YouVersion Logo
Search Icon

KO SĒNESI 14

14
Ko e Fakahaofi ‘e ‘Epalame ‘a Lote
1TOKUA ‘i he kuonga ‘o ‘Amilafeli ko e Tu‘i Saina, mo ‘Alioke ko e Tu‘i ‘Ēlasa, mo Kotololokoma ko e Tu‘i Lami, mo Tītale ko e Tu‘i Koimi, 2na‘e tau ‘a kinautolu ni mo Pela ko e Tu‘i Sōtoma, mo Pīlesa ko e Tu‘i Komola, mo Sīnape ko e Tu‘i ‘Ātima, mo Sēmepa ko e Tu‘i Sipoimi, mo e tu‘i ‘o Pela ‘a ia ko Soa. 3Na‘e fakakautaha ‘a kinautolu ni, ‘o nau omi ki he talalo ko Sītimi, ‘a ia ko e Tahi Māsima. 4Ko e ta‘u ‘e hongofulu mā ua na‘a nau nofo kia Kotololokoma, ka ‘i hono hongofulu mā tolu ‘o e ta‘u na‘a nau tu‘u. 5Pea ‘i hono hongofulu mā fā ‘o e ta‘u na‘e omi ‘a Kotololokoma mo e ngaahi tu‘i na‘e kau mo ia, ‘o nau haha ‘a e Lifaimi ‘i ‘Asiteloti Ka‘anaimi, mo e ha‘a Susi ‘i Hami, mo e ha‘a ‘Emi ‘i Save Kiliataimi. 6Kae‘uma‘ā ‘a ha‘a Holi ‘i honau mo‘unga ko Seia, ‘o a‘u atu ki ‘Eli-Pēlana ‘a ia ‘oku ‘i he ve‘e toafa. 7Pea nau foki hake ai, ‘o nau a‘u ki ‘Eni-misipate, ‘a ia kuo Kētesi; pea nau haha ‘a e fonua kotoa ‘o ha‘a ‘Amaleki; pea mo ha‘a ‘Āmoli, ‘a ia na‘a nau nofo ‘i Hasasoni Tamali.
8Pea ō atu ‘a e Tu‘i Sōtoma mo e Tu‘i Komola mo e Tu‘i ‘Ātima mo e Tu‘i Sipoimi mo e tui ‘o Pela, ‘a ia kuo Soa, pea nau fakatē ‘enau tau kiate kinautolu ‘i he talalo ko Sītimi. 9‘io, kia Kotololokoma ko e Tu‘i ‘Īlami, mo Tītale ko e Tu‘i Koimi, mo ‘Amilafeli ko e Tu‘i Saina, pea mo ‘Alioke ko e Tu‘i ‘Ēlasa; ko e tu‘i ‘e toko fā ki he tu‘i ‘e toko nima. 10Pea ko e talalo ko Sītimi na‘e lahi ai ‘a e toka‘anga kelepulu; pea feholaki ‘a e ongo tu‘i ‘o Sōtoma mo Komola, ‘o na tō ai; pea ‘ilonga ha toe na‘e hola ki he mo‘unga. 11Pea nau fetuku ‘a e koloa ‘o Sōtoma mo Komola, mo ‘enau me‘akai, pea nau ‘alu. 12Na‘a nau ‘ave foki ‘ā Lote ko e foha ‘o e tokoua ‘o ‘Epalame, pea mo ‘ene koloa, pea nau ‘alu mo kinautolu: he kuo ne nofo fonua ‘i Sōtoma.
13Pea ha‘u ha tokotaha na‘e hao mai, ‘o ne faka‘ilo kia ‘Epalame ko e matāpule Hepelū, he na‘e ‘apitanga ia ‘i he ‘ulu ‘oke ‘o Mamilī, ‘a ia ko ha matāpule ‘Āmoli, ko e tokoua ‘o ‘Esikoli mo e tokoua foki ‘o ‘Āneli: pea ko kinautolu na‘e ai ‘enau taliti mo ‘Epalame. 14Pea ‘i he fanongo ‘e ‘Epalame kuo taki pōpula hono tokoua, na‘a ne fakateholo atu mo ‘ene kau tau, ko e kakai tonu ‘o hono ‘api, ko e toko tolungeau mo e toko hongofulu mā valu, pea ne tuli ‘o a‘u ki Tani. 15Pea ne vahevahe ‘ene tau, ‘o ne ‘ohofi po‘uli kinautolu, ‘e ia mo ‘ene kau tamaio‘eiki; pea ne taa‘i kinautolu, ‘o ne tuli ‘o a‘u ki Hopa, ‘a ia ‘oku tu‘u ki he tokelau ‘o Tāmasikusi. 16Pea ne foki mai mo ia ‘a e koloa kotoa, kae‘uma‘ā ‘a Lote ko hono tokoua, pea ne toe ‘omi ‘ene koloa, mo e kau fefine foki, mo e kakai.
Ko Hono Tāpuaki‘i ‘e Melekiseteki ‘a ‘Epalahame
17Pea ‘alu atu ‘a e Tu‘i Sōtoma ke fakafetaulaki kiate ia ‘i he‘ene foki mai mei he taa‘i ‘o Kotololokoma mo e ngaahi tu‘i na‘e kau mo ia; pea ne a‘u ki he talalo ko Save, ‘a ia ko e Talalo ‘a Tu‘i. 18Pea ko Melekiseteki ko e Tu‘i Salema, na‘a ne ‘alu atu mo ia ‘a e mā mo e uaine,#Hep 7.1-10 pea ko e taula‘eiki ia ‘o e ‘Otua Taupotu. 19Pea ne tāpuaki‘i ia, ‘o ne pehē, Ke fakamonū‘ia ‘a ‘Epalame ‘e he ‘Otua Taupotu, ko ‘ene me‘a ‘a Langi mo Māmani. 20Pea mālō mu‘a mo e ‘Otua Taupotu kuo ne tuku ho ngaahi fili ke ke fa‘iteliha ai. Pea ne ‘atu hono ‘inasi ko e vahe hongofulu ‘o e me‘a kotoa pē.
21Pea me‘a ‘e he Tu‘i Sōtoma kia ‘Epalame, Tuku mai ‘a e kakai pē, ka ke ma‘u ‘e koe ‘a e koloa.
22Pea pehē ‘e ‘Epalame ki he Tu‘i Sōtoma, Na‘a ku hiki hoku nima kia Sihova ko e ‘Otua Taupotu, ‘a ia ko ‘ene me‘a ‘a Langi mo Māmani; 23‘Ilo ‘e ‘au ‘o kapau te u to‘o ha tu‘oni filo pe tau sū ‘i he me‘a ‘oku ‘a‘au, na‘a ‘iloange te ke lau, Ko au kuo koloa‘ia ai ‘a ‘Epalame. 24Ngata pē ‘i he me‘a kuo kai ‘e he kau siana ni; ‘io, mo e ‘inasi ‘o e tu‘unga me‘a na‘a mau ō mo au, ‘a ‘Āneli mo ‘Esikoli mo Mamilī; ko kinautolu te nau to‘o honau ‘inasi.

Currently Selected:

KO SĒNESI 14: TMB

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy