پیدایش ۲۳
۲۳
سارا مردن
۱ سارا صد و بیست و هفت سال زندگی بوکوده. اَن بو سارا عمرٚ سالأن ۲ و «قَریه‌اَربَع» کی حبرون ببه، سرزیمینٚ کنعانٚ دورون بمرده و ایبراهیم بوشو تا سارا ره گریه و عزاداری بوکونه. ۳ ایبراهیم جٚه خو مُرده کنار ویریشته و حیتّی مردومأنَ بوگفته: ۴ «من شیمی میأن غریبم و بَموم اَیه ساکن بوبوستم. ایتأ قبر مرَ بوفروشید تا من بتأنم می مُرده‌یَ اویه دفنَ کونم.» ۵ حیتّی مردومأن ایبراهیمَ جواب بدَییدی: ۶ «ای سرور، اَمی گبَ گوش بوکون. تو اَمی میأن پیله‌دأنه رهبری. تی مُرده‌یَ اَمی بهترین مقبره‌یأنٚ دورون دفنَ کون. هیتّأ جٚه اَمأن اَمی مقبره‌یَ تی جَا دریغ نوکونیم کی تی مُرده‌یَ اویه دفنَ کونی.» ۷ او وخت ایبراهیم ویریشته و حیتّی مردومأنٚ جُلُو تعظیم بوکوده ۸ و اوشأنَ بوگفته: «اگه وئلیدی می مُرده‌یَ اَیه دفنَ کونم، پس شیمی جَا ایتأ خوأهش دأرم تا عفرون، صوحارٚ پسرٚ ورجه مِره سفارش بوکونید ۹ تا مکفیله غارَ کی اونٚ‌شینه و اونٚ زیمینٚ دورون او آخر نهَه، مرَ واگذار بوکونه. اونٚ جَا بخوأیید او زیمینَ به اونٚ تومامٚ قیمت مقبره‌ره شیمی ورجه مرَ بوفروشه.» ۱۰ عفرونم حیتّیأنٚ میأن نیشته‌بو و تومامٚ حیتّی مردومأنٚ جُلُو کی او شهرٚ دروازه طرف بَمو بید، ایبراهیمَ جواب بدَه: ۱۱ «نه سرور! می گبَ گوش بدن؛ من او زیمین و او غارَ کی اونٚ دورون نهَه ترَ بخشم. من اَ مردومٚ جُلُو اونَ ترَ فدم تا تی مُرده‌یَ دفنَ کونی.» ۱۲ ایبراهیم ایبار دِ او مردومأنٚ جُلُو تعظیم بوکوده ۱۳ و اوشأنٚ جُلُو عفرونَ بوگفته: «خوأهش کونم می گبَ گوش بوکونی. من اَ زیمینٚ پولَ ترَ فدم. اَنَ می جَا قوبیل بوکون کی می مُرده‌یَ اویه دفنَ کونم.» ۱۴ عفرونم ایبراهیمَ جواب بدَه: ۱۵ «آقا جان، می گبَ گوش بوکون. اَ زیمینٚ پول چارصد سکه نقره‌یه، امّا اَ پول تی قابلَ نأره؟ تی مُرده‌یَ دفنَ کون.» ۱۶ ایبراهیم عفرونٚ گبَ گوش بوکوده و مبلغی‌یَ کی حیتّیأنٚ جُلُو به زبان بأورده‌بو، یَنی چار صد سکه نقره‌یَ بر حسبٚ وزنٚ رایج بازرگانأنٚ ورجه، اونٚ‌ره وزن بوکوده.
۱۸-۱۷ پس عفرونٚ زیمینٚ مالکیت، حیتّی مردومأنٚ چومأنٚ جُلُو شهرٚ دروازه سر ایبراهیمَ واگذار بوبوسته، او زیمینی کی مکفیله دورون و مَمری نزدیکی نهَه‌بو، یَنی او زیمین و او غار با همه‌یٚ او دار و درختأنی کی تومامٚ اونٚ زیمینٚ محدوده دورون نهَه‌بو. ۱۹ او وخت ایبراهیم خو زن سارایَ مکفیله غارٚ دورون دفنَ کوده کی مَمری نزدیکی نهَه‌بو کی هو حبرون ببه، سرزیمینٚ کنعانٚ میأن. ۲۰ اَطویی بوبوسته کی او زیمینٚ مالکیت و غاری کی اونٚ دورون نهَه‌بو، قبرٚ وسی، حیتّیأنٚ جَا ایبراهیمَ واگذار بوبوسته.
Currently Selected:
پیدایش ۲۳: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media