پیدایش ۲۲
۲۲
خودا ایبراهیمَ آزمایش کونه
۱ بعدٚ اَ ایتفاقأن، خودا ایبراهیمَ آزمایش بوکوده، دوخوأده و بوگفته: «ایبراهیم!» اون جواب بدَه: «بله خوداوند.»
۲ و خودا بوگفته: «تی پسر ایسحاق، تی ایتأ پسرَ کی اونَ خیلی دوست دأری، اوسَن، بوشو به سرزیمینٚ موریا، اویه اونَ ایتأ سوجأنئنی قربانی مأنستن، ایتأ جٚه کویأنٚ جور کی ترَ نیشأن دهم، قربانی بوکون.»
۳ صبحٚ زود، ایبراهیم ویریشته خو اولاغٚ پالانَ دَوسته، دو نفر جٚه خو نوکرأن و خو پسر ایسحاقَ اوسَده، هیمه‌یم قربانی سوجأنئنٚ وسی بار بوکوده و رأ دکفته بوشو به طرفٚ جایی کی خودا بوگفته‌بو. ۴ سوّمی روز ایبراهیم خو سرَ راستَ کوده و او جایَ جٚه دور بیده. ۵ خو نوکرأنَ بوگفته: «هَیه، اولاغٚ ورجه بِیسید کی من و می پسر بیشیم اویه خودایَ پرستش بوکونیم و وأگردیم بأییم شیمی ورجه.»
۶ ایبراهیم هیمه‌یَ کی قربانی سوجأنئنٚ وسی اوسَده بو خو پسر ایسحاقَ بوکولَ دَه، و خودشم آتش و چاقو به دسَ گیفته، دونفری رأ دکفتیدی. ۷ ایسحاق خو پئر ایبراهیمَ دوخوأده، وَورسه: «پئر؟»
ایبراهیم جواب بدَه: «چیسه، پسر جان؟»
ایسحاق بوگفته: «هیمه و آتشَ دأریمی، ولی برّه‌یٚ قربانی کو؟»
۸ ایبراهیم جواب بدَه: «پسر جان، خودا خودش برّه‌یٚ قربانی‌یَ فراهم کونه.» و دو نفری شوئون دیبید.
۹ وختی فأرسه‌ییدی هو جایی کی خودا ایبراهیمَ بوگفته‌بو، اون اویه ایتأ مذبح بر پا بوکوده هیمه اونٚ سر بنَه و خو پسر ایسحاقَ دَوسته بنَه قربانگاه هیمه‌یأنٚ سر. ۱۰ پس چاقویَ به دسَ گیفته کی خو پسرٚ سرَ وَوینه، ۱۱ ولی خوداوندٚ فرشته آسمانٚ جَا اونَ دوخوأده: «ایبراهیم! ایبراهیم!»
اون جواب بدَه: «بله خوداوند.»
۱۲ فرشته بوگفته: «تی پسرَ دس نَوأ زِئن. اونٚ اَمرأ کاری نوکون. هسه دأنم کی خوداترس ایسی، چونکی تی پسر، تی ایتأ پسرَ می جَا دریغ ندأشتی.»
۱۳ ایبراهیم خو سرَ راستَ کوده ایتأ قوچَ بیده کی اونٚ شاخأن گومارٚ دورون گیر بوکوده‌بید. بوشو قوچَ بیگیفته بأورده، سوجانئنٚ قربانی‌یَ بجا بأورده، به جایٚ خو پسر. ۱۴ پس ایبراهیم او محلٚ نامَ «خوداوند فراهم کونه»#۲۲:۱۴ به عبری «یهوه یری». نام بنَه، کی تا ایمروزم گیدی: «خوداوندٚ کوهٚ سر فراهم به.»
۱۵ خوداوندٚ فرشته دوواره آسمانٚ جَا ایبراهیمَ دوخوأده و بوگفته: ۱۶ «خوداوند بفرمأسته: به خودم قسم خورم، هسه کی اَ کارَ بوکودی، تی ایدأنه پسرَ، به فرمانٚ من بأوردی قربانی بوکونی، ۱۷ هَنٚ وسی ترَ به فراوانی برکت دهم، تی زأکأنَ آسمانٚ ستاره‌یأن و دریا کنارٚ فورشٚ مأنستن فراوانَ کونم. تی زأکأن، خوشأنٚ دوشمنأنٚ شهرأنٚ مالک بیدی. ۱۸ تی زأکأنٚ جَا، تومامٚ مردومٚ زیمین برکت بریدی، چونکی تو می فرمانَ بجا بأوردی.» ۱۹ پس ایبراهیم وأگردسته خو نوکرأنٚ ورجه و همه‌تأن همدیگرٚ اَمرأ؟ بوشوییدی بئرشبع طرف و ایبراهیم بئرشبع میأن ساکن بوبوسته.
۲۰ مدتی بوگوذشته، ایبراهیمَ خبر بدَییدی: «مِلْکَه، تی برأر زن، چندتأ پسر تی برأر ناحورٚ ره به دونیا بأورده. ۲۱ اوّلی زأی عوص، اونَ برأرأن بوز و قموئیل، آرامٚ پئر ۲۲ و کاسِد و حَزو و فِلداش و یِدلاف و بتِوئیل.» ۲۳ بتِوئیل ربکا پئر بو، مِلْکَه اَ هشتأ پسرَ، ایبراهیمٚ برأر، ناحورٚ ره به دونیا بأورده. ۲۴ ناحورٚ کنیز کی رومه نام دأشتی، پسرأنی ناحورٚ ره به دونیا بأورده، کی اوشأنٚ نام طابَح و جاحَم و تاحَش و مَعکَه بو.
Currently Selected:
پیدایش ۲۲: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media