KO SĒNESI 12
12
Ko e Ui ‘e he ‘Otuá ‘a ‘Epalame
1PEA folofola ‘a Sihova kia ‘Epalame, ‘o pehē, Hiki koe mei ho fonua, pea mei ho tupu‘anga, pea mei he fale ‘o ho‘o tamai, ki he fonua te u fakahā kiate koe.#Ngā 7.2-3; Hep 11.8 2Pea te u ngaohi koe ko e pule‘anga lahi, pea te u fakamonū‘ia koe, pea te u fakatau‘olunga ho hingoa; pea te ke hoko ko e monū‘ia‘anga. 3Pea te u ‘ofeina ‘a kinautolu te nau ‘ofeina koe,#Kal 3.8 pea ko ia te ne tutuku‘i koe te u fakamala‘ia; pea ‘e monū‘ia ‘iate koe ‘a e fa‘ahinga kotoa pē ‘o e kelekele.#12.3 pea ‘e… kelekelé; pe ‘E kole mai ‘a e ngaahi fonua kotoa pē ke u fakamonū‘ia‘i kinautolu, ‘o hangē ko ‘eku fakamonū‘ia‘i koé.
4Pea hiki ‘a ‘Epalame, ‘o hangē ko e folofola ‘a Sihova kiate ia; pea ne ‘alu mo ia ‘a Lote: pea na‘e fe‘unga ‘a ‘Epalame mo e ta‘u ‘e fitungofulu mo e ta‘u ‘e nima ‘i he‘ene mahu‘i mei Kālana. 5Pea ‘ave ‘e ‘Epalame ‘a Sēlai ko hono uaifi, mo Lote ko e foha ‘o hono tokoua, pea mo e koloa na‘e ‘anautolu, mo e kakai kuo nau ma‘u ‘i Kālana; pea nau ‘alu atu ko ‘enau ō ki he fonua ko Kēnani; pea nau a‘usia ‘a e fonua ko Kēnani.
6Pea fai atu ‘a ‘Epalame ‘i he fonua ‘o a‘u ki he feitu‘u ‘o Sīkemi, ‘o a‘u ki he fu‘u ‘oke ‘o Mole. Pea ko ha‘a Kēnani na‘e ‘i he fonua ‘i he kuonga ko ia. 7Pea hā ‘a Sihova kia ‘Epalame, ‘o ne folofola ‘o pehē, Ko ho hako te u ‘atu ki ai ‘a e fonua ni. Pea ne langa ‘i he potu ko ia ha ‘ōlita kia Sihova ‘a ia ne hā kiate ia.#Ngā 7.5; Kal 3.16 8Pea ne hiki mei ai ki ha mo‘unga na‘e tu‘u ki he potu hahake ‘o Pēteli, pea ne folahi ai hono tēniti; ‘o tu‘u ‘a Pēteli mei lulunga, pea ko ‘Ai mei hahake; pea ne fokotu‘u ‘i he potu ko ia ha ‘ōlita kia Sihova, pea ne fai ai ‘a e lotu ki he huafa ‘o Sihova. 9Pea mahu‘i mei ai ‘a ‘Epalame, ‘o ne hikihiki ai pē ki he feitu‘u ko Tonga.
Ko e Hiki ‘a ‘Epalahame ki ‘Isipite
10Pea na‘e faifai pea honge ‘a e fonua; pea ‘alu hifo ‘a ‘Epalame ki ‘Isipite ke ‘āunofo ‘i he potu ko ia; he na‘e mamafa ‘a e honge ‘i he fonua. 11Pea ‘i he faifai pea ne fangafanga hū ki ‘Isipite, pea ne lea ki hono uaifi ko Sēlai, Sī ni, ‘oku ou ‘ilo ko e fefine hōihoifua koe; 12pea ko ia ka mamata kiate koe ‘a e kakai ‘Isipite te nau pehē, Ko hono uaifi ‘a e fefine ni; pea te nau tāmate‘i au, ka ko koe te nau tuku ke mo‘ui. 13‘Eni, ke ke lau ko hoku tuofefine koe; ka u tu‘umālie koe‘uhi ko koe, pea hao foki ‘eku mo‘ui ko e me‘a ‘iate koe.#Sēn 20.2; 26.7 14Pea ‘i he faifai pea hū ‘a ‘Epalame ki ‘Isipite, na‘e vakai ‘e he kakai ‘Isipite ki he fefine ‘oku ne hōihoifua ‘aupito. 15Na‘e mamata foki kiate ia ‘a e hou‘eiki ‘a Felo, pea nau viki ia kia Felo; pea na‘e ‘omi ‘a e fefine ki he fale ‘o Felo. 16Pea ne fai ‘ofa kia ‘Epalame koe‘uhi ko e fefine; pea ne ma‘u sipi ai mo e pulu, kae‘uma‘ā ‘a e fanga ‘asi tangata mo ha kau tamaio‘eiki mo ha kau kaunanga, mo e fanga ‘asi fefine foki mo e fanga kāmeli.
17Ka na‘e taa‘i ‘e Sihova ‘a Felo ‘aki ‘a e ngaahi tautea lahi, pehē foki mo hono ‘api, ko e me‘a ‘ia Sēlai ko e uaifi ‘o ‘Epalame. 18Pea ui ‘e Felo ‘a ‘Epalame, ‘o ne me‘a ki ai, Ko e hā kuo ke fai pehē ai kiate au? Ko e hā na‘e ‘ikai te ke tala ai kiate au ko ho uaifi ia? 19Ko e hā na‘a ke pehē ai, Ko hoku tuofefine ia, ka u to‘o ia mōku uaifi? Pea ko eni, ko ho uaifi ‘ena, to‘o pea ke ‘alu. 20Pea fai ‘e Felo ‘ene tu‘utu‘uni ki ha kau tangata ‘ia ‘Epalame, pea na‘a nau taki atu ia mo hono uaifi mo ‘ene ngaahi me‘a kotoa pē.
Currently Selected:
KO SĒNESI 12: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.