پیدایش ۴٩
۴٩
یعقوب قبلٚ مرگ، خو پسرأنَ برکت دهه
١ بَزین یعقوب خو پسرأنَ دوخوأده و بوگفته: «همهتأن بأیید می ورجه، می دور جمعَ بید تا شمرَ جٚه اونچی کی بعدها شیمی سر اَیه وأخبرَ کونم.
٢ «ای یعقوبٚ پسرأن، بأیید بیشنَوید کی شیمی پئر ایسرائیل چی گفتن دره.
٣ رئوبین، تو کی می اوّلی زأی
می قوّت ایسی و می جوأنی سالأنٚ شین،
تی مقام، قدرت و شرافت همهتأنٚ جَا بوجورتره.
٤ آبٚ خوروشانٚ مأنستن ایسی، دِ حق نأری تی برأرأنٚ ره پیلهتری بوکونی،
چره کی می رختخوابٚ دورون بوشویی و اونَ بیحرمت بوکودی.
٥ «شمعون و لاوی، کی همدیگرٚ اَمرأ برأریدی،
اوشأنٚ شمشیرأن ابزارٚ ظلمیدی،
٦ می جانَ گم اوشأنٚ مشورتٚ دورون نوأ شوئون،
می روحَ گم اوشأنٚ جمعٚ اَمرأ ایتأ نوأ بوستن
چونکی خوشأنٚ خشمٚ وسی مردومَ بوکوشتیدی
و دیل بخوأه، ورزأیأنٚ پا رگَ وَوِهییدی.
٧ لعنت بر اوشأنٚ خشم چونکی شدید ایسه
و اوشأنٚ غضب چونکی رحم نأره!
من اوشأنَ یعقوبٚ قومٚ میأن پراکندَه کونم
و ایسرائیلٚ سرزیمینٚ دورون کسکسٚ جَا سیوا کونم.
٨ «ای یهودا#۴۹:۸ «یهودا» معنی زبانٚ عبری دورون ستایش کودن ایسه. ، تی برأرأن ترَ ستایش کونیدی،
و تی دوشمنأنٚ گردن پس تی دسٚ اَمرأ گیری،
و تی پئرٚ پسرأن ترَ تعظیم کونیدی.
٩ تو جوانٚ شیرٚ مأنستن ایسی، ای یهودا،
زأی جان، شیری کی شکارٚ جَا وأگردسته،
تو نرٚ شیرٚ مأنستن ایسی کی درازَ کشه و خوفته،
ماده شیر مأنستنی، کی هیکس جرأت نوکونه اونَ ویریزأنه. ١٠ چوبدسٚ پادشایی یهودا جَا دورَ نیبه،
عصایٚ پادشایی اونٚ نسلٚ جَا دورَ نیبه
تا اونی کی سلطنت اونٚشین ایسه بأیه،
اونی کی تومامییٚ قومأن اونٚ جَا ایطاعت کونیدی. ١١ اون خو اولاغَ، انگور رزَ دٚوده
و خو کرّه اولاغَ، رزٚ بهترین شاخه سر دٚوده.
خو رخت و لیباسَ شرابٚ اَمرأ شوره،
خو روپوشَ انگور آبٚ مره.
١٢ اونٚ چومأن شرابٚ جَا سورختره،
اونٚ گازأنم شیرٚ جَا سفیدتره.
١٣ «زِبولون، دریا کنار ساکنَ به،
و جایی به کی کشتییأن لنگر تأودیدی
کی اونٚ مرز به صیدون فأرسه.
١٤ «یِساکار ایتأ پور زورٚ اولاغَ مأنه
کی آغلٚ دورون خوفته.
١٥ وختی کی بیده اویه کی خوفته خُبه،
و سرزیمینٚ دیلوازی ایسه،
بارٚ جیر فوچومسته،
و قوبیل بوکوده کی ایتأ برده مأنستن کار بوکونه.
١٦ «دان #۱۶:۴۹ «دانٚ» نام کلمهیٚ عبری «داور» اَمرأ جٚه ایتأ ریشه ایسید. خو قومَ داوری کونه،
هَطویی کی هر قومٚ ایسرائیلٚ ره انجام به.
١٧ اون، لأنتی مأنستن رأ سر ایسه،
و افعی مأنستن جاده کناره
کی اسبٚ پا بوزَ نیش زنه
کی آسبسوار، جٚه پوشت اسبٚ جَا بکفه.
١٨ ای خوداوند، من تی نجاتٚ رافا ایسم.
١٩ «رأهزنأن، جادَ#۱۹:۴۲ کلمهیٚ «جادٚ» صدا، زبانٚ عبری دورون شباهت دأره به «رأهزن» یا «کسی کی حمله کونه». حمله کونیدی،
ولی اون اوشأنَ بدوبَ ده.
٢٠ «اشیرٚ نان چربَ به،
و اون، سلطنی خوراک فراهم کونه.
٢١ «نفتالی ایتأ آزادَ بوسته آهو مأنستن دُوِه
کی خوشگلٚ برهیأن بدونیا اَوره.
٢٢ «یوسف ایتأ پور بارٚ انگور رزَ مأنه،
ایتأ رز چشمه کنار کی اونٚ شاخهیأن دیوارأنَ وأچوکیدی.
٢٣ تیراندازأن خوشونتٚ اَمرأ اونَ حمله بوکودیدی
و خصومتٚ اَمرأ اونٚره تیر تأودهییدی.
٢٤ ولی اونٚ کمان بجا بمأنسته و اونٚ بازویأن قوی بوبوستید
چونکی یعقوبٚ خودا دس، اونَ قوّت بدَه
کی ایسرائیلٚ شبان و صخره ایسه
٢٥ تی پئرٚ خودا وسی، کی ترَ یاری دهه،
او قادرٚ مطلقٚ وسی کی ترَ برکت دهه،
برکتأنٚ اَمرأ جٚه آسمانٚ جور
برکتأنٚ اَمرأ جٚه جولفٚ آبأنی کی زیمینٚ جیر نهَه
و برکتأنی اَمرأ کی زنأکأنٚ پستأن و رحمٚ ره#۴۹:۲۵ ایتأ اصطلاح ایسه مثلٚ اَنکی اَمأن گیلکی گیمی «خودا تی زأکأنَ زیادَ کونه.» قرار دهه.
٢٦ تی پئرٚ برکتأن عظیمتر ایسه
جٚه برکتأنٚ او تپهیأنٚ قدیمی
و جٚه برکتأنٚ کویأنٚ جاودانی.
اَ برکتأن یوسفٚ سر وأره
کی جٚه خو برأرأنٚ میأن اینتخاب بوبوسته.
٢٧ «بنیامین گرگٚ درندهیَ مأنه
کی صبح خو شکارَ خوره
و غروب دم هرچی کی غارت بوکوده تقسیم کونه.»
٢٨ اَشأن همهتأن ایسرائیلٚ دوازدهتأ قبیلهیأن بید و اَشأن گبأنی بید کی اوشأنٚ پئر بزه وختی کی اوشأنَ برکت دَئن دوبو و هر کدامَ برکتی فدَه کی اوشأنٚ ره مناسب بو.
یعقوبٚ مردن
٢٩ آخر سر یعقوب وصیت بوکوده: «من کی مردن درم و شوئون درم می آبااجدادٚ ورجه. مرَ می اجدادٚ ورجه دفنَ کونید، ٣٠ هو غارٚ دورون کی مکفیله دشتٚ میأن، نزدیکٚ مَمری کی سرزیمینٚ کنعانٚ دورون نهَه و ایبراهیم او دشت و غارَ عفرونٚ حیتّی جَا بیههبو کی خودشٚ مقبره ببه. ٣١ هویه کی ایبراهیم خو زن سارا اَمرأ و ایسحاق، خو زن ربکا اَمرأ دفن بوبوستیدی کی منم لیهیَ هویه دفن بوکودم. ٣٢ غار و دشتی کی جٚه حیتّی پسرأن بیهه بوبوستهبو.» ٣٣ یعقوب خو وصیتَ خو پسرأنٚره بوگفته، خو دس و پایَ خو رختخوابٚ دورون درازَ کوده بمرده بوشو خو آبااجداد ورجه.
Currently Selected:
پیدایش ۴٩: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media