Mātiu 25
25
Ko e Talanoa Fakatātā ki he Kau Fefine ‘e Toko Hongofulu
1ʻI he taimi ko iā, naʻá ne fakatatau ʻa e Pule‘anga ‘o Hēvani̇́ ki ha ō atu ha tamaiki finemui ‘e toko hongofulu mo ha‘anau ngaahi māama ke talitali ʻa e fononga mai ʻa ha tangata na‘e teu ke mali. 2Ko e toko nima ai ko e kau fakavalevale, pea ko e toko nima ko e kau fakapotopoto. 3Ko e kau fakavalevalé, na‘á nau toʻo ‘enau ngaahi māamá, ka na‘e ‘ikai te nau toʻo ha‘anau lolo. 4Ka ko e kau fakapotopotó na‘á nau toʻo ‘enau māamá mo toe toʻo ‘enau ngaahi hinalolo kuo fonu.
5Ka na‘e tuai mai ʻa e tangata mali̇́, pea ko ia naʻa nau tule mohe kotoa ‘o nau tō hifo ‘o mohe. 6Pea a‘u ki he tu‘apoó kuo ongo mai ʻa e kaila, ‟Ko e tangata mali̇́ ʻeni! Mou omi ke tau fakafetaulaki ki ai!” 7Pea ‘āhake kotoa ʻa e tamaiki finemui̇́ ‘o teu ‘enau ngaahi māamá. 8Pea pehēange ‘e he kau fakavalevalé ki he kau fakapotopotó, ‟‘Omai mu‘a haʻamau me‘i lolo, he kuo mei maha ‘emau māamá.” 9Pea tali ‘e he kau fakapotopotó, ‟‘Oua, he ‘e ‘ikai ke tau feʻunga kotoa ai. Mou ō atu ki he fakatauʻanga loló ‘o fakatau mei ai haʻamou me‘i lolo.”
10Pea lolotonga ʻa e kei ō ʻa e tamaiki finemui fakavalevalé ‘o kumi loló, kuo aʻu mai ʻa e fononga ʻa e tangata mali̇́, pea ko e tamaiki finemui naʻe maau ʻenau teú, naʻa nau hūatu mo ia ki he kātoangá, pea tāpuni leva ʻa e matapaá.
11Pea foki mai ʻa e tamaiki finemui fakavalevalé ʻo ʻilo kuo nau tōmui̇́, pea nau kaila atu mei tu‘a, ‟‘Eiki! ‘Eiki! Toʻo mai mu‘a ʻa e matapaá ke mau hū atu!”
12Ka naʻe pehē mai ‘e he tangata mali̇́, ‘Oku ou tala moʻoni atu, ʻoku ‘ikai ʻaupito te u ‘ilo ‘e au kimoutolu!
13‟Ko ia, mou tokanga ‘o le‘o! He ‘oku ‘ikai te mou ‘ilo ʻa e ‘ahó pē ko e houá.”
Ko e Talanoa Fakatātā ki he Kau Tamaioʻeiki ‘e Toko Tolu
(Luke 19:11-27)
14‟Ko ʻeni foki, ko e anga ‘o e Pule‘anga ʻo Hēvani̇́. ʻOku tatau mo ha tangata na‘e teu fononga ki ha fonua mama‘o, pea naʻe ui mai ʻene kau ngāué, ‘o ne tuku kiate kinautolu ʻene koloá ke nau pule‘i. 15Ki ha taha, na‘á ne ‘oange ʻa e tangai koula ʻe nima, ki ha taha, naʻá ne ʻoange ha tangai koula ʻe ua, pea ki ha taha, ʻa e tangai koula ʻe taha, ʻo fakatatau pē ki honau mafai taki taha. Pea toki ‘alu atu ia ki muli.
16Pea ‘alu leva ʻa e tamaioʻeiki na‘e tuku ai ʻa e tangai koula ʻe nimá, ‘o ne ngāue‘i, ‘o toe ma‘u ai ha tangai ʻe nima kehe.
17Na‘e fai pehē mo e tamaioʻeiki na‘e tuku ai ʻa e tangai koula ʻe ua, pea naʻe toe ma‘u mai mo ha tangai ʻe ua kehe.
18Ka ko e tamaioʻeiki na‘e tuku ai ʻa e tangai koula ʻe tahá, na‘e ‘alu atu ia ‘o keli ha luo, ‘o fufuu‘i ai ʻa e pa‘anga naʻe ʻoange ʻe hono ʻeiki̇́.
19Pea fuoloa mei ai kuo foki mai ʻa e tangataʻeiki na‘e ‘a‘ana ʻa e kau ngāué. Pea naʻe fekau ke nau taki taha omi ʻo fakamatala ki he anga ʻene ngāue‘i ʻa e pa‘angá.
20Pea ha‘u ʻa e tangata ngāue na‘e tuku ai ʻa e tangai koula ʻe nima ‘o ‘oatu ʻa e toe tangai ʻe nima kehe naʻá ne maʻú, mo ne pehē: ‛Tangata‘eiki, na‘á ke ‘omai ʻa e tangai koula ʻe nima, pea kuo u toe maʻu mei ai ha tangai ʻe nima kehe.’ 21Pea pehē ange ‘e he ‛Tangataʻeiki̇́, ‘Mālō e ngāue, siʻi tamaioʻeiki lelei mo falala‘anga! Kuó ke falala‘anga ʻi ha me‘a si‘i, ko ia te u fakanofo koe ke ke pule‘i ha ngaahi me‘a lahi. Ha‘u ā ʻo hū ki he fiefiaʻanga ʻo ho ʻeiki̇́!’
22Pea ha‘u foki mo e toko taha na‘e tuku ai ʻa e tangai koula ʻe ua, ‘o ne pehē atu, ‛Tangata‘eiki, na‘á ke tuku mai ʻa e tangai koula ʻe ua, pea ko eni, kuo u toe ma‘u mei ai ha tangai koula ʻe ua kehe.’ 23Pea pehē ange ‘e he tangataʻeiki̇́: ‟‛E ngāue, siʻi tamaioʻeiki lelei mo falala‘anga. Kuó ke falala‘anga ʻi he pule‘i ʻo ha me‘a si‘i, ko ia te u fakanofo koe ke ke pule‘i ha ngaahi me‘a lahi. Ha‘u ā ʻo hū ki he fiefiaʻanga ʻo ho ʻeiki̇́!”
24Pea toki ha‘u ʻa e tangata ngāue na‘e tuku ai ʻa e tangai koula ʻe tahá, ‘o ne pehē ange: ‟Tangata‘eiki, na‘á ku ‘ilo ‘e au ko e tangata faingata‘a koe. ‘Okú ke utu ʻa e me‘a na‘e ‘ikai te ke fakaheká, mo toli ʻa e me‘a na‘e ‘ikai te ke tō. 25Peá u manavahē ai, ko ia naʻá ku ‘alu au ‘o tanu ho‘o koulá he kelekelé, pea ko ena, ko ho‘o meʻá ena.”
26Pea tali ‘e he tangata‘eiki̇: ‟‘A e toki tamaioʻeiki kākā mo fakapikopiko! Naʻá ke ‘ilo koā ‘oku ou fa‘a utu ʻa e me‘a na‘e ‘ikai te u fakaheká mo toli ʻa e me‘a na‘e ‘ikai te u tō? 27Pea ko e hā na‘e ‘ikai te ke ‘ave ai ‘eku pa‘angá ‘o fakahū he Pangikeé, hei‘ilo te u toe ma‘u kotoa mai ia mo hano tupu ‘i ha‘aku foki mai? 28‛Mou toʻo ʻa e pa‘angá meiate ia ‘o ‘ange ki he tama ‘oku ‘i ai ʻa e tangai ʻe hongofulu!
29He ko ia ‘oku ‘i ai ha‘ane me‘á, ‘e ‘oange ki ai mo ha me‘a, pea ʻe lahi ʻene koloá. Ka ko ia ‘oku ‘ikai ha‘ane me‘á, na‘á mo e me‘a ‘okú ne ma‘ú, ‘e fa‘ao mei ai. 30Ka mou fakapuna ʻa e tangata ngāue pau‘u ko ená kitu‘a ki he fakapoʻuli, ki he feitu‘u ‘oku fai ai ʻa e tangi mo e mamahi lahi̇́.’”
Ko e Fakamaau Faka‘osí
31‟He ʻoka faifai ‘o hā‘ele mai ʻa e Foha ‘o e Tangatá mo hono lāngilangi̇́ mo ʻene kau ‘āngeló kotoa, ‘o ʻafio ‘i hono taloni fakatu‘i̇́. 32Pea ‘e kātoa mai ʻa e kakai ‘o e ngaahi pule‘angá kiate ia, pea te ne vahevahe kinautolu, ‘o hangē ko e vahe‘i ‘e ha tauhisipi ʻene fanga sipi̇́ mei he fanga kosi̇́. 33Peá te ne fokotu‘u ʻa e fanga sipi̇́ mei hono toʻomataʻú, mo e fanga kosi̇́ mei hono toʻohemá.
34Pea ‘e toki folofola atu ʻa e Tu‘i̇́ ki he fa‘ahinga mei hono toʻomataʻú, ‘Mou omi ā, ‘a kimoutolu kuo tāpuekina ‘e he‘eku Tamai̇́, ‘o ma‘u ʻa e pule‘anga kuo teu maʻamoutolu ‘e he ‘Otuá, talu mei he fakatupu ʻo māmani. 35He na‘á ku fiekaia, pea naʻa mou fafanga au. Na‘á ku fieinua, pea naʻa mou ‘omi hoku inu. Na‘á ku ha‘u ko e muli, pea naʻa mou fakaafe‘i au ki homou ‘api̇́. 36Na‘á ku tēlefua, pea naʻa mou ‘omi hoku vala. Na‘á ku puke, pea naʻa mou ʻaʻahi mai kiate au. Na‘á ku ‘i he pili̇̄sone, pea naʻa mou omi kiate au.
37Pea tali ‘ekinautolu na‘e angatonú; ‛ʻEiki ē; na‘á mau sio ‘anefē ‘okú ke fiekaia pea mau ‘atu ha‘o me‘akai? Pea ʻanefē haʻo fieinua, ʻo mau ‘atu ai hao inú? 38Na‘e ‘anefē ʻemau sio ko e muli koe, pea mau fakaafe‘i koe ki homau ‘api̇́? Pea ʻanefē ha‘o masiva kofu, pea mau fakakofu koe? 39Pea ‘anefē haʻo mahakiʻia, pē nofo pili̇̄sone, pea mau ō atu ‘o vakai koe?’
40Pea ʻe tali ‘e he Tu‘i̇́, ‛Ko hono mo‘oni̇́ ʻeni ‘oku ou talaatú, ko ho‘omou fai pehē ki he si‘i taha ‘i hoku ngaahi tokoua ko eni̇́, ko ho‘omou fai ia kiate au.’
41Pea ‘e toki folofola ange ‘e he Tu‘i̇́ ki he fa‘ahinga mei hono toʻohemá, ‘Mou mavahe meiate au, ‘a kimoutolu kuo fakamala‘ia ‘e he ‘Otuá, ke tō ki he afi kuo teu mo‘oe Tēvoló mo ʻene kau ‘āngeló, ʻa ia ‘e ‘ikai ala matāmate‘i ‘e ha taha! 42He na‘á ku fiekaia kae ‘ikai te mou ʻomi haʻaku meʻakai. Na‘á ku fieinua kae ‘ikai te mou ‘omi ha ku inu. 43Na‘á ku ha‘u ko e muli kae ‘ikai te mou fakaafe‘i au ki homou ‘api̇́. Na‘á ku tēlefua, kae ‘ikai te mou ‘omi haku vala. Na‘á ku mahakiʻia mo nofo haʻisia, kae ‘ikai te mou omi ‘o vakai au.
44Peá te nau toki tali ki ai; ‛ʻEiki na‘e ‘anefē haʻo fiekaia; pē fieinua, pē ko e muli koe, pē masiva kofu, pē mahakiʻia, pē nofo haʻisia, kae ‘ikai te mau tokoni atu kiate koe?’
45Pea ‘e folofola ange ‘e he Tu‘i̇́ kiate kinautolu, ‛Ko hono mo‘oni̇́ ʻeni ‘oku ou talaatú, ko e ‘ikai ke mou tokoni ki he si‘i taha he ngaahi tokoua ko ʻeni ‘o‘okú, ko e ‘ikai ia te mou tokoni mai kiate aú.’”
46‟‘E toki fekau ai ke hilifaki ki he fa‘ahinga ko iā ʻa e tautea taʻengata, kae hū ʻa e māʻoniʻoni̇́ ki he mo‘ui taʻengatá.”
Currently Selected:
Mātiu 25: TCNT
Highlight
Share
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.