōtoma mo Komola ‘a e maka vela mo e afi mei He‘ene ‘Afio, ‘io, mei langi;#Māt 10.15; 11.23-24; Luk 10.12; 17.29; 2 Pit 2.6; Siuta 7 25pea ne maumau‘i ‘a e ngaahi kolo ko ia mo e Seakale kātoa, mo kinautolu kotoa pē na‘e nofo ‘i he ngaahi kolo ko ia, mo e ngaahi fua ‘o e kelekele. 26Ka ka fakatōtōmui ‘a hono uaifi ‘iate ia, ‘o ne fakasio ki mui, pea ne hoko ko e pou māsima.#Luk 17.32
27Pea na‘e uhu hengihengi ‘a ‘Epalahame ki he potu na‘a ne tu‘u ai ‘i he ‘ao ‘o Sihova; 28pea ne hanga ki he feitu‘u ‘o Sōtoma mo Komola mo e seakale kotoa, ‘o ne fakasio atu, tā ‘oku kohu hake ‘a e fonua ko ia ‘o hangē ko e fu‘u fōnise. 29Ko ia ‘i he faka‘auha ‘e he ‘Otua ‘a e ngaahi kolo ‘o e Seakale, na‘a ne manatu kia ‘Epalahame, pea ne fakapuna ‘a Lote mei he uhouhonga ‘o e tu‘utāmaki, lolotonga ‘ene laiki ‘a e ngaahi kolo na‘a ne nofo ai.
Ko e Tupu‘anga ‘o e Kakai Moapé mo e Kakai ‘Āmoní
30Pea ‘alu hake ‘a Lote mei Soa, pea ne nofo ‘i he mo‘unga, ‘a ia mo hono ongo ‘ōfefine he na‘a ne manavahē ke nofo ‘i Soa; ko ia na‘a ne nofo ‘i ha ‘ana mo hono ongo ‘ōfefine. 31Pea lea ‘a e ta‘okete ki he tehina, Ko ‘eta tamai kuo motu‘a, pea tala‘ehai ‘oku ‘i ai ha tangata ‘i he fonua#19.31 ‘i he fonuá; pe ‘i māmani kātoa. ke ha‘u kiate kitaua ‘o hangē ko e anga ‘o māmani: 32ha‘u, ta fakainu uaine ‘a ‘eta tamai, pea ta mohe mo ia, ke ta fakaili ha hako ‘o ‘eta tamai. 33Pea na fakainu uaine ena tamai ‘i he pō ko ia: pea ‘alu ki ai ‘a e ta‘okete, ‘o mohe mo ‘ene tamai; pea na‘e ‘ikai te ne ‘ilo ‘ene tokoto mai mo ‘ene tu‘u atu.
34Pea ‘i he ‘aho ‘e taha, na‘e pehē ‘a e ta‘okete ki he tehina, Ko eni, ne u mohe ‘anepō mo ‘eku tamai: ta fakainu uaine kiate ia ‘apō foki; pea ke ‘alu koe ki ai ‘o mohe mo ia, ka ta fakaili ha hako ‘o ‘eta tamai. 35Pea na fakainu uaine ‘a ‘ena tamai ‘i he pō ko ia foki; pea tu‘u atu ‘a e tehina ‘o mohe mo ia; pea na‘e ‘ikai te ne ‘ilo ‘ene tokoto mai mo ‘ene tu‘u atu. 36Ko ia na‘e fakatou feitama ‘a e ongo ‘ōfefine ‘o Lote ki he‘ena tamai. 37Pea fā‘ele ‘a e ta‘okete, ko e tama; pea ne fakahingoa ia ko Moape;#19.37 Moape; ‘Oku vāofi ‘a hono pu‘aki ‘o e hingoá ni mo e faka-Hepelū ‘o e mei he‘eku tamaí. ko e tupu‘anga ia ‘o ha‘a Moape ‘o onopooni. 38Pea fā‘ele mo e tehina, ko e tama; pea ne fakahingoa ko Pēnami:#19.38 Pēnami; Ko e ‘uhinga ‘o e hingoá ni ‘i he faka-Hepeluú ko e “foha ‘o hoku kāinga” pea ‘oku vaāofi hono pu‘akí mo e faka-Hepelū ‘o e tokotaha ‘Āmoni. ko e tupu‘anga ia ‘o e ha‘a ‘Āmoni ‘o onopooni.
Currently Selected:
KO SĒNESI 19: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.